熱爆娛樂: [FACE 369] 抵鬧　 5鬧世盃節目求其　南華前老闆娘：尊重吓足球 MF,

2014年6月18日星期三

[FACE 369] 抵鬧　 5鬧世盃節目求其　南華前老闆娘：尊重吓足球 MF,

TVB揼本派外景隊去巴西，可惜一對女主持苟芸慧及陳貝兒（右圖）唔熟波，又入唔到球場做訪問，淨係捉住一班球迷傾偈，當然冇觀眾關心！

真面目

抵鬧　 5鬧世盃節目求其　南華前老闆娘：尊重嚇足球

世界盃上週五（ 13日）淩晨開波，今屆播映權由 TVB以 4億投得，咁貴投得主播權，所以 TVB「恩賜」 22場免費直播賽事，分組賽第三輪同 16強都冇得 free，想睇足 64場唯有俾錢裝收費台。

之不過落重本投資 4年 1度全球盛事，大台卻貫徹是是旦旦作風，由節目內容、製作質素以至嘉賓主持都被批評唔專業，揭幕戰當晚的 4小時特備節目更係九唔搭八，簡直浪費觀眾時間。除了通訊事務局收到 6宗投訴，南華前老闆娘、才女梁芷珊亦忍唔住狂插，連續以 5個「求其」批評 TVB的世界盃節目質素，「可唔可以尊重嚇足球？尊重嚇世界盃呢個咁重要嘅賽事？」

相隔 16年， TVB以 4億高價再次投得世界盃獨家播映權，難得擊敗死敵有線同 now TV，大台嚴陣以待，更花近 8千萬、派超過 50人的攝製隊往巴西拍外景。

梁芷珊狂鬧

肯畀錢唔代表一定高質素， TVB連續幾個與世界盃相關的節目都係負評居多。特別係揭幕戰當晚的 4小時特備節目，又煮龍蝦又按摩，完全同足球無關，而且一班唔識波藝員不斷照稿讀扮內行，曾華倩將巴西主將「尼馬」讀成「利馬」，狄易達仲離譜，話意大利男高音巴伐洛堤係球員，比小學雞更無知。

而早前播出、由黃翠如、洪永城主持的世盃節目《走過足球聖地》，亦被南華足球隊前老闆娘梁芷珊在 fb公開狠批，「求其搵啲景、求其拍啲嘢、求其訪問啲人、求其寫啲稿、求其扮好好笑……」更直指 TVB唔尊重足球和觀眾，結論是，「內容好難頂」，語氣極重！

羅傑承（右）宣布唔再做南華班主，上月尾港甲最後一場賽事完結，一班南華球迷歡送老闆羅傑承及老闆娘梁芷珊（左），場面感人。

梁芷珊雖然冇開節目名，但電視畫面右上角寫住大台個名，明眼人一眼就知佢插緊《走過足球聖地》。

韓毓霞：我放大假

球壇行家唔俾面，連網友都喪鬧一班主持同評述員唔專業，非常懷念已離世的名足球評述員「阿叔」林尚義之餘，亦奇怪點解冇「體育世界天後」韓毓霞份。唔計奧運亞運等大型體壇活動，過往曾由 TVB主播的世界盃， TVB亦會派韓毓霞往當地採訪踩埋落場訪問球星，但今屆竟然由主持以至外景隊都冇「霞姐」份，寧願搵做慣娛樂訪問的陳貝兒、苟芸慧呢類花瓶主打。

本刊上週六（ 14日）打俾韓毓霞，霞姐只交代自己正在放大假及多謝觀眾支持後便匆匆收線，似有難言之隱。採訪大將「冇眼睇」，節目又求其是旦，唔怪得連「 TVB契仔」李克勤被問到世盃節目質素差時都即時割蓆，「我都冇份做，所以我冇意見，亦都唔關我事。」

揭幕節目長達 4小時，主持曾華倩同金剛對足球完全冇認識，又無端端加插煮嘢食環節，不知所謂。電視畫面

真正識波的何輝（後中）、鍾志光（後右）都有份去巴西，可惜在揭幕戰時已被召回香港評述，冇得留在當地現場講波。

韓毓霞放大假消失

'98法國世界盃，韓毓霞有份去當地採訪，而當年 TVB就派咗足球評述員林尚義「阿叔」現場講波，當時阿叔更被影到直播期間攞煙食，成為經典。

電視畫面

now TV落場

TVB有得全港獨家直播世界盃，不過製作求其，相反 now TV則專業得多，雖然冇播映權，但設有世界盃新聞網，密密更新世盃消息外，又派記者往當地採訪，而該記者更聲稱係全港唯一持有場地攝影記者證的傳媒，可以落球場近距離接觸球星再上載採訪資訊及圖片上 now app，夠曬地位。反而大台只能在傳媒中心評述賽事，輸曬！

《低俗講波團》明抄球彩台　有線阿鵬：唔係求其吹水就好笑！

TVB新開「 19台」講世盃，主打節目《低俗講波團》以 cheap做賣點，聲稱有性感世界妹，又搵黃毓民爆粗講波（至現時都未爆粗），明抄有線球彩台。可惜劣評如潮，主持亂噏當秘笈，講賭波又唔專業，齋報賠率又唔分析，連球彩台台柱阿鵬（陳樹鵬）都踩爆，「唔識波背稿唔緊要，但 4年 1度就背好啲囉，咁多觀眾睇住，你自己都肉酸同埋我唔贊成講粗口，唔小心俾細路聽到就唔好。其實低俗冇問題，不過齋低俗係生存唔到，本身要有啲足球底，同 partner又要夾，唔係求其吹水就好笑！」