掃呢頁CODE去手機

2014年7月11日 星期五

[忽然1周 989] 出自傳爆二奶辛酸  82歲黃夏蕙:自殺過兩次 夏蕙,BKD_S,黃夏蕙,MW,




82歲的夏蕙姨動作多多,即將出自傳大爆當年做胡百全二奶的往事,她說:「我當年真係好委屈。」

滾熱辣

出自傳爆二奶辛酸  82歲黃夏蕙:自殺過兩次

今年 82歲的黃夏蕙,四個月前突然病倒入院,其間一度傳出死訊。走過死亡幽谷,夏蕙姨下決心在有生之年出自傳《夏蕙回憶錄》,準備在書展,硬撼一批賣肉𡃁模。

回顧過去,夏蕙姨傷痕纍纍。書中她自爆做過胡百全二奶,受盡正室欺淩,曾為情食安眠藥及開煤氣自殺。她說:「我做二奶嗰陣受盡委屈,仲自殺過兩次。好彩死唔去,死咗就唔知依家過得咁有意義。」








88蚊睇一生

《夏蕙回憶錄》定價$88,在書展有得賣之餘,她更於下周六( 19日)深入會展舉行簽名會。

夏蕙這三個字,是異相、騎呢兼愛搶風頭的代名詞,不過她多年來從不當一回事。即將來臨的書展,黃夏蕙更出自傳,大爆一生起起跌跌,其中最具話題性,當然是與香港已故著名大律師胡百全一段唔見得光的戀情。

病榻回首

今年 3月,夏蕙姨突然患急病要入院吊鹽水,更誤傳她死訊,促使她決心寫自傳訴說一生經歷。

遭元配落禁令

夏蕙姨在書中用十多頁紙,寫下她當年遭胡百全髮妻馮小姐打壓的經過。其中她提到當年馮申請禁制令,不准胡百全以主婚人身份為乾女兒搞婚禮。

被迫斷絕來往

做人二奶多年的夏蕙姨,從來冇要求過名份,但胡百全元配馮小姐卻逼胡白紙黑字跟她斷絕來往。

無權進入居所

雖然夏蕙姨和胡百全共生了四子兩女,不過胡逝世後,其子女所獲分的遺產不多,連胡的居所她也無權進入。

曹達華做媒

當年 18歲蔔蔔脆的夏蕙姨,加入娛圈後不乏有財有勢的男士追求。不過她偏偏選擇做二奶,介入胡百全一段婚姻。記者率先採訪黃夏蕙,她鉅細無遺地交代二人相識至相戀的經過,更首次披露曾自殺過兩次。

她肉緊說:「我鍾意演戲,成日走去戲棚睇拍戲,識咗好多大老倌同大明星。華哥(曹達華)特別錫我,有人想佔我便宜,佢就出手幫我。有次華哥同祥哥(新馬師曾)話一齊去食飯,然後佢哋打麻雀,我就喺嗰度識咗胡百全。嗰次佢邊打牌邊望我,仲問咗我好多嘢,之後華哥叫佢送我返屋企喇!」

當年胡百全比夏蕙姨年長 23年,夏惠姨雖然講到明嫌佢老,但胡百全追求攻勢猛烈。「嗰次之後胡百全經常約會我,打電話搵我。我話我仲年輕,佢話佢明白。我一早知佢有太太,我亦冇要求名份,只望佢默默喺我身邊,做我好朋友。直至有一次我患重病,佢親身去英國買特效藥俾我,我覺得好受重視。最後我選擇同佢一齊,只要佢著緊我就足夠。」

曹達華除介紹胡百全俾夏蕙姨認識,當年更對她照顧周到。曹 06年病重時,夏蕙姨亦頻到醫院探望。

夏蕙姨青春少艾時非常省鏡,入行未幾已追求者眾。

暗生四子兩女

當年香港還未實行一夫一妻制,男人十居其九三妻四妾,夏蕙姨背負著妾侍身份,跟他生了四子兩女。「我雖然冇同胡百全正式結婚,但我哋生咗四子兩女,佢亦同我擺過結婚酒,但我哋冇註冊,我只算係佢妾侍。雖然胡先生對我好好,但佢係個好傳統嘅人,每晚仍然會返元配度瞓」

不過妾侍終歸係妾侍,始終要睇大婆面色。元配同胡百全係盲婚啞嫁,我知道自己係第三者,但我冇要求胡百全正式娶我,我只係要佢對我好,就足夠,但估唔到原來世事唔係咁簡單。

「我契女結婚,我同胡百全以女方家長身份主辦婚宴,以我哋嘅名義派發喜帖,於是惹來元配向法庭申請禁制令,嚴禁我哋用呢個稱呼。」

相戀 50年

夏蕙姨和胡百全相戀 50年,雖然二人從未直接承認戀情,但二人當年頻頻連體出席公開場合。

秘密生女

當年夏蕙姨秘密為胡百全誕下大女,胡的元配看在眼內,不停出招力阻二人交往。

仔女低調

夏蕙姨和胡百全所生的仔女,如今已經年屆四五十歲。多年前,夏蕙姨亦帶過其中一名兒子胡禮賢現身活動,不過現時卻愈來愈低調。

繼續單身

夏蕙姨現時和前賽車手潘炳烈一齊生活,但二人原來至今仍未結婚。她說:「晚年仲有個咁好嘅男人喺身邊,好開心。」

收埋小四

除受元配苦苦壓迫,夏蕙姨還要應付小四挑機,差點走上絕路。「我知道胡先生(此時稱呼做胡先生)外面仲有個女人,佢話個女人係富家小姐,怕個女人騷擾我,叫我同個女人講大話,話我哋只係朋友,之後有一段長時間我哋經常三人行。我心灰意冷,覺得太委屈自己。當時或者太後生唔識諗,結果食安眠藥自殺。」

幸好工人將夏蕙姨從鬼門關救回來,不過她幾年後又再向死神挑戰。「第二次(自殺)係因為大婆俾朋友教唆,經常約胡先生嘅朋友去佢屋企打牌,想困住個老公。我心諗老公始終係人哋嘅,傷心到開煤氣,估唔到亦死唔去!」

著火紅壽衣

夏蕙姨將於下周三( 16日)舉行生前喪禮,當日瞓住棺材讓人瞻仰。日前她親身試紅色壽衣,更戴上不同款式珠寶襯衫。燈光效果下,夏蕙姨造型驚嚇,相當應節。

三吋高壽鞋

死都要靚,夏蕙姨連壽鞋都揀三吋高紅色高踭鞋。

百萬陪葬

夏蕙姨除周身珠光寶氣外,更搵來百萬珠寶首飾陪葬,齊齊入棺。

對仔女有歉意

兩度自殺,執番條命,她再次心軟回到胡百全身邊,做一個安分守己的小三。胡百全 08年過身後,夏蕙姨回想時不禁自責:「我知道大婆啲仔女好恨我,覺得我搶咗佢哋老竇,破壞佢哋家庭幸福。我都唔想,大婆個大女只大過我一年。當時我咁年輕,好多嘢都唔識諗,至於我哋所生嘅六個仔女,我對佢哋更加有歉意,我知道呢個家庭曾經帶俾佢哋壓力。但相信佢哋有能力去面對,依家佢哋爸爸唔喺度,佢哋就要自食其力喇!我冇能力喺經濟上支持佢哋,我只希望仔女好似爸爸咁貢獻社會,到我百年歸老,以佢哋為榮。」

下周三( 16日),夏蕙姨更舉行一個生前喪禮,一切依足傳統儀式,著壽衣、化死人妝兼瞓棺材。

「計埋上次入醫院,我八十幾歲人有三次死唔去經歷,令我想搞呢次生前喪禮。我想話俾啲後生仔女知,唔好咁易嗌生嗌死,死咗就乜嘢都冇㗎嘞,要好似我咁八十幾歲仲愛惜生命咁活躍!有乜唔開心同委屈,都係生命嘅一部分!」

騎呢行徑

除了著壽衣搞生前喪禮,夏蕙姨多年來也以騎呢精神行走江湖,逢名人喪禮必去成為「殯儀之星」外,還有以下「傑作」。

搶頭炷香

夏蕙姨每年年初一前夕,定必到黃大仙排隊等上頭炷香,而且形象出位。 2010年虎年,她特登打扮到老虎乸一樣去黃大仙上頭炷香,惹人注目。

騎劫 D&G

2012年中,位於尖沙嘴廣東道的 D&G被轟只容許內地人在門口影相,令港人鼓譟,網友更發起「 D&G門口萬人拍照活動」。夏蕙姨第一時間支持,還著到一身紅噹噹搶鏡服在 D&G門口影相,此舉深受網友擁護。

潮唱 Gwiyomi

韓國手指舞曲〈 Gwiyomi〉瘋魔全球,不少網友爭相模仿。夏蕙姨以 81高齡化身美少女戰士大跳 Gwiyomi,隨即令她有「夏蕙 BB」新朵。



鍾意就快D Share啦!