掃呢頁CODE去手機

2014年7月18日 星期五

[忽然1周 990] 擒攬啜做小三 李思捷舊菜 Naomi 夜點遭摑報警 Naomi,李思捷,馮鎵瀠,MW,




29歲的 Naomi雖然已過了卜卜脆年華,但比正印 Georgia當然嫩口好多。殘廁係窄,但都有私隱,花心男 Patrick同 Naomi搭升降機都要忘情攬啜, Naomi對髀仲鉗到咁實,更勝 Coffee。

打頭陣

擒攬啜做小三 李思捷舊菜 Naomi 夜點遭摑報警

兩年前, Naomi(馮鎵瀠)做小三,被傳媒拍到與李思捷澳門過夜而人氣急升。本刊最近收到線報及一段 20秒攬啜片段,發現 Naomi最近再做小三,硬搶佘詩曼好姊妹 Georgia拍了十年拖的楊姓男友(英文名 Patrick)。

據知 Naomi及 Georgia兩女爭男不但 fb互片, Naomi更在夜場與 Patrick豪放攬啜。今年 5月 4日, Naomi因為踩正印場被人掌摑,最後更報警返警署落口供。求證 Naomi,她承認與人發生衝突報警,但卻死撐做小三冇問題︰「一段健康關係唔會有第三者囉!」至於 Georgia則拒認自己打人,但提到男友與 Naomi的一段攬啜片,就寸爆替男友解畫︰「逢場作興咋!飲醉酒啫!」









這個世代,小三橫行。早前有李心潔老公彭順偷食𡃁模 Liddy,最近又有歌手可嵐大爆老公收埋小三兼家暴。而最新鮮滾熱辣的,是曾經介入李思捷及春卷戀情的𡃁模 Naomi(馮鎵瀠),最近在酒吧被人掌摑。

近日本刊收到線報,指李思捷舊菜 Naomi喺大半年前,介入佘詩曼一名蒲友好姊妹兼 Johnnie Walker高層 Georgia與男友的感情中,更指 Naomi明知 Georgia與楊姓男友拍拖十年、已達談婚論嫁階段,仍然「唔知醜」硬撬牆腳。

咀到入𨋢

酒吧激吻

兩人之前在酒吧玩到好忘形, Naomi先坐大髀, Patrick慾火上升,忍唔住即場咀 Naomi。

阿佘密友

Georgia曾是威士忌名牌 Johnnie Walker高層,她與阿佘是密友,認識不少藝人。

正印拖十年

Patrick與 Georgia十年前譜出姊弟戀,不過最近大半年 Patrick搭上 Naomi, Georgia慘被冷落。

見小三眼火爆

知情者話︰「 Georgia喺 5月 4日同男友 Patrick開 P,因為做地產嘅 Patrick要去上海公幹一段時間。嗰晚 Naomi竟然專程去踩場。 Georgia見到隻狐狸精梗係眼火爆,佢同幾個姊妹,嬲到走埋去同佢對峙。

「 Georgia先用手機電筒照住 Naomi,狂鬧『狐狸精、死八婆、姣雞』。 Naomi都好寸,勁駁嘴,反鬧 Georgia『老女人』,又話 Patrick同佢一齊只係為咗錢。當時有人一時火遮眼,咪一巴摑咗落去囉。之後隻狐狸精仲玩嘢報警,搶人男友仲要玩到咁大, Patrick咪睇清楚個女人真面目,之後死死地氣返去 Georgia身邊。但隻狐狸精仲死纏 Patrick,追到去上海箍煲! Georgia因為呢件事,連 Johnnie Walker份工都唔做。」

就兩女夜店衝突,報警求助一事,本刊求證警察公共關係科,但多日來數次查詢至截稿前仍未回覆。

李思捷一向雜食,難怪與 Naomi一拍即合。去年李思捷傳與春卷分手, Naomi更放晒風:「如果佢想搵人陪,我九秒九飛出去。」

春卷寸爆小三

談到曾介入自己與李思捷感情的小三 Naomi,春卷暗寸︰「感情嘅嘢,搶唔到嘅,唔係你嘅嘢搶唔到囉。如果嗰個人唔走,你點搶都冇用。(對佢做小三點睇?)佢係單身,鍾意做乜咪做乜囉。其實最大問題係中間嗰個(男主角)。」一箭雙鵰,寸埋花心李思捷!

Naomi硬搶李思捷,可惜最終都輸俾忍功一流的春卷。

兩年前, Naomi曾被拍到與春卷男友李思捷到澳門酒店過夜。

圖片

做小三有前科

彭順小三 Liddy(中),同 Naomi(右)是好友。兩人都有鋪小三癮,唔知有冇交換心得?

Naomi做小三早有前料。兩年前,她明知李思捷已有女友春卷,仍主動埋李思捷身,更與男方在澳門過夜,被傳媒斷正後又明目張膽在 fb示愛「 l Love JL」(李思捷英文名 Johnson Lee簡稱),擺明當正印春卷冇到,一度令春卷與李思捷鬧分手。

之前對手是好恰的春卷, Naomi當然冇有怕。不過今次與 Georgia交鋒, Naomi明顯是輸家。雖然今年初, Naomi已向傳媒自爆,與楊姓男友有結婚打算,又在 fb大晒幸福。但據知正印 Georgia來頭不小,不但家底豐厚、有學識,人脈更廣,與不少明星熟稔,如佘詩曼、周家怡、麥子樂和楊崢等。本刊致電佘詩曼,但阿佘卻拒絕回應。

「佢( Georgia)同 Patrick咁多年以嚟,一直好照顧對方,不但會介紹好多買樓客人俾男朋友,亦係 Patrick經濟同生活嘅支柱,唔係一般𡃁模可以做到。佢為咗 Patrick,之前仲冇做份工陪男友去上海。」

7月 14日, Naomi出席白健恩生日會後,與助手齊齊落海港城。記者就她被爆再做小三搶人男友,遭人掌摑一事向她求證。談到情敵 Georgia,她扮懵話唔識,但就強調同楊姓男友玩真感情。對於被摑事件,她指已交警方處理,無可奉告。

記︰有人爆料指你搶人男友,個男仔姓楊,仲有攬啜片為證㖭!

N︰咩呀(扮懵)做小三?我唔係囉!我識佢第一日,佢同我講係 single(單身),唔知邊個影埋呢啲嘢(攬啜片)。

記︰唔覺得做小三有問題?

N︰一段健康關係唔會有第三者,況且男未婚女未嫁,唔覺得有問題。

記︰聽聞你搶人男友, 5月仲喺夜場同楊生嘅正印 Georgia發生衝突?

N︰我不嬲都有落酒吧,平時都有去嗰度。

𠝹有米男

Naomi喜愛夜蒲,早前曾被發現在蘭桂坊搭上台灣金融富商。

喜愛食「棒」

Naomi閱男無數,台灣組合「棒棒堂」的前成員 Elmo(羅志祥身後),亦是她的前度。

撐小三無罪

Naomi曾在 fb發表「小三論」,她力撐小三無罪,更指一段關係有問題時,正印不應「死咬不放」,再次暗寸大過自己 13年的 Georgia阻住地球轉。

認衝突報警

︰係咪有衝突,仲被人掌摑?件事係點?

N︰係有衝突,我報咗警,交咗俾警方處理,詳情就唔方便講。

記︰據聞因為你踩場,刺激 Georgia,所以俾人掌摑?

N︰唔知點解有人咁講!可能因為有衝突,有人夾硬屈我,可能我報警有人好嬲。

記︰你同楊生係咪藕斷絲連?有人話你死纏人哋,追到去上海。

N︰我上海好多朋友,唔一定搵佢。

記︰你唔係第一次做小三,之前都介入過李思捷同春卷……

N︰(打斷記者問題)思捷都冇講啲乜!

記︰你對感情一向玩玩吓?

N︰從來冇玩過,唔講啦。(即衝上的士離開)

正印幫男友:逢場作興

Naomi拍過《喜愛夜蒲 2》,又在電影《蒲李老祖》和林敏驄合作。

Naomi死撐做小三冇問題,記者致電身在上海的正印 Georgia。她雖然死口唔認見過 Naomi,但一提到男友跟狐狸精有攬啜片,聲都變埋,仲話「唔想睇」片。

記︰早前有個𡃁模 Naomi介入你同男友感情?

G︰我都唔識佢,唔知有呢個人存在。

記︰我哋有佢同你楊姓男友一段攬啜嘅片, send俾你睇吓。

G︰我唔想睇(斬釘截鐵)……逢場作興啫!大家飲醉酒啫。

記︰對於呢個小三你有乜感覺?

G︰我哋拍咗拖十年,唔覺得有人影響到我哋。

記︰據知你哋曾喺夜場衝突?

G︰冇衝突,完全冇,我唔識佢。

記︰你係咪掌摑個小三,有人玩嘢報警?

G︰我唔喺現場,完全唔知呢件事,唔回應嘞!(說罷匆匆收線)

與人哋男友似斷未斷的 Naomi,當然不會為一棵樹放棄整個森林。記者發現,她最近頻頻落夜場溝仔,還狂黐有錢蒲友。為愛情為上岸,看來她都主動出擊,絕不手軟。

Naomi挑機被摑

5月 4日晚, Naomi出席完電影《 Delete愛人》的首映後,便直踩 Patrick在銅鑼灣夜店搞的派對,向正印挑機。

Naomi到了派對不久,忽然發現有一道白光照住自己。

原來正印 Georgia發現 Naomi踩場,即時開了手機的電筒照着她,

Georgia當眾爆粗狂鬧 Naomi,罵她「死八婆、搶人男友、唔知醜」, Naomi被鬧喊爆。至於 Patrick就縮埋一邊,粒聲都唔敢出。

突然「啪」一聲,有人怒摑 Naomi, Naomi被打後呆立當場。

夜店老闆見有人郁手,上前調停。 Naomi怒極報警,警察即時到場了解事件,之後有關人士被帶返警署錄口供。

小三激鬥正印

Naomi與正印爭住在 fb宣示主權,正印更多次踩上 Naomi的 fb俾 like,十足小學雞行為。

正印自認老婆

正印 Georgia去年 12月在其 facebook大晒和男友 Patrick楊出席聖誕派對時合照,更留言直呼:「其實有人真係唔知瑋瑋(男友)係我老公」,又公開在男友 facebook留言叫 Cambell(暗指 Naomi,因有一名國際名模叫 Naomi Cambell)食屎。

叫正印放生

眼見正印公然挑機, Naomi不甘認輸,她留言話:「陪在身邊但心不在的男人,放他走吧!」明寸 Georgia阻住地球轉。

Naomi自稱「楊太」

Naomi不時在 facebook大晒和男友的甜蜜拍拖相,雖然見唔到男友,但就看到有「楊」字的擺設,又暗示該牙籤筒是楊太太專用。相信正印睇到實眼火爆。

正印網上踩場

發生掌摑事件後, Georgia對 Naomi到其主場酒吧踩場深感不忿,事發後多次在 Naomi的微博及 facebook俾 like,擺明踩場。

Naomi拒認輸

上周六( 12日), Naomi自爆鍾意挑戰難度,再次向正印挑機,講明自己唔會放棄,一定同正印鬥落去。

是非不絕

Naomi出道多年,一直是非不絕。除了做小三硬撬李思捷最為人熟悉外,其實她還有不少惹火事跡。

義助巴士救人

本月 10日,尖沙嘴發生騎劫巴士事件。當時 Naomi在下層即時幫忙報警,並用手機拍下過程。

撩正印春卷握手

去年 Naomi出席活動時,主動跟過氣情敵春卷握手合照,仲自稱:「我一路都想同佢(春卷)做朋友。」鬼咁好戲。

試戲報稱遭非禮

2012年, Naomi為林超賢執導電影《逆警》試鏡,疑似被工作人員非禮, Naomi終決定報警。

隆胸玩尿「谷」寫真

2012年 Naomi為寫真宣傳時,自爆做了隆胸手術,上圍由 B變 C。寫真中,她不但在透明摩天輪全裸,更疑似在摩天輪內小便。



鍾意就快D Share啦!