《失戀急讓》中，被黃子華飛的鄭秀文，因搵樓搬而遇上同樣失戀的地產經紀張家輝，一講起失戀， Sammi喊到眼腫，而家輝更情緒失控喊到收唔到掣。
真面目
喊分手 俾胡囧飛 車廂嚎哭 張家輝：好耐冇喊得咁勁
張家輝今年旺到七彩，早前先憑《激戰》攞過「香港電影金像獎」影帝，最近處男執導鬼片《盂蘭神功》又嚇到觀眾發惡夢， 49歲做乜都得心應手。
動作、警匪、鬼片乜戲都拍過，嚟緊 8月上畫新片《失戀急讓》，家輝罕有拍住鄭秀文及胡杏兒上演愛情小品浪漫，不過戲中家輝慘被女友胡囧狠飛，頂唔順伏在車廂嚎哭，喊到拆天睇見都心酸，事後家輝都自爆：「要清場先投入到！」
今個暑假港產片真係張家輝玩晒， 7月先有家輝首次執導的《盂蘭神功》於鬼節前搶閘嚇鬼，去到 8月尾，輪到家輝拍住鄭秀文同胡杏兒演出的新戲《失戀急讓》上畫，今次家輝轉玩愛情小品冧客。
爆喊一 take過
由卓韻芝執導的《失戀急讓》，話就話愛情喜劇，但其實套戲有不少慘情位，仲有好多傷心爆喊場面畀影帝張家輝發揮演技，尤其片中一場講家輝因冇能力買樓給空姐女友胡杏兒而遭狠飛後，再跟同是失戀的鄭秀文同車喊到收唔到聲，都算是演技大考驗。
查實呢場爆喊戲今年年頭喺中環大會堂停車場拍，一向工作認真的家輝，為免拍攝時分心，開機前下令除 Sammi、導演及攝影師外，其他人等一律生人勿近，禁止進入拍攝區內，長達一分鐘的嚎哭場面，最後家輝 1 take過搞掂，事後導演卓韻芝亦拍手大讚家輝做到她心目中的悲情感覺，不過卓導演爆料：「我嗌完 cut， good take之後，家輝即走過嚟同我講：『個導演好變態，喊到我頭都痛。』」
諗傷心史谷淚
近期動作、警匪，甚至恐怖片都拍過的家輝，拍該場嚎哭戲時亦要時間投入感情：「我好耐冇喊得咁勁！所以拍攝前我要醞釀情緒，當諗起曾幾何時遇上困難及失意時嘅辛酸即喊得出。」影帝背後， 49歲的張家輝曾因工作不順境而患上抑鬱症，辛酸血淚史一籮籮，喊戲點會難到影帝喎！
「葉劉」降呢做區議員
《失戀急讓》除張家輝及鄭秀文拍住演出外，最爆係搵到身兼行政會議成員和立法會議員的新民黨主席葉劉淑儀畀面客串，仲降呢飾演區議員叫「葉劉淑芝」。
唔好睇葉劉平時一臉嚴肅，其實好玩得，最近她便於 facebook留言：「我於劇中飾演一名區議員，有人問我是否『降格』了？其實答應客串，都是想盡一分綿力，支持香港電影工業，而且這角色都挺有趣，沒所謂」而導演卓韻芝大讚葉劉好專業，片中她竟自度一句自嘲對白「連自己髮型都捍衞唔到，點樣捍衞我嘅減蚊行動」，原來葉劉好幽默。有葉劉撐，幫到套戲定幫倒忙呢？
|
鍾意就快D Share啦！
|
|
|
