掃呢頁CODE去手機

2014年7月23日 星期三

[FACE 374] 麻煩王 辣㷫高層 李思捷《辣㷫王》未出先斬 李思捷,MF,




冇咗唔使死!(真實對白)

李思捷上週六( 19日)承認《辣㷫王》冇得出街,但又話自己有新構思,唔會死喎!

真面目

麻煩王 辣㷫高層 李思捷《辣㷫王》未出先斬

李思捷對自已演技一向有信心,去年玩整蠱嘅《玩嘢王》大受好評,更令佢自信指數爆晒表,實行全力以赴搞新作《辣㷫王》,更於去年節目巡禮中以重點介紹,擺明想大做。

但 14年過咗一半,說好的《辣㷫王》未見影,反而由王祖藍孭飛的《 Sunday玩嘢王》卻率先出街,全因李思捷過分自大,要單拖孭飛更要掛監製牌頭,大貪終於激嬲高層出事。

胎死

去年台慶大台重頭推《辣㷫王》,可惜李思捷過分大貪,真係辣㷫咗高層!

做過導演的李思捷一向要話晒事,自覺創意夠兼演技好,去年《玩嘢王》玩盡全台兼收視理想有 noise,諗住瞓身搞大《辣㷫王》。

霸埋監製名

但據知由於去年《玩嘢王》玩到個個一聽到李思捷大名即怕怕,《辣㷫王》要搵嘉賓及再創新玩法好難度,於是監製兼大台綜藝總經理何小慧則建議改做《扮嘢王》,由大整蠱變做老套扮嘢搞笑,李思捷當然唔肯就範。

據知情人士透露:「李思捷一聽要改做《扮嘢王》已經好唔高興,所以佢同何小慧講,成個節目一定要佢自己做晒,唔使要拍檔喎,佢仲要自己個名加埋落監製 title,何小慧梗係唔肯啦,所以咪叫佢唔使做喇,搵咗王祖藍同薛家燕頂囉!」

對於被何小慧飛出新節目,李思捷上週六( 19日)出席書展活動時,仍好有霸氣話:「我淨係收到個 WhatsApp,好似普通藝員咁叫我上去玩咋,我咪打畀祖藍問佢乜有呢個騷咩,就係咁!至於《辣㷫王》就未必會搞喇,我覺得大家未明白我嘅幽默感,可能我轉另一個形式,係做慈善去幫人,又一樣係好笑嘅,希望今年做!(聽講你要監製名先肯做?)我好想做多啲幕後嘢,我諗㗎嘛,我梗係想自己做晒佢啦,好正常啫,李思捷冇玩嘢王,唔會死嘅!」再追問李思捷點解咁想做 game騷,李思捷亦坦白:「你知唔知出面一個 game騷值幾錢,如果彈咗出嚟,我有排執呀!」說穿了,即係想獨食啫!

又扮嘢

唔預李思捷,大台亦繼續老套地扮鬼扮馬,搵王祖藍孭飛,整個《 Sunday扮嘢王》。新意呢?係零!(網上圖片)

監製火

週日( 27日)出街的《 Sunday扮嘢王》,由大台高層兼資深監製何小慧(右)製作,點會任李思捷想點就點!(網上圖片)

扮 Twins

節目除咗有祖藍同家燕姐,每集仲會有嘉賓參演,其中一集就搵咗欣宜加蝦頭扮 Twins!(網上圖片)

玩嘢勁

上年套《玩嘢王》由新晉監製王中濠(小圖)製作,結果由李思捷自己玩晒。《忽然 1周》圖片

上年拍完套《牛頭愛搭馬咀》後,李思捷再冇新劇拍。

一直有傳李思捷想飛起祖藍同阮兆祥獨食,三人亦因此不和。

大台老本唔怕食

汪明荃 又食飯

自從《志雲飯局》之後,大台好鍾意一路食飯一路吹水,之前有 May姐同秋生,嚟緊就輪到汪明荃主持,一樣的嘉賓,一樣的話題,大家一樣照睇!

巨聲 唱不停

內地《中國好聲音》大熱, now播第三輯,大台嚟緊翻炒《巨聲》第四輯出街,不過第三輯位冠軍廖仲謙影都冇埋,第四輯大家仲有冇期望?

爸爸 再出動

同樣因內地《爸爸去那兒》勁 hit,大台又整咗個《爸 B也 upgrade》由阿 Bob、胡諾言等人帶埋仔女齊齊抽水,今年再接再勵,準備 8月拍、 10月出街,即使被內地嘲笑山寨,但大台面皮厚實行抄咗至算。



鍾意就快D Share啦!