掃呢頁CODE去手機

2014年7月31日 星期四

[FACE 375] 厚多士仲可以畫幾耐?許許許 許許許,MF,




筆名許許許(原名:許智恩)

著作:《全城厚多士》

爆 Like王

厚多士仲可以畫幾耐?

香港地要做畫家維生難過登天,最近本土就出咗個許許許(係,個名叫許許許),半年間狂畫政治漫畫,代表作係厚多士姐,結果喺 fb召集到 16,000個粉絲,亦喺今年書展有書出。

許許許原名許智欣, 24歲青春少女、中大美術系畢業生。同好多藝術家一樣,許許許識畫唔識同人交際,卻去了做《明報》娛記,面對住要生活定要藝術嘅難關,她的作品多人讚,偏偏冇廣告商敢讚。不過許許許仍然死頂:「政治漫畫唔知可以畫幾耐,可能剩番唔係好多時間。」







Q:身為娛記(正職為《明報》記者)兼係政治漫畫家,點睇班星愈嚟愈親中?

A:我明白佢哋嘅難處,始終娛樂圈𠵱家同內地接軌。佢哋好多都要返大陸工作,唔可以發表自己感受,但譚校長嗰啲,我真係唔認同,仲有陳小春……佢好似脫離香港,已經變成大陸官員一樣,訓示我哋呢啲香港人。

小春簽名支持反佔中,而譚詠麟對於黎智英損錢畀泛民,他則在微博話:「自此人的集團在香港出現後,我認識的香港已變得不是我從前所識得了!」

Q:你會幫反佔中畫畫嗎?

A:佢可以搵第二個畫囉!反佔中好清楚,佢哋有錢可以做到幾百萬人甚至超過 1千萬人簽名都得。佢哋為所欲為喇!𠵱家喺香港,我唔知道仲可以畫幾耐,但我覺得可能唔係剩番好多時間可以畫!

Q:畫政治漫畫搵到食嗎?

A:因為政治漫畫很難找到廣告或者贊助,其實真係冇乜出路。 facebook入面有啲人都畫漫畫,佢哋嘅粉絲得我一半左右,但已有品牌搵佢哋畫畫。

Q:現實你好難同人溝通?

A:覺得自己好「毒」、好似毒男一樣,好難同人打開話題。所以會同人保持距離,可能藝術家係咁啩。

許許許特別為本刊畫咗幅馬賽跳舞圖,娛樂唔係佢強項,她自稱:「雖然我做娛樂記者,但其實同我性格有少少相反。」

許許許今年 2月先開始畫政治漫畫,半年間其 facebook有萬六位讚好,其著作《全城厚多士》第一批亦賣過了 2千本,成績算唔錯。

Q:讀中大藝術系點解會做娛記?

A:我要搵食㗎,我有好多同學日頭教畫畫,夜晚做捧餐添!

許許許畫作好緊貼時事,上週主場新聞執笠,許許許即刻畫咗張圖贈慶。

許許許另一撚手內容係講中港融洽,「我諗我啲作品係有啲歧視大陸人,因為佢哋真係好影響我哋生活。」



鍾意就快D Share啦!