網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2014年8月1日 星期五

[忽然1周 992] 爆家暴遭恐嚇 羅霖:想搵番個伴保護我! 羅霖,MW,




周三冷靜

周三( 30日)羅霖出席公開活動,再被大批記者追訪家暴事件。佢表現淡定,只係話要時間復原。

媽咪姐

爆家暴遭恐嚇 羅霖:想搵番個伴保護我!

作為女人,同時亦係一個阿媽,媽咪姐呢排見到一個接一個女藝人遭家暴,都真係心噏。講真,邊個唔想日日拖住老公仔周圍晒恩愛?對住鏡頭喊苦喊忽,唔通真係貪好睇咩?最慘仔女係無辜嘅,佢哋又點會唔知阿爸阿媽出咗事?無論被虐者,抑或施虐者,都係一場悲劇。

好似羅霖喺周一( 28日)出席自己有份投資嘅醫療中心開幕,突然感觸自爆兩年半前曾遭家暴:「唔係好犀利,我無還手,因為都唔識反應,之後我提出分居。我都唔想小朋友介入咁複雜嘅情緒入面,希望佢哋乜都唔知,只係知道爹哋、媽咪性格唔啱。」而前夫劉坤銘就回應指羅霖用家暴做宣傳,又話前妻講咗好多唔同嘅嘢,唔需要澄清喎。

周一含淚

周一( 28日),羅霖本來開開心心講開舖,點知講講吓眼泛淚光自爆曾遭家暴。第二日佢同記者講:「啱啱有屋企人離開,一時感觸,所以忍唔住講出嚟。」

《蘋果日報》圖片

上個月《忽周》先率先爆歌手可嵐遭老公打足四年,點知話咁快羅霖亦自揭曾遭家暴,唉!

女人真係要自強!

咁周三( 30日),媽咪姐就去咗搵羅霖傾吓,佢聽到前夫話自己博宣傳竟然都冇乜動氣,只係有啲眼濕濕咁話:「其實好想和平解決成件事,好心痛!我唔會攞啲咁羞家嘅嘢做宣傳。其實男人最基本嘅要求係承擔,佢誤導咗小朋友,因為呢啲唔係事實。尋日( 29日)囝囝陪咗我成日,同我講:『媽咪,我好錫你嘅!』我收到好多慰問電話,亦收到恐嚇 message。(係邊個 send俾你?)係識得嘅人,但唔可以講係邊個。我講嘅係事實,不過依家希望息事寧人,多一事不如少一事。只係希望可以搵番個伴保護我。(有乜嘢擇偶條件?)溝通到、心地善良。不過依家太忙,希望到年尾可以搵到啦。」

咦,依家都 8月,年尾就快到。媽咪姐都希望過埋今個月就 49歲嘅羅霖快啲搵到個伴, happy過 50啦。

初戀期

亞姐冠軍羅霖同當年嘅仁濟主席、富家公子劉坤銘,幾登對。唉,人生若只如初見。

蜜月期

96年,羅霖過無綫拍《真情》,憑「雙雙」一角彈起,但同年佢選擇嫁入劉家做少奶奶生仔。好 sweet呀!可惜,情深嘅「阿海」係電視先有。

硬撐期

2000年,劉坤銘因收購生意餘額未清而申請破產,羅霖跟佢帶住 3個仔移民新加坡生活。 01年,羅霖回流香港復出為品牌行 catwalk,之後幾年搞唔同生意。睇相見佢着住 5吋高踭鞋都要親手抱仔,仲要自力更生,辛苦!

假面期

依羅霖所講時間推算,家暴應該發生喺前年年頭,但當年 4月佢哋仲笑晒孖住去 event,依家睇番都咪話唔好戲。直至同年 10月羅霖被影到喺上海密會嫩男,先自爆夫妻 3月已分居。

網民分兩派

羅霖自爆家暴後,網民即刻變身「家事判官」。有人話唔明佢點解離婚先爆料,亦有唔少人話要支持遭家暴嘅女性企出嚟。而媽咪姐睇番羅霖同劉坤銘嘅舊相,由初相識到後尾貌合神離,只諗到兩個字:欷歔!

Hurt爆亞姐

講真,選美入行嘅女仔,除咗想做明星,另一個終極目標無非都係想搵個好老公,過啲無憂無慮嘅生活。之但係,現實邊有完美吖!除咗羅霖,仲有唔少亞姐試過遭家暴,條路點行落去,睇各自嘅造化嘞。

金慧英 姜皓文奇情

金慧英喺 94年選亞姐,之後火速識咗藝員姜皓文(黑仔)並同居。點知 98年黑仔暗撻另一藝員陳梅馨,跟住二女公開互數。而黑仔一時話會好好對待陳梅馨,一時又跪求金慧英。 99年黑仔借醉去金家認錯,但金慧英唔肯原諒,黑仔就打到佢口腫面腫。傳奇嘅係幾個月後,金慧英竟然笑晒嫁俾黑仔!上年,佢哋結婚 14周年,仲拍拖去「麼麼茶」島 sweet爆慶祝㖭。

黎燕珊 抗暴烈女

85年,黎燕珊參選第一屆亞姐奪冠。 87年,同拍《秦始皇》大紅嘅劉永合作《成吉思汗》,一拍即合, 92年結婚。但 00年爆出家暴事件,黎燕珊向法院申請禁制令,阻止劉永接觸一對仔女。 04年,正式離婚。 07年,黎復出幫亞視做節目主持,擔起成頭家。今次羅霖驚爆家暴,佢都話:「我係過來人,但只記開心事。我有小朋友,要多啲正能量。我做到,希望佢生活愉快。」

曹央雲 金屋夢醒

94年亞姐季軍,先後同前藝人麥翠嫻老公龔汝華及葉玉卿老公胡兆明傳緋聞。終於 03年為上市公司主席何永安生咗個女,之後生活富泰住山頂獨立屋。但富貴夢喺 09年何永安同女下屬生下孖仔後結束,同年曹央雲報警指喺屋企被打,面、口同手部受傷送院。之後佢向傳媒哭訴何永安棄養兩女,豪門夢碎。

《蘋果日報》圖片



鍾意就快D Share啦!