網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2014年8月22日 星期五

[忽然1周 995] 阿媽謙謙同住面左左 楊怡擲 700萬另築愛巢 楊怡,MW,




秘抽大角嘴

上月 12日,楊怡以口罩密冚靚樣,與楊母(左)秘密現身大角嘴奧朗•御峯銷售現場揀樓。當時她拿着銷售書,明顯準備入市。

娛樂喧

阿媽謙謙同住面左左 楊怡擲 700萬另築愛巢

楊怡與羅仲謙拍拖 3年,姊弟戀依然甜蜜煙韌,為方便見面,去年男方索性搬到女友與母同住的將軍澳日出康城單位。可是,未婚同居仲要同一屋簷下,老人家梗有微言。為免謙謙和母親大人朝見口晚見面尷尬,楊怡近日頻頻搵竇搬,上月中她先抽籤買大角嘴新樓奥朗•御峯,結果抽唔中,個多星期後再接再厲,扑槌以近 700萬買入紅磡城中匯。為與男友雙宿雙棲過二人世界,楊怡出錢又出力。







今個月 30日便 36歲的楊怡,自贏得視后後,事業心已擺埋一邊。眼見好姊妹張美妮嫁作幸福人妻,又心郁郁想像胞姐楊娜結婚產子組織家庭,奈何男友謙謙細自己五年還在事業衝刺期,想成為羅太,暫時只好等吓。

扮路過

遭踢爆抽樓後,楊怡扮晒輕鬆繑住助手離開,並死撐唔認:「我喺附近拍戲,順路嚟陪媽咪個 friend八下。」

《蘋果日報》圖片

即場開 cheque

同月 25日晚,失落大角嘴新樓的楊怡,再度出擊,一支公到紅磡城中匯揀樓。據知她睇中後即時開支票兼簽臨時買賣合約。

《蘋果日報》圖片

唔啱嘴型

熱戀期見少一日都唔得的楊怡和謙謙,為見多幾面,女方去年便「安排」謙謙遷入自己與母親同住、 2011年以六百多萬購入的將軍澳日出康城領都千呎單位。據知每當謙謙要拍通宵戲,楊怡都會做柴可夫,深夜駕車接男友由電視城回家,十分體貼。

不過未結婚就與「未來外母」同居,老人家自然多微言,加上相見好同住難,謙謙和楊母近兩個月已冇乜偈傾面左左。知情人透露:「其實最初阿謙搬入去住時,阿怡媽咪已經唔係咁鍾意,仲當住阿謙面前講,話不如行咗禮先。不過後生仔女唔會理呢啲,所以冇聽老人家意見。其實阿謙不嬲抗拒同女友同居,就算嗰時同 Theresa(傅穎)一齊,留到好夜都寧願辛苦啲由土瓜灣(女方寓所)揸車返大埔。雖然阿謙同阿怡已經住埋成年,但其實阿謙仲未慣,以前自己同阿爸住,着條短打就可以通屋走,依家就要着番件衫。最緊要係佢同伯母唔啱嘴型冇乜偈傾!近呢兩個月,如果阿謙早過阿怡返屋企,佢會柄埋喺房打機囉!」

位於紅磡寶其利街的「城中匯」,預計明年才可入伙,似乎謙謙要捱多幾個月先可以同楊怡過二人世界。

唔認抽樓

心思縝密的楊怡知道男友住唔慣,心急結婚的她思前想後,決定另覓愛巢和謙謙過二人世界,免得左右做人難。她更唔介意自己貼錢築愛巢,誓要私有化大隻謙。

本刊發現楊怡早前密密睇樓,專搵新樓盤,貪唔使點裝修,盡快可以入住。上月中,記者發現楊怡與母親均以口罩裝偕助手現身大角嘴新推樓盤「奧朗•御峯」現場揀樓。經紀們十分眼利,一眼就認出視后,人人爭住「招呼」她。據知當日賣樓現場反應熱烈,推售的百五個單位火速售罄,而由於楊的籌號是二百幾號,故有錢都買唔到。事後她卻否認自己入市:「其實我媽咪陪朋友嚟睇,我咁啱喺附近拍嘢有個 break,咪湊吓熱鬧之嘛!」楊怡對記者堅稱唔恨買樓,似乎她並唔想俾人知買樓一事。

車震後浮面

前年 9月,謙謙車醉爆楊怡返家時被拍得疑似車震。事後二人高調開記招澄清,此後姊弟戀便由地下情逐步浮上面。

早前楊怡一擲 80萬購入 Range Rover四驅車,她更經常駕此車在深宵接載男友。

扑槌買第二間

多年與母同住

出名孝順的楊怡,多年來一直與媽咪同住,但為怕兩邊做人難,今次才決定擲錢買樓築愛巢。

事隔個多星期,同樣戴口罩的楊怡又偕助手出現另一新樓盤紅磡「城中匯」。記者發現今次楊怡有備而來,亦預備了銀行本票,對買樓一事志在必得。據當日現場的地產經紀透露:「楊小姐一嚟到就問單位坐向,睇完睡房求其睇吓廚房就扑槌,即場開 cheque,好爽快。佢買嘅兩房單位差唔多七百萬,實用面積六百零呎,我哋問佢係投資定自住?佢笑吓冇答到。」唔夠兩星期便扑槌買第二層樓,可見楊怡求樓若渴。據知楊怡今次買樓原本打算孝敬楊母,讓她一個人住新屋。但楊母表明自己住了多年將軍澳,況且楊怡家姐楊娜亦同樣住該區,因此新屋很大機會會成為楊怡和謙謙的新愛巢。

唔夾口供

楊怡住開千呎單位,但為與謙謙過二人世界,不惜大屋搬細屋,更唔認買樓,但謙謙卻唱反調。日前他回應記者說:「我諗佢買樓係為咗投資啫!」似乎忘記跟女友夾口供。而作為新居男主人,謙謙卻十分口密:「唔係啩!」為與女友看齊,他亦坦言有意今年內置業:「要睇吓先,暫時好難買到 dream house,夢想係有泳池有花園嘅獨立屋,諗定人生大事都好正常。」先買樓、後娶妻,似乎二人結婚已在計劃之內噃!

貼心女友

楊怡與羅仲謙近年轉玩地上情,出席活動時二人都不避嫌講對方。楊怡更多次於人前對男友讚不絕口。愛得咁緊要,難怪她甘願為對方大屋搬細屋。

問准拍咀戲

早前楊怡與鄭嘉穎在新劇中有接吻戲。被問到拍之前要否問過熒幕男友馬國明先?楊即反應甚大:「要問都問肌肉男」擺明向男友大隻謙派定心丸。

讚有責任心

出席電台宣傳活動時,記者問楊怡謙謙是否最佳男朋友?她毫不猶豫答:「他很有責任心,好識照顧人。」嫁得過咁款喎!

宣傳錫住

去年 11月楊怡與謙謙一齊出席新劇宣傳活動時,男方被監製安排做單手掌上壓,楊怡無懼被噓都要維護愛郎:「唔使做去下個環節!」明錫住對方。



鍾意就快D Share啦!