2014年8月29日 星期五

[忽然1周 996] 周永恒帶女搵食 MW,




周永恒大個仔,喺拍攝現場𠱁到班 model好開心,已經唔係昔日嘅死𡃁仔。

媽咪姐

周永恒帶女搵食

周永恒( Roy)曾經都算係一個負面人物,關於佢嘅新聞都「大大單」。媽咪姐最記得佢醉酒鬧事、藏毒斷正、被判感化……不過人誰無過?最緊要知錯能改!依家 Roy不單係兩女之父,仲啱啱同港視藝人劉依靜合資開咗 model公司,閒時仲教吓唱歌維生,擔起成頭家,並唔係問題。







前排媽咪姐去旺角搵 friend吹水,見到 Roy帶兩個 model去一間韓國餐廳幫有線電視拍嘢。昔日做歌手被服侍嘅佢,全程好似爸爸湊女咁,幫 model check衫,做吓攝影師,好有老闆風範。佢同媽咪姐講:「趁後生梗要搵多啲錢,兩個囡囡開始大,好多開支㗎!」第二朝見佢同老婆阿 Yu(趙梓淇)又準時推住兩歲細女愛希,去接 4歲大女信希放學。雖然呢日橫風橫雨有啲呢 hea,但一家四口真係樂也融融。浪子回頭,媽咪姐最欣賞。

今年初, Roy升呢為 model公司老闆,投資咗 20萬,所以佢乜都親力親為。同客戶(右一)合照,指定動作

做父母真係唔易,晨咁早, Roy同老婆就要排隊接女放學,冇得打尖㗎!

接完女,阿 Yu仲喺天水圍街市買埋餸先返屋企。不過個街市咁企理,呢個城市都唔係好悲情啫!

有得有唔得

明星難做,如果有本錢,都係開公司着數,好似施念慈同 Mandy Lieu咁靚女,都開 model公司搵後路。不過賺唔賺到錢,都要睇實力!

施念慈

昔日係港大校花嘅 Celia,工作上冇乜代表作, 09年轉型開 model公司「 Jacso」,最勁係捧紅咗 Da Da陳靜。

Mandy Lieu

《蘋果日報》圖片

Mandy Lieu雖然靚,但拍拖多過開工,舊年 8月佢毅然開公司「星潮娛樂」,暫時力捧嘅多數係來自韓國同日本嘅模特兒,表現唔算突出。



鍾意就快D Share啦!
Related Posts Plugin for WordPress, Blogger...