掃呢頁CODE去手機

2014年8月7日 星期四

[壹週刊 1274] 分店預埋李亞男 王祖藍荃灣賣雲吞 祖藍,李亞男,王祖藍,M1,




日前王祖藍帶同媽咪,以及大隻佬麵家老闆(右一)去荃灣睇鋪位。

探熱針

分店預埋李亞男 王祖藍荃灣賣雲吞

雖然曾有過與友人合作開糖水鋪,最後蝕百萬收場的慘痛教訓,但事隔數年,王祖藍決定捲土重來,夥拍大隻佬麵家老闆開雲吞麵店,日前他帶埋阿媽去荃灣睇鋪位,為在飲食界東山再起做準備。準藍嫂李亞男表示,等麵店有錢賺,她會入股計劃中的將軍澳分店。開鋪做老闆娘,李亞男睇定嚟「食」!

帶阿媽睇鋪

開鋪做生意,地點人流是關鍵。王祖藍日前母子咇到荃灣德華街一帶巡鋪,拍檔大隻佬麵家老闆賴義芳早已在場守候,一行人走入一個約千呎地鋪,裡裡外外周圍睇,之後祖藍更駐足鋪外,觀察人流。

之後三人跟隨經紀返地產公司,了解附近一帶其他鋪位,再一同返回旺角大隻佬麵家,邊食邊開會。

「想做雲吞麵,預算要投資過百萬,因為好多地鋪啲租都俾金鋪同藥房搶貴晒,要先找到地點租金啱嘅鋪先開。」王祖藍對身邊人說。

據了解,王祖藍跟大隻佬麵家是老主顧,與老闆相識多年。

「由細幫襯到大嗰隻,連祖藍媽咪、舅父都係熟客,平日工作忙,冇乜同其他親戚見面,但去到麵店,祖藍透過老闆就會知道大家嘅近況,可想而知有幾熟。幾年前搞糖水鋪蝕錢,祖藍明白力不到不為財,所以佢今次會睇緊啲,加上對拍檔有信心,所以亞男都話唔介意男友攞咗啲老婆本去投資。」

去完荃灣睇鋪位,祖藍和媽咪去旺角大隻佬麵家繼續傾投資大計,王媽媽仲打包離去,唔通拎俾亞男食?

李亞男希望祖藍稍後在將軍澳開分店,方便無綫同事幫襯。

將軍澳分店

對王祖藍再闖飲食業搞生意,李亞男決定睇定嚟食!

「等佢試吓先,最重要唔好蝕錢,唔好衝動,如果 OK,開分店我都會投資。我同祖藍一樣諗法,再開嘅話會喺將軍澳,方便同事食碗麵 gathering。」李亞男說。

上週五(八月一日),記者與到電台做訪問的王祖藍面談。

壹:記者

王:王祖藍

壹:你準備喺荃灣開雲吞麵店?

王:呀……我睇吓啫!

壹:係咪同大隻佬麵家老闆合作?

王:我好朋友,(佢係)我好朋友,未知道,周圍睇吓咁

壹:之前開甜品鋪蝕大本,今次怕不怕?

王:哈……我對佢(拍檔)有信心嘛。

壹:李亞男會幫手?

王:我自己生意。

有指王祖藍和亞男明年會拉埋天窗,李亞男可以擔定櫈仔做老闆娘!

王祖藍和薛家燕的《 Sunday扮嘢王》收視甚佳,二人異口同聲稱見好就收,暫未考慮添食。

王祖藍和李亞男傳明年結婚,祖藍開麵店,未來老婆當然是老闆娘啦。

王祖藍直認去荃灣睇鋪位,又謂對投資拍檔有信心。

早前王祖藍完成《老表,你好 Hea》的拍攝工作,可以有較多時間籌備開雲吞麵鋪。

大隻佬麵家

王祖藍的拍檔大隻佬麵家老闆賴義芳,店鋪前身是在黑布街經營了三十年的龍記麵家,以牛筋豉油王撈麵、豉油王炸醬撈河和雲吞馳名,老闆一身健碩肌肉,是鋪頭嘜頭。王祖藍是常客,每逢有新戲、新劇出街,店內都會貼滿宣傳海報,認真撐場。

舊店去年七月租約屆滿,店主龍哥退休,直到今年十弟賴義芳在舊鋪對面改名開新鋪,重出江湖。一批名人熟客,包括狄龍、王祖藍、林子善、鍾嘉欣、黃子華等,都有幫襯支持。



鍾意就快D Share啦!