【仍想追個仔】徐淑敏明日入院生女 考慮再追「慈姑椗」：追個仔圓滿啲
2014-07-31 23:15:00
Suki聽日就會入院生第三胎，今胎都係女。
現年29歲、已經係兩女之母嘅徐淑敏（Suki），聽日（8月1號）將入院生第三胎，雖然腹中再懷囡囡，追仔唔成功，但Suki仍然期待小B女出世。佢今日趁入院前，同老公黃浩（Kenny）去到中環撐枱腳，撇低兩個囡囡過「三」人世界。
肚大如籮嘅Suki同老公外出搵食，不過佢行動非常緩慢，Kenny體貼傍實，同行仲有黑人保鑣。
Suki有過兩胎嘅剖腹經驗，所以生產前心情輕鬆，佢今昨日喺電話受訪表示：「我希望BB快啲出嚟，今次我陀得冇咁輕鬆，始終年紀大咗，聽日入院要帶嘅嘢我都執好晒。」
Suki連生3個囡囡，日前表示話要封肚，但0依家有意改變主意話：「睇吓自己能力再決定。」
會唔會考慮到外國選擇性別人工受孕？Suki話：「我會考慮o架，追個仔圓滿啲，我接受唔到生四個女，o依家屋企都成屋女人啦。」
Suki生完就要留家坐月，所以Kenny今日特別帶老婆出外用餐。
下月牛一嘅Suki，到時剛剛坐完月，老公Kenny已計劃獎勵帶佢出埠旅行，Suki期待話：「我同老公，仲有細女都係同月生日，生完就可以一齊慶祝啦。」
Suki同黃浩的四人家庭，將再添新成員，恭喜恭喜!
早前Suki襯大肚時留倩影。
Suki今日趁入院前，同老公黃浩去到中環撐枱腳。
隨身仍然有黑人保鑣。
|
鍾意就快D Share啦！
|
|
|
