已於上週三（ 23日）開播的《沒關係，是愛情啊》，由影帝趙寅成同視后孔孝真合演，講推理小說作家同精神科醫生嘅愛情故事。《沒》劇已於上週播到第 2集，最高收視為 9.3%，輸少少畀同時段嘅《命中注定我愛你》 9.7%。
韓飯台
邊拍邊播冇得唞 孔孝真撞完車復工好辛苦
韓劇特色之一係邊拍邊播，可以因應觀眾反應隨時改劇本，如果反應好，隨時添食加集數。
不過，着數就電視台攞晒，做演員嘅，萬一途中有乜頭暈身㷫，都要死頂趕住出街。
早前，允兒男友李昇基拍劇時被道具刀插傷眼，都被迫負傷開工；最近輪到韓劇一姐孔孝真，上月尾拍緊新劇《沒關係，是愛情啊》，期間發生車禍，唞咗唔夠一星期即要復工趕戲，意志力薄弱啲都真係唔好做韓星。
車禍後，我每次瞓覺，瞓唔夠 10分鐘就醒，對坐車同揸車感到恐懼。我左手同腿部受傷，接受外傷治療同時，亦接受心理治療。當時我因為受傷仍要去拍戲，我覺得好大壓力，而且好難受。好彩得到醫生鼓勵，我先有信心會做得好。最近孔孝真出席新劇《沒關係，是愛情啊》發布會時，講出車禍後感受，聽到都戥佢辛苦。
唞得 1星期
的而且確，唔到孔孝真覺得壓力大，事緣上月 19日，剛剛開拍《沒關係，是愛情啊》的孔孝真，收工後坐車返歸途中撞車。雖然冇生命危險，但真姐慘被撞到左腳受傷，而且左手骨折，即被送去醫院檢查，經醫生診斷後，醫生建議真姐要休養一個月先可以完全康復。
但因真姐是劇中女主角，加上《沒》劇啱啱開拍，如真姐依照醫生吩咐休養一個月，拍劇進度一定受阻。加上電視台一早安排好真姐同男主角趙寅成一齊去沖繩的外景，飽受壓力的真姐，最後迫住休息一星期，便負傷飛往沖繩開工。據知真姐到𠵱家左手及左腳仍有餘痛，最慘係精神亦同樣受創，睇怕復康之路都會幾漫長。
EXO佔領韓劇
韓男天團 EXO，橫掃完韓國樂壇外，新目標就係入侵韓劇界。新劇《沒關係，是愛情啊》，樣生得勁 cute的成員 D.O，首次以演員身份參演《沒》劇，成為 EXO拍劇先鋒。除此，佢嘅隊友 Chen仲唱埋該劇主題曲，各成員一步一步攻入劇界。
SBS大台抄老外？
每逢韓劇出街前，都會推出一批海報做宣傳，早前《沒》劇男女主角趙寅成同孔孝真亦破格拍攝情慾海報， 2人只用布蓋住身體，互相攬實對方。原本感覺好 sweet，點知睇真啲，海報概念同兩年前安妮夏菲維及積嘉倫賀電影《愛情戀上癮》海報有 9成似，只係遮住身嗰張被唔同顏色。原來唔只香港，連韓國 SBS咁大的電視台都鍾意抄老外。
|
鍾意就快D Share啦！
|
|
|