掃呢頁CODE去手機

2014年8月6日 星期三

[FACE 376] 唐文龍講番《人生馬戲團》思琦妹畀人點錯相 唐文龍,思琦,MF,




'08

紐約 Fashion Institute of Technology畢業,做過 model,入娛圈 20年嘅唐文龍一直都 keep住大隻,原來唐文龍自小六已開始操肌,「小學 6年班去咗美國讀書,點知畀啲鬼仔恰,咪放學自己去體育室度練囉,後來就習慣咗做 gym。我又無特別戒口,因為本身唔食肥膩嘢,所以身型都叫做 keep到。」《蘋果日報》圖片

全知言

唐文龍講番《人生馬戲團》思琦妹畀人點錯相

「失蹤」藝人近年紛紛回歸復出,有啲話因為技癢,有啲為錢,不過大部份出番嚟都無令觀眾失望就真。講開回歸,曾幾何時唐文龍都算係電視台當紅小生,加上 keep住操肌,一直都有唔少 fans期待佢回歸。查實唐文龍入行 20年,電影、電視劇拍過唔少,原來佢 8年前離開咗香港北上發展,今年先回歸,全知言都搵佢傾咗幾句。 44歲唐文龍話:「入行拍電影係 94、 95年,咁就 20年。嗰時仲用緊菲林,每一下『格、格』聲嘅菲林聲就好似計時炸彈,好緊張㗎!嗰時心理壓力好大。」

99年以新人姿態加入大台,拍慣電影嘅唐文龍都用咗好長時間去適應。「拍劇時間好長,個人真係好攰。最記得喺番禺拍《人生馬戲團》,當時因為楊思琦生日去唱卡拉 OK,可能俾人點錯相,半夜 3點見到啲人又刀又棍咁衝埋嚟,雖然我中學短跑都係 3甲,但真係未試過着住拖鞋可以跑得咁快,我夠膽講係我人生跑得最快嘅一次,嗰個畫面真係拍都拍唔到出嚟!」

喺國內撈咗 8年,唐文龍話回歸唔係因為撈唔掂,只係掛住香港,「屋企人移民咗去美國,佢哋每次返香港我都喺大陸,見唔到面。返大台?如果劇本啱,我都會返,不過我想電影行先。」

94

曾經係華星嘅一份子,當年唐文龍就被古天樂、陳奕迅夾住一齊影賀年照。《蘋果日報》圖片

'06

06年拍《人生馬戲團》,因為被點錯相而鬧出鍾嘉欣同楊思琦被擄走事件,今日唐文龍仍堅稱話佢兩個無唔見到,但真係有一班人帶行「架生」追住佢哋嚟打囉!

08

08年曾經為亞視拍過《火蝴蝶》,同李彩華做情侶,艷福無邊。拍完《火》劇就去咗內地發展。

'13

喺內地雖然唔係大紅,但都劇接劇,上年就喺霍思燕嘅《愛情面前誰怕誰》同實力演員趙芮演一對。網上圖片

'14

唐文龍正式回歸香港,被影到同 DaDa師妹羅子喬去圓方睇戲,佢仲教羅子喬詠春,不過佢兩個死口唔認拍拖,只話係朋友。圖片



鍾意就快D Share啦!