梁思浩
全知言
一人一個最想佢消失於 電視螢幕的大台藝人
香港畸形，一台獨大，來來去去都係嗰啲藝人，老甘草更加只得小貓幾隻，唔好話全知言睇到反眼熄電視，其他觀眾一樣睇到火滾。
呢個 moment，有冇邊個大台藝人，你最想佢消失？
樂易玲
梗係樂易玲「樂大媽」（佢唔係藝人喎？）佢以前都喺邵氏做過藝人㗎！大家見到啦，自從佢入咗大台之後，大台就冇運行喇，佢呢條叫劏豬凳命呀！如果大台炒咗佢，肯定好多藝人免費返大台拍劇。其實觀眾會係最大得益囉！如果樂大媽真係要轉行，我都幫佢諗好喇，轉行做睇相。嗰時佢同我講：「我𠵱家炒你，你唔驚啦，你出面咁多嘢做。」真係畀佢講中，我𠵱家真係好多嘢做喎！我鍾意 TVB㗎，係唔鍾意樂大媽之嘛！
譚耀文
羅蘭姐真係一個好好，超級嘅演員，超級嘅影后。曾經美麗，絕頂性感，現在戲路縱橫，所以我覺得好多電影係等住佢去做嘅，好多好有火嘅老人家角色，媽咪嘅角色，等住佢去幫我哋電影出一分力，去救市。
張文慈
我想係琴姐囉！因為琴姐係一個好好好好嘅藝人，我知道佢身體狀況，呢個年紀，我希望佢享清福，可以好好保養佢嘅身體。
艾威
我希望就唔係消失，而係希望佢退休，安享晚年嘅呢，就係夏萍姐！佢喺螢光幕前表現得非常之活潑生猛，但佢一離開咗個鏡頭，佢係好需要啲後輩去照顧佢。你知道佢又唔係做主角嘅位，好多時會將拍攝嘅場口擺到最後，或者（要佢）一早要返工比嗰啲主角多啲時間休息，咁對佢呢啲老人家嚟講係辛苦咗少少。
街坊大膽鬧
要同行評論同行真係唔係個個敢，大眾市民就冇負擔，花旦小生通通照鬧。
陳女士：「沒女」 Meggie
「沒女」！我覺得好討厭囉，我一見到就想轉台，無論主角、導師都係！首先好負面啦，同埋佢哋好誇張，導師又好惡，覺得好似做戲咁，好假！我淨係睇過第 1集啫，嘩，嗰個 Meggie，真係好唔想睇到佢。
黃爸爸： Bob
阿 Bob就麻麻喇！成日都係見到佢。唉，見到佢嘔呀！口才普通仲有個莊思敏麻麻呀！嗰個節目我個女成日睇㗎，好做作呀！
黃小妹妹：阮兆祥
阮兆祥佢扮女人嗰陣時塊面好圓，好好笑，不過又好核突囉。
|
鍾意就快D Share啦！
|
|
|
