網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2014年8月27日 星期三

[FACE 379 專訪] 男人唔可以大蝦細 重提狼吻 陳嘉桓:唔敢識新朋友 陳嘉桓,MF,




真人騷

男人唔可以大蝦細 重提狼吻 陳嘉桓:唔敢識新朋友

話說《男人唔可以窮》下月上畫,約第二女主角陳嘉桓專訪,地點選在一間傢俬陳列室。

她一見成櫃迷你 designer chair就興奮,話要買番去俾自己個 Barbie坐。

我笑她:「咁大個仲玩 Barbie?」

她回答:「我儲埋儲埋成屋都係!玩玩具都幾好,可以減壓。」

雖則生得牛高馬大、出道成五年,陳嘉桓其實大極有限,現年 21歲。即是話三年前發生狼吻事件時只得 18……兩位有家室的老狼加埋 80幾歲,夾埋蝦個仲玩緊 Barbie嘅細路女,兩個字:極醜惡!

話時話,年紀極輕,身上還揹著曾經弄得滿城風雨的負面新聞,一般經理人公司的做法是,點都要搵個人傍住,就算不擋掉記者不該問的問題,起碼也要監場適當時提點。陳嘉桓讓我很訝異,竟然一個人揹着一大袋衣服鞋子就來應戰。睇怕三年前一役,毀了她形象卻也促成她的快熟,讓經理人公司放得下心,一般訪問實屬碎料,完全可以一個人應付。

「細個唔會諗太多,以為大家同行……嗰件事以後,我最大改變係唔敢再去識新朋友,時時刻刻都對人有防備之心。」

一個晚上,足以讓花樣少女對世界的美好憧憬幻滅,卻也讓她從此認識世途險惡學會保護自己,這麼看,兩隻老狼其實功德無量做了好事,要俾個讚!








可以提,不過忘記了

三年前件事可以提嗎?

嗯……其實都過咗去咁耐,我冇再考究。

當時父母一定很傷心、很生氣吧?

係真嘅,屋企人好唔開心,嗰件事又帶出好多新聞連累咗全家。我啱啱入行時見到娛樂新聞會嘩嘩聲:「嘩!乜咁都得?點解嘅?」𠵱家學識代入同行角度睇下件事,會諗下自己當初點過,有相唔代表有真相,背後好多嘢外人未必會知。

如果我係你父母,會想捉兩隻老狼打兩巴!

唔記得喇……哈哈……做人,都係大方啲好。

明明是受害者,竟然因此破壞形象、影響近年發展,難過嗎?

開頭都會,聽埋聽埋好多,網上報導同評論更加連睇都唔敢睇。慢慢,明白咗一個道理,我能力再大,都冇可能令全世界瞭解我為人,惟有係盡自己能力,第時做好啲。演好場戲、行好個騷,人,最緊要知道自己喺邊度做錯過,下次唔好再犯。

咁嗰件事,你學到啲乜?

嗯……最大改變係,我唔敢去識新朋友……細個時冇諗咁多嘢,覺得大家都係同行……𠵱家我好小心,朋友聚會一定係局限喺班舊朋友當中。有時如果朋友話有人會嚟,我都會話唔好,寧願唔去。對外人多咗防備之心。同一件事,亦都令我明白輿論威力、見識到呢行係點運作、同埋一張相可以有幾大影響。所以𠵱家就算同自己朋友出嚟玩,都會好留意附近有冇人影相,如果怕人哋執相執走大班朋友引起誤會,咁我咪盡量群住啲女仔玩囉。

曾說過,給自己五年時間

16歲入行時,話過俾自己五年去試,話咁快己經五年。

係呀,開頭唔知自己係唔係真係適應呢行,想俾個時限自己行下、試下。

結果呢?

都適合嘅,越做越覺得自己未夠,越學越想學多啲。我舊年拍咗《男人唔可以窮》同《販賣愛》,第一年嘗試做文戲唔再係打女。我唔識游水,但係報咗名去學潛水,唔識踩單車,但排緊期考電單車牌,前排去客串電影,又第一次學開槍……呢行啲錢唔易搵,太大壓力,有時遇上新事物、學識新嘢嘅成功感可以平衡壓力,私底下我玩 Barbie、畫畫、學空中瑜珈又係想抒緩壓力。啱啱入行時唔識減壓,遇到有事就匿埋屋企。同我養狗一樣,隻狗被鎖起得耐,都會發癲都會爆煲,人一樣,要搵方法去抒發壓力,唔係匿埋就得。

3歲

6歲

《忽然 1周》圖片

15歲

16歲

17歲《葉問前傳》

18歲、前經理人兼媽媽 Ronnie(圖右)

壓力嚟自邊度?

除咗新聞,仲有拍戲。啱啱入行,試過一個 take要 NG三十幾次,累街坊搞到隊 crew俾說話我聽。去大陸拍戲,人哋個個科班出身,會嫌棄我呢啲唔係讀專科,靠個樣。去到片場,人哋嬴在經驗,我呢,無論做戲定做人經驗都輸人一大截……冇嘅,唔識咪去學囉,唔夠好,我就會事前做多啲功夫準備好啲。香港演員冇專業文憑,但係每個都有自己特色,嬴就嬴在特色。

五年過去,有給自己訂下一個目標嗎?

成日有人咁問我,我細個時都會講目標,𠵱家冇囉。學識冇嘢重要得過平常心,唔好睇得失成敗太重要。好多人訂個目標俾自己,就會眼裡只得個目標,不擇手段踩住人上。我寧願順其自然享受過程。我好鍾意旅行,不過𠵱家都淨係去得起東南亞、日本、韓國,我嘅目標係搵多啲錢,要玩遠啲!享受多啲!

搵男友,最怕人嫌我高

你都好鍾意玩喎?

係呀,我儲咗好多 Barbie,去第二度旅行一定要買特別版,有個朋友做空姐,佢返親嚟都會帶俾我,所以我成日山長水遠走去機場接佢收工。我又同細佬一齊買咗迪士尼年票,有時落住大雨都會走轉入去,行街買嘢都夠開心。有時俾人影到我同男仔着情侶裝……其實根本就係大班朋友一齊玩,我哋去迪欣湖野餐、去離島、去 Hello Kitty農莊都會約好 dress code,所以咪會着埋一樣嘅衫囉。

所以俾人影過嗰啲都唔係男朋友?

唔係啦,我好耐無拍拖,好耐都冇遇到過有男仔可以發展……成班朋友,明明我年紀最細,但係心智最成熟又係我。佢哋蕩失路會企喺條街喊,係我教佢哋點做。佢哋遇上咩事,都要我俾意見。我早熟過班朋友太多喇,有時夜晚喺中環收工,見到啲女仔夜媽媽化晒妝、着晒高踭鞋、仲要好少布咁,啱啱至出動,我就會喺度諗……咁嘅年紀仲去玩?

20歲

21歲

《男人唔可以窮》黃宗澤

咁嘅年紀梗係玩點解你 21歲講嘢似 31歲?

係呀,我啲朋友都係咁話我。但係日頭都朝九晚五囉,夜晚又化妝又飲酒,第二朝起身再返工……你唔覺得咁樣過日子好快殘咩?有時我睇 Instagram,碌落去,個個都係炫富、個個都喺夜店、個個喺度晒一晚開咗幾多支酒、枱頭有幾多空樽。喂,啲錢使咗就冇㗎你哋一晚開酒嘅錢,夠我去一轉泰國喇!個個夜晚都係一樣嘅生活,好有趣咩?我唔係唔憧憬愛情,我係覺得就算結咗婚都有機會分手,你估真係做戲咁做分一半身家俾你咩?不如都係自己搵多個錢傍身好過。

所以你搵男朋友要唔窮、唔愛蒲,仲要高得過你?

男仔人窮可以,但唔可以志窮。未夠 30歲未玩夠嗰啲,真係唔啱。至於高度,呢樣最難,我驚人哋嫌我高( 178cm)咋,因為我 21歲都仲高

緊……

人靠衣 裝靠人

前幾個星期拍殘廁 Coffee,形象師說找服裝時被大小牌子拒絕,我可以理解。這週輪到陳嘉桓,竟然又被不少品牌 say no,說是從三年前開始形象負面……實在納悶:甚麼時候開始受害者會變得被人嫌?難道破壞形象的不是兩隻老狼嗎?

本來的失望,不多久後就一掃而清,因為拍攝結束,陳嘉桓的表現沒有讓我失望。到底是人揀衫還是衫揀人?是人靠衣裝還是衣裝靠人?我認為耀眼而亮麗的永遠是人,不會是來自那身衣服。



鍾意就快D Share啦!