掃呢頁CODE去手機

2014年9月5日 星期五

[忽然1周 997] 李秉憲 起雙飛出事喇! 李秉憲,MW,




韓氣逼人

李秉憲 起雙飛出事喇!

韓國藝能界近排真係厚多士,繼「優質偶像」金賢重打傷女友被提控後,連舊年先同《別有用心單身女》女主角李珉廷結婚嘅李秉憲都瀨嘢!

根據韓國警方透露,月前接獲經紀人公司報案,話 44歲嘅李秉憲遭兩名 20代女性 A( 21歲)同 B( 25歲)勒索 50億韓圜(約港幣 3千多萬)。周二( 2號)證實, B女唔係藝能界中人, A女就係四人女子組合 GLAM成員金多喜。而其所屬經紀人公司亦證實佢同單案有關,但未聯絡得上金多喜。

據知兩女月前喺一個聚會上識咗李秉憲,當晚就跟佢返屋企飲酒,之後就用手機拍錄李酒後「亂性」畫面。上周四( 8月 28號),兩女以所拍照片同短片向李秉憲勒索,而李生即刻通知經紀人公司報案。

咁呢,李生發言人話嗰批相係普通合照,不過如果係咁普通,又點攞去勒索呢?一直有傳係韓國藝能界「大玩家」嘅李生,今次都係有排搞喇!

李秉憲屬韓國阿哥級,仲拍過荷里活片《義勇群英:毒蛇反擊戰》,升呢為國際藝人。原定周三( 3號)嚟香港同容祖兒、古巨基一齊出席英皇鐘錶活動。依家出事,梗係嚟唔到,佢仲親自打俾英皇老闆楊受成道歉。

李珉廷下嫁李秉憲時,曾有人擔心李珉廷能否 hold得住「大玩家」李秉憲。如今 32歲嘅李太唔知會唔會後悔嫁錯郎!

有傳言當年宋慧喬係抵受唔住有人愛玩 SM,故最終與李秉憲分手。

金多喜隸屬 Bighit經紀人公司, 2012年隨女子四人組合 GLAM出道,為隊中主唱。 13年曾與當紅嘅姜河那合演音樂電視劇《 MONSTAR》(下圖),飾演金娜娜,因角色討好贏得口碑。估唔到會搞單咁嘅嘢!



鍾意就快D Share啦!