[壹週刊 1280] 打好份工 陪老婆湊老豆 陳奕迅直落做廿四孝 陳奕迅,M1,

Eason近年四圍飛做巡唱，上週四難得有時間同父親到維園漫步傾心事，陳裘大全程笑容滿面。

探熱針

打好份工　陪老婆湊老豆　陳奕迅直落做廿四孝

逢星期五、六、日北上巡迴演唱，唱到變「陳永安」的陳奕迅，月前在台灣宣傳國語碟期間，公開預言 2016年暫別樂壇。

無論是自行性幻想抑或有計劃進行， Eason先要回歸現實，繼續做好呢份工！本月初，在瀋陽開完六萬人演唱會後，終於有機會回氣。所謂私人時間， Eason全奉獻給家人！上週四（ 11/9）孖住父親陳裘大殺落徐濠縈位於銅鑼灣鋪頭，搵老婆食個 late lunch，再陪老豆散步去維園睇「香港網球公開賽」，廿四孝老公同仔，一鋪搞掂晒！

家庭樂

下午三時，陳奕迅現身於銅鑼灣有嘢賣又有嘢食的潮店「 Gum Gum Gum」，去到邊吹到邊的他，在店鋪門外同店員不停講，至於當日亦有同行的陳父陳裘大和 E神嫂徐濠縈，則在餐廳霸定枱，坐低歎住冷氣慢慢等吹神回歸，其間兩翁媳有傾有講，證明關係並不如外傳般差。

食碗麵，唔使一個鐘已經停晒手，食飽煙癮起， Eason再次走出門外歎支飯後煙，店員把握機會，拎住大堆 CD給他簽名。

三人行撐枱腳後，陳奕迅兩父子先行送徐濠縈離開。

Eason外出扯煙期間，徐濠縈留守店內同店員合照。

平日大癲大肺的 Eason原來都有細心的一面，陳爸爸背包走位，孝順仔馬上幫手整理。

唔識路

雖然是家庭日，但 Eason心情好，所有要求都冇托手踭。做完 PR，兩父子送徐濠縈返一街之隔的時裝店後，再漫步朝維多利亞公園方向行。其間見老豆孭住的背囊移了位， Eason即上前動手執番正，超細心。

行到去維園，大汗疊細汗的 Eason一臉迷惘，只見他打電話問路，經對方指點後，終於搵到舉行「保誠香港網球公開賽」的場地，並跟大會工作人員聯絡上取得入場證件，原來是日 Eason父子專誠睇女網球手好友、有中國金花之稱的彭帥比賽。

吹神在球場出現，即時惹來一陣哄動，網球賽變 Eason快影會，陳裘大第一時間閃埋一邊等，最終擾攘超過十五分鐘，到球賽差不多開始， Eason才甩到身。

Eason現身維園球場，吸引不少歌迷上前要求合照。

入到維園網球場， Eason向大會工作人員介紹認識陳父。

今年七月陳奕迅一家三口到英國度假，兼慶祝生日。

有排唱

早前到台灣宣傳國語碟， Eason自行幻想暫別樂壇，聽住先！

All cash買完二億大屋， Eason密密巡迴補倉，唱到有氣無掟抖。七月去台灣宣傳國語大碟《 nice& shine》時， Eason忽然宣布完成唱片合約後，一六年停工休息。

「世界太大，我要去闖一闖，但我不是一個堅持的人，所以今次請聽眾作見證，如果有什麼公司開銀彈叫我簽約，我都會跟它說不簽。」 Eason自說自話。

一身廣告代言合約，怎可能說停就停，經理人陳家瑛馬上出面澄清，解釋只是減產不是全面停工。不過亦有指 Eason要同老婆創業，並孖住好兄弟謝霆鋒合資搞音樂製作公司。

滿肚密圈，但講乜都假，「陳永安」的巡迴演唱排到去一五年，有排唱！

鍾意就快D Share啦！

下一篇 》