《戀上春樹》
上映日期： 9月 11日
染谷將太話見到自己着襠布都好難為情，難為女主角長澤正美，喺戲中被成班襠布男圍住，佢話尷尬到要不斷傻笑遮醜。
東瀛團
馬明學嘢 正版天然呆
人性就係咁，食得鮑參翅肚多，點都想食吓麥當勞。
睇靚仔同一道理，日日見住班大隻佬，點都會滯，偶爾發現一啲傻更更戇男，更覺得佢哋可愛。
將於今月 11日香港上畫的新戲《戀上春樹》男主角染谷將太，戲中扮毒男追女神長澤正美，着住襠布周圍走，笑死人。童星出身的將太，特徵係雙眼無神似瞓唔醒，個樣傻夾戇，同馬明一樣係「天然呆」，但日本妹 like佢似加菲貓咁可愛，而且最緊要有演技，將太 4年前已攞過威尼斯影展「最佳新人獎」，其實戇男都可以好猛料㗎！
《戀上春樹》點解會搵染谷將太孭飛做男一？
《戀上春樹》其實係改編自日本暢銷小說《哪啊哪啊神去村》，小說裏男主角平野勇氣係一個讀書唔成，又傻更更嘅毒男，所以導演三浦紫苑第一時間即諗起染谷將太。一來覺得染谷本身有「天然呆」特質，加上個樣傻得似加菲貓，更重要係染谷本身好有幽默感，所以覺得染谷最適合。
戲中染谷經常着住襠布周圍走，有冇尷尬？
染谷自稱最初真係好尷尬，去照鏡時都唔敢望，同埋工作人員幫佢着嗰時，又綁得好實，搞到 pat pat好痛，不過劇組好多演員都一齊着，人人平等，所以最後先夠膽着住襠布見人。不過有場戲講長澤正美揸電單車，而着住襠布嘅染谷坐正美車尾，就在此時「何 B仔」唔覺意頂到正美，嚇到正美大叫，最後 NG好多次先完工。
染谷有乜威水史？
今年 21歲嘅染谷，由童星做起。 9歲已入行嘅佢，至今拍超過 14套日劇、 16套電影，最威係喺 11年憑暴力血腥電影《庸才》，攞走威尼斯國際電影節「最佳新人獎」。
戇男有市場關天災事？
事關近年日本面對天災人禍，自 11年東北地震引發海嘯後，又爆出福島核電廠洩漏輻射，加上近年差唔多每年都受颱風侵襲，所以日本觀眾唔想喺電視上見到喊苦喊忽嘅苦情男，反而想見到一啲可以令人開心嘅演員。所以近兩年，唔少怕醜兼傻更更嘅嫩口男優，好似上年於日劇《海女》中，扮天真少男嘅福士蒼汰，同《半澤直樹》中飾演半澤嘅驚青兼正義下屬嘅中島裕翔就大受歡迎。
|
鍾意就快D Share啦！
|
|
|
