網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2014年10月3日 星期五

[忽然1周 1001] 袁詠儀:願陪個仔遊行 袁詠儀,MW,




打頭陣

袁詠儀:願陪個仔遊行

9月 28日,警方投下第一枚催淚彈,為「雨傘革命」揭開序幕,亦令香港的「不合作運動」遍地開花。

同樣地,平日對政治冷感的娛圈中人,不少亦受到學生及示威人士感動,紛紛發聲,黃耀明、何韻詩、卓韻芝、謝安琪、葉蘊儀等人,更走上街頭為香港出一分力,連甚少談政治的袁詠儀都撐學生:「我希望可以陪佢(個仔)去!」




















28日,警方在示威者手無寸鐵的情況之下,仍然投擲 87枚催淚彈,激起不少市民上街。

佔中爭真普選運動,學生遭警方催淚彈驅散及武力鎮壓,令全港巿民震驚兼震怒,尤其是身為父母者,無不心痛不已。已為人母如袁詠儀(靚靚),周一( 29日)晚上出席活動時提起此事,悲慟不已,更怒轟政府應該反省。

她促請政府將心比心,以父母的立場去理解學生。她說:「我覺得係痛心失望嘅,希望政府企喺一個父母嘅立場去諗。我個仔(指魔童)七歲,我已經唔可以用強權去對佢,已經唔可以一味係『我』嗰套,我已經好多嘢要同佢商量,有好多嘢要問佢意見,更何況呢啲 17同 27歲呢?」

靚靚指近日有不少朋友問她,如果將來兒子要去示威,她有何反應,她表示會奉陪到底:「我覺得如果佢要去爭取呢樣嘢,而我又覺得要去爭取,我希望可以陪佢去。」這個廿四孝母親,明理開通,可惜當今政府完全沒有用心聆聽「孩子」的聲音。當孩子進入反叛期,只想用「強權」去控制,不但形成代溝,更令孩子們反叛加碼。

謝安琪:特首要同市民對話

她表示:「呢班學生,係香港生活比較好嘅一群,點解要咁辛苦呢?香港人好驚冇咗份工,好多人直頭唔返工,點解佢哋又喺度呢?好多市民訴求好明確,特首應該盡快同市民對話。另一個到場原因,喺香港生活咗幾十年,我從未見過執法人員將槍口指向無辜市民。」

謝安琪去美國前一晚(周二),抽空到金鐘捐物資為學生打氣。

葉蘊儀:市民都自律

有一仔一女嘅葉蘊儀,周日凌晨出動,由金鐘綁黃絲帶綁到落銅鑼灣。

「用了共 87個催淚彈,對付冇武器的學生及市民,你們是在保護市民嗎?大家是香港市民,為真普選站出來,我看到全是和平及自律的市民,沒有(必)要用武力。」

周潤發:梁振英唔可以避

「警方呢,我覺得佢第一日已經係錯咗,使唔使用到掟催淚彈呀?政府喺呢個議題上(普選),成日叫我哋香港人袋住先。點解唔可以叫政府掉番轉頭袋住先?第一時間政府就應該唔好避。兜口兜面衝埋嚟嘅嘢,你一定要解決咗佢先,你唔可以避,梁振英唔可以避。」

劉德華:不要武力

「民間特首」劉德華在網上強調不要武力,希望大家為了家人,要特別注意安全,更加不要被人挑釁。

周美鳳:掟催淚彈係應該

「我最初都好支持學生有訴求、民主,但呢班人太自私,搞到暴亂,影響經濟最終都係害市民。大家都要食飯、要交租,搞到暴亂好過分。我覺得警察出催淚彈係應該。真係希望呢幾日打風落雨,等佢哋快啲返屋企。」

傅明憲:支持出解放軍

傅明憲近年搭上比佢細 10年嘅莊士集團太子爺莊家彬,莊家彬撐反佔中(圖),佢當然力撐男友,更喺 fb留言:「港股跌 300點, thanks to the protesting students!(多得示威學生﹗)」更慫恿要出動解放軍,不過她好快就刪除留言。

邵音音:酒樓不能做生意

周三( 1日)邵音音邀請記者出席李偲嫣召集的「藍絲帶運動」,但就表明不准壹傳媒記者參加。對於佔中,她表示﹕「香港係民主自由嘅地方,開店零收入,但要交貴租,酒樓不能做生意。幾百萬一個月租,俾你有咩感受?」

卓韻芝:心痛到講唔到嘢

卓韻芝 9月 28日身處金鐘,撞正掟催淚彈。「當時有一個催淚彈喺正我腳邊,接觸到嗰啲白色氣體,皮膚就好揦,仲咩都睇唔到。當時好驚之餘,又心痛到講唔到嘢。」雖然中過招,不過十月一日仍有去撐場。

卓韻芝在網上撰文,痛訴自己中催淚彈的遭遇,她表示事前絕不相信警方會向自己發催淚彈。

林海峰:節目講咗

林海峰在節目中不時諷刺梁振英,近日更笑指保鮮紙及雨傘是警方眼中新十大武器。不過記者周三訪問他時,他不欲回應,只叫記者留意他的節目,耍太極之餘,亦不忘推銷節目。

蘇永康:唔好 hea市民

「催淚彈後面有個牌,話會用槍,但警方話唔打算有 intention。差館冇資源咩?分開兩個橫額唔得咩?咁即係,我佗支槍喺度,係咁揚嚟揚去,但把口話唔打算打你喎!我真係希望警務處長俾一個唔好『嘻呵吓 hea』嘅答案我!」

黃貫中:爆粗鬧特首

周日在網上打粗口符號,以示不滿特首的阿 Paul,到了周二晚「找數」,被網民發現他到旺角街頭參加雨傘革命。

泥鯭:我哋要真普選

至於 Rubber Band嘅泥鯭亦有到銅鑼灣示威,佢話:「一面支持學生,一面係用自己嘅方式表達訴求。警方處理好唔恰當,先激發到咁多人出嚟表達,希望政府認真真誠回應學生的訴求,我哋要真普選,同埋撤回人大方案。」

閃縮派

梁漢文:我聽日要飛

梁炳被記者問佔中,最初佢唔想講,後來至勉強話:「最緊要注意安全。(你去唔去支持?)我聽日要飛!」人人北望神州,明白晒!

吳鎮宇:啲人唔帶仔參加「我係中立嘅。因為如果一件有意義嘅事,係關於下一代嘅,俾着我,我一定會帶埋自己啲仔出嚟,證明呢件事冇危險,連我仔都參加,但我又見唔到嗰啲人咁樣做喎!」

艾威:衞生巾防催淚彈

「衞生巾應付催淚彈最有用,係警隊高層透露俾我知㗎!衞生巾有活性炭吖嘛,當年越南難民營嗰啲真正嘅暴民,就係用呢樣嘢嚟防避催淚彈嘅!不過對佔中,我係中立嘅。」

10.1前夕逼藝人出席 余詠珊鬼祟搞慶功

王祖藍與家燕姐的扮嘢節目,在周二( 30日)煞科。近日佔中警民衝突令香港一片愁雲慘霧,不過大台就繼續歌舞昇平,搞慶功。最慘係王祖藍同家燕姐,都覺得這個時間慶功好怪,都反映過可否改日子。不過余詠珊好大喜功,堅持要大搞,寧願唔叫記者。佢仲落 order,話有記者問,就答是同事飯局,否認慶功。

其實遲少少慶功,又有乜所謂?依家搞到咁閃縮,證明身有屎。難怪當晚見到一班藝員個樣都唔多開心啦。

為了扮嘢節目,家燕姐扮汪阿姐,一個字:「絕」!

家燕姐到了酒店,亦掛住篤機,遲遲不入去。

王祖藍收起招牌笑容,急急腳步入大堂。

余詠珊未下車,已經有侍應(右)衝埋去開門。

連外國電視台在示威地點都有臨時帳幕工作,反而大台呢個「地頭蟲」就乜都冇,難怪被示威者惡搞台徽,寸大台冇料到。

同場加映:邵子風爆魯振順寸學生

早前因為佔中,被催淚彈打中的邵子風,都有出席最後一集錄影。他在化妝間聽到兩名藝人冷嘲熱諷學生同佔中人士,令他無名火起。於是在 fb踢爆,指一名男藝人聽到落緊大雨,就寸爆示威人士:「個天講咗邊個啱邊個錯下午就曬死佢哋,夜晚就淋死佢哋!」

邵子風雖然冇開名,但就寫明個「男偽人」平時用太監腔講嘢,咁魯振順把聲出名中性,加上又是扮嘢節目台柱,答案不是呼之欲出嗎?同場還有一名女藝人反佔中,邵子風踢爆女藝人大彈示威人士怎樣影響經濟、股市,又話示威人士好過分,邵子風笑住反寸她有好多股票在手!

大台維穩,估唔到連旗下藝人都一樣!

邵子風一向敢言,又力撐佔中,早前亦曾因上街而被催淚彈擊中。

邵子風忍唔住寫低「男女偽人」的說話,仲放上 fb。

魯振順把聲一向中性,亦是大台扮嘢節目台柱。

魯振順 2011年曾在大台劇集《紫禁驚雷》飾演太監。

10.1佔中送暖

10.1當日身穿黑色 T恤的藍奕邦,下午四時捧住一大盒退熱貼到金鐘,記者欲與他做訪問,他婉拒了,只急步走到物資中心交低給負責人員便離開。據知當時食水、生理鹽水和雨傘都有大量積存,反而退熱貼短缺,藍奕邦果真有心。

前主播張寶華在網上鬧爆警隊處理佔中用過分武力,更出言要「禿鷹」下台。她在國慶當日亦到了政府總部聲援佔中,為「驅鷹」出一分力。

香港人為民主站出來,連內地人及台灣人也被感動。來自杭州的胡生專誠來港聲援學生,慷慨捐出物資。另有台灣少女舉牌撐港人爭取真普選。

10月 1日,金鐘有人自發派贈通粉,為連夜露宿的學生準備早餐充飢。

有髮型師為報答捐助物資的有心人士,即場為捐贈者免費剪髮。

佔中是進行公民教育的好機會,睇吓小朋友也來學習執垃圾,更乘機學習環保意識及廢物分類。

曾揚言唔怕被捕的 70歲婆婆,每天都來靜坐支持學生,更表示︰「我守住白天,晚上兩個兒子就來接更。」

物資中心提供帳幕給連夜佔中人士借用,讓他們歇一歇。

兩名可愛的女學生,穿上黑衣繫上黃絲帶,真誠表達熱愛和平。

記者竟然在金鐘政總對出見到反佔中分子張立基,他表示只是走來看看,不過就話:「嚟到見到學生和平同守秩序,都好感動,之前我去過旺角,估唔到坐喺地下都可以影相,我之後都會去埋尖沙嘴。」

父母教孩子看佔中

當第一枚催淚彈突然炸開冒煙,全世界無論在現場或電視前都嚇呆了。當中更多是孩子,他們在電視機前,看到警察連環發射催淚彈,白煙佔據整個熒光幕,人群四散驚叫逃走,父母能跟他們怎樣解釋。警察為何這樣做?手無寸鐵的學生到底做錯乜?一道道難題相信是親子最大挑戰,但有方法可拆解。

甄詠蓓

先安撫佢情緒

劇團藝術總監,女兒 10歲

作為一個母親,見到年輕人被暴力驅趕,好難受。女兒也感到震驚,因跟她心目中的警察有出入。這些場面令她好不安,我要先安撫她。由於學校有講佔中,更有老師參與,她知道發生甚麼事。有跟她討論,分別用市民政府警察唔同角度去睇件事,跟她說要為自己發聲,覺得唔公平就要提疑問要爭取。

集會第二晚8時多,我想去金鐘放低物資,個女話有功課唔識,叫我返屋企。我話可以在電話教,但她好忟憎催我返家。我知她擔心我,最後我冇去。不過,我諗過帶她去送物資,以另一種形式參與。今次香港人表現的質素好高,好 surprise!

森美

講番件事俾佢思考

藝人, 1子 1女, 12歲及 8歲

個仔問我點解警察要咁樣對示威者,係咪示威者做錯了甚麼?這件事對小朋友的價值觀都有少少動搖,因為他們在書本學到的,警察是維護正義的。我盡量唔加入個人睇法,只跟他們講番件事,讓他們自己去思考。我記得八九民運當年,我父親都是講件事我知,到今天我仍然記得爸爸的說話。

我認為警方放催淚彈好不智,依家咁多市民走出來,政府要負好大責任。情況已經愈來愈嚴重,坦白講已去到擔心的地步。

蘇美智

要有健壯的小腦袋

親子專欄作家, 1子 1女, 8歲及 6歲

大仔看得特別肉緊,這幾天都問佔中怎樣,放學回家扔下書包,就睇新聞,我想是催淚彈橫飛,令他太震撼。女兒就好驚,周六警察不斷噴胡椒噴霧,我跟先生話要出外,她好緊張喊,抱住我不放,要我不要去新聞報道的地方。我們用方法引開她注意,最後成功出去支持學生。她就不斷追魂 call,她從沒這樣。

我看到學生這樣,真的好難受。最記得看到發放催淚彈,我在房間哭了,丈夫知道,叫孩子來抱着安慰我。當晚等孩子睡了,我們又再出去。孩子還太小,沒要求他們佔中,反而跟他們說要好好培養自己的小腦袋,不用那麼快做批判,等它長得健壯後,才有紮實的分析能力知道發生甚麼事,到時他們亦有足夠的能力改變周圍的世界,把它變得更美好。

呂秉權

睇繪本學反暴力

浸大新聞系高級講師及獨立評論人協會召集人,兒子 4歲半

有想過放下觀察員身份時帶仔仔去集會現場,親身感受,不過會揀容易逃生的位置。他看電視報道後問:「點解警察會打人?」他心目中警察是保護人,所以有衝擊。乘機跟他說靠武力不能解決問題,要講道理。

我給他看一本叫《不可以》的繪本,內容說國家要打仗,有個小朋友寫信給總統叫他不要打,寄信途中遇到很多情況,他不為所動把信寄出了,最終改變了總統的決定。通過故事讓他明白凡事要講道理,政府也要聽人民說話。政治問題應該用政治方法解決,警方用暴力解決不了問題。警方一定會清場,我認為星期日晚會是關鍵時刻。當他們用到橡膠子彈時就是一個警號。

主角大聲向暴力說不可以,最終改變了結果,指出兒童也有改變世界的力量。

人人都會錯

Hilda Ma,公關,女兒4歲

我支持運動背後的理念,不過我反對激進的手法。個女見到衝擊場面好多矛盾:「點解警察打人?點解咁多煙?」因為學校教她們警察是維持治安的。我說每個人都會做錯事,爸媽都會錯,事情不是只有一面。

她太小,很難給她解釋整件事,只說香港是我們的家,現在這個家有病,我們要關心。我給她看 facebook圖片,例如警察替學生用水沖眼,讓她知有好警察;市民送物資,認識互助精神;集會的人散開讓救護車過,告訴她要有同理心……通過這些跟她分享訊息,讓她學習思考,不要盲目反對或跟從別人。

市民讓路給救護車。

親子黃絲帶祈福

Yan,全職家庭主婦,兒子 5歲半

兒子最愛扮警察。曾在街上被人摸報警求助,警察叔叔蹲下向他說:「差人來幫你。」但周日他在電視上看到警察不停發放催淚彈和胡椒噴霧,居然說:「警察今晚不對!」做媽媽的,我不懂解釋,因他還小。於是翌日買了一卷卷黃絲帶,帶他在社區綁在不同位置。黃絲帶代表和平、祈福,都有跟他解釋,他亦明白,更多是想引起社區醒覺。現在都有朋友受影響,在粉嶺和東九龍發起親子綁黃絲帶運動,希望可遍地開花。

大人和小孩合力把祈福黃絲帶傳開去。

大埔中心天橋及巴士站。有朋友更受 Yan影響,在粉嶺、東九龍發起帶孩子綁黃絲帶運動,並在自己家的窗戶和露台綁上,想黃絲帶在區區開花。

母子在綁時,有人反對,但支持者更多,連工人姐姐都來握手及感觸落淚。

Yan一次買晒全部黃絲帶。據聞市面上的黃絲帶非常缺貨。

反佔中變佔中

杜小姐,文員,女兒唸中二

囡囡一直反對佔中,更曾在周融搞的反佔中街站簽名。然而周日的畫面令她改觀,反而覺得政府唔成熟,太誇張。她這刻沒說要佔街,但認為一定要溝通。講真未放催淚彈前,民意都是一半一半,若非周日的畫面咁誇,社會唔會有咁大迴響,現在很多市民都支持學生。

專家點睇:多聆聽孩子

資深心理輔導員鄧綺瑩( Sandy):「大人看了周日的畫面可以找人輔導,但小朋友真係難。因為社會議題,太小未必懂。尤其是幼兒,會有焦慮,若然平日易驚青、怕羞,周日的畫面可能引起他們恐懼。父母可引導他們講出心中所想,或用畫畫表達,並留意他們有沒有發噩夢。亦可以用他們日常生活的例子,例如選班長等,講解何謂普選。記住不要用評判的口氣,話唔准孩子怕,唔准孩子喊,發惡係無補於事的,真係解決唔到,就要搵專家。」



鍾意就快D Share啦!