掃呢頁CODE去手機

2014年10月16日 星期四

[壹週刊 1284] 旺角古惑仔識別法 M1,




爆壹爆

旺角古惑仔識別法

講開上週旺角連續三日大亂,黑幫有正式名稱,叫「吹大雞日」,各幫都有搵人去旺角搗亂,而且吹雞吹到亂晒龍,有人話幫阿爺做嘢,有人話麻雀館叫人掃場,又有人話搵差佬報平日之仇。

連在旺油區嘅老牌幫會,即栢芝老豆鬍鬚勇個社團「老聯」都有吹人去旺角做嘢,由於當日吹雞吹得幾急,搞到價錢都好波動,由五百至千幾蚊不等,為免殺錯自己友,有黑幫以手綁黃絲帶為記,其他黑幫就各具特色,不過最騎呢,算係一個光頭仔,佢掛個牌出嚟,寫住「$900自己友」,好似明碼實價話埋俾人知,收幾多落旺角做嘢,唔好打錯人。

搵本地黑幫做嘢,有老叔父就話雖然一時止到咳,但古惑仔出名係易請難送,一黐咗埋去,就成世難甩身,試過有富豪廿年前叫古惑仔做嘢,廿年後都仲可以屈個富豪繼續俾錢,唔係就出來爆大鑊。睇番今次阿爺叫古惑仔做嘢,古惑仔四處張揚就知,都係諗住長期咬住張飯票,一手緊就向你度水。

禮賓府河東獅吼

呢排最紅,除咗係佔中學生外,當然係 689啦,不過唔好睇狼英逢出場時,成日裝腔作勢,其實收到風,佢都幾怕老婆,據一位在禮賓府任職嘅友人爆料, 689一家真係個個都係有性格人士。

狼英對外應付學生及佔中人士時,佢好似幾決斷及敢作敢為,但當返到禮賓府後,據知佢粒聲都唔敢出,因只要梁太倒抽一口涼氣再用眼神睥佢,全禮賓府上下都要聽梁太指示。而講開梁太,友人即破口大罵,話佢係禮賓府惡管家,不但事無大小都要插上一手,甚至次次宴會時,每個嘉賓飲食預算都要經佢打點,試過有一次午宴,竟然係每個人頭食用費得五十蚊預算,禮賓府職員都 O晒嘴,足見梁太慳家手段幾咁勁。

呢個友人話諗番以前,先知道昔日兩位女主人,即董太及曾太係幾咁仁慈,初時以為受過高深教育嘅梁太,點都唔會差得去邊,但當睇過佢成日當眾手指指去鬧禮賓府老臣子,一點也不留情面,就知道教育同修養係無任何關係。

西九靚女師姐鎮場

講開旺角真係唔好俾佢停,不過今次爆哥想講啲開心醒神嘢,呢幾日爆哥都有落旺角見識吓,除睇到古惑仔隨街亂打人,亦見到一家大細去影相當景點外,仲俾爆哥𥄫到傳聞已久嘅西九警界之花,仲唔止一朵花,係幾朵咁多,雖然部分身形較肥,但也有靚師姐出現,如果唔係著咗警察便裝黑背心, MK仔真係會上前撩佢哋。

西九警花跟住班男同事出更,個個都顯得好嬌滴滴,短中長髮及馬尾打扮都有,真係羨慕班阿 sir,其中一位著北京大學白 T嘅警花,長馬尾及眼大鼻高,真係去選港姐都得,不過有幾位警花可能未見過大場面,一見班古惑仔衝埋嚟,即時被嚇到尖叫出嚟及躲在男同事身後,好彩班阿 sir識憐香惜玉,即時以身擋駕護花。同現場反黑大 sir吹吓水,大 sir一邊呻辛苦,一邊估計短期內武力清場機會微,因佢只收到上頭嘅巡邏指令,仲話班黑幫高層已被佢哋警告唔會再郁手,依家旺角最火爆嗰班,反而係熱血公民同埋反佔中人士。

爆哥乜料

金融界撈家,穿梭黑白政商界,朋友遍布旺角至中環,每星期都八到唔同料,同《壹》仔讀者過吓癮!



鍾意就快D Share啦!