網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2014年10月30日 星期四

[壹週刊 - 1286] 娛人娛己 賺夠無憂 半百邵仲衡 倒貼拍戲 邵仲衡,M1,




探熱針

娛人娛己 賺夠無憂 半百邵仲衡 倒貼拍戲

現年五十歲的邵仲衡,自前年復出幫港台拍劇後,突然戲癮大發,去年索性將內地生意交給同事,全面回歸幕前,更瞓身支持導演好友黃浩然的電影作品《點對點》,唔收片酬、出動私伙跑車做道具,甚至幫口搵埋贊助出埠拍外景。

開裝修公司、賣辣跑,買樓投資又有大斬獲,半百之齡再續明星夢,邵仲衡純粹貪過癮。

出車搵贊助

由○八年開始定居北京的邵仲衡,去年八月正式返香港定居,唔做生意專心做演員,在老友黃浩然執導第一部電影作品中,孖住陳豪做表兄弟,唔收片酬做男二:「導演話俾利是,我唔要咋。」邵仲衡說。

知道電影欠缺資金支持,邵仲衡免費借出私家車做戲中道具;導演無錢出埠拍外景,邵仲衡即拍心口搵贊助:「佢哋本來想去台灣拍外景,後來冇錢改喺西貢拍,扮外國,我咪幫佢搵旅行社贊助,其實都係導演自己去傾,我做中間人啫。」

十七歲入行,在無綫邊拍劇邊做裝修、汽車生意,承認早年已經有車有樓,回歸拍戲但求開心:「早幾年喺北京 798附近買咗個貨倉,因為自己裝修,可以好平搞掂,住咗一排賣咗,算係最賺錢物業,香港就一直住喺黃金海岸,先買七百呎單位,後來賣咗再買望海大單位,陳豪近排俾人話佢泊車阻人,我心諗,傻嘅,使幾千萬買咁嘅地方得兩個車位。

「我全盛時期有八架車,返 TVB開工,都係揸跑車,嗰時 Aaron(郭富城)住明華大廈(筲箕灣),我住北角,收工送佢返屋企,佢羨慕我做幾次死屍,就可以做有對白角色,又話好想有部跑車,佢而家買得起一千架添,我絕對唔係詆毀佢呀,大家都係朋友。」

94年淡出幕前做汽車生意,有知名度的他,也經常出現副刊的車版。

在《大時代》做丁孝蟹,跟鄭少秋有不少對手戲。

出道未幾,被 TVB力捧,同期有郭富城(右二)及拍過拖、現在是 IT老闆娘的邱淑貞(後右三)。

有名無利

出道被力捧,演過經典劇《大時代》做丁孝蟹,當年未彈起的周星馳恨到出口:「佢係咁話我好,有公司力捧,可能當時出面做生意,我唔係唔稀罕,但要有番平衡,要提自己去返現實,當時人工唔低賺到錢,唯一不滿係影台慶大合照,自己企中間隔籬係六叔(邵逸夫)同肥姐,但交稅時仲要去銀行做 loan。」

九四年退出幕前從商,邵仲衡說,無論當日選擇行邊一條路,有得,必有失。「可能當時唔做生意,做娛樂圈會有另一番新氣象。不過我相信做戲講求集中,分心去做一定唔會做得好。不過我唔強求,有人搵我拍戲,我好多謝,唔搵我亦無所謂,大家鍾意睇先得,最緊要係娛人娛己。」

前年拍完港台劇《沒有牆的世界》,跟翁虹合演兩夫妻。

邵仲衡說鵬哥是個憤世嫉俗的人,當年轉數已經好快,遇正天時地利人和,他的「盧海鵬試咪」又爆紅。

邵仲衡讚星爺反應快叻仔,不過當年的周星馳都羨慕他有運被力捧。

開口中

邵仲衡參演的電影《點對點》,除關注香港文物歷史,集體回憶中亦暗藏對時下政治、民生及警察的不滿。當中一幕,邵仲衡與陳豪踩單車遭休班警查問,對白居然係:「快啲走啦,唔係用胡椒噴霧噴你!」開口中,反映出佔中運動警察鎮壓示威者的招數;另一幕,陳豪在柯士甸港鐵站外被行咇警問點解怕警察?陳豪妙答:「點解我哋要怕你?依家係市民出糧俾你。」電影今年初拍攝完畢,無補拍無配音改對白,卻拍出現時警民關係的困局。

孖兄弟

少年撞樣,兩個都係日本仔 look,麥包鼻樑有癦。

無論樣貌身形同聲線,都跟麥包激似,原來二人同是十七期藝訓班,那些年起,兩個撞樣撞到而家:「出道時,啲人誤會佢係邵仲衡,到我唔拍嘢,啲人又話我似麥包。」



鍾意就快D Share啦!