【忽然富貴】傳做成龍契女 吳若希升呢 住月租4萬豪宅
2014-10-21 11:42:00
吳若希早前批評佔中，遭網民除女神之名，緋聞男友劉子健仲因疑似流出自瀆片，兼涉撩未成年少女裸聊，被南華停賽一年，籃神落難了，吳若希都唔弱，即同籃神火速斬纜。
今日仲有雜誌大爆福建出世嘅吳若希入行4年，最近忽然富貴，入住月租近4萬嘅何文田豪宅，又同楊怡揸埋同款價值80萬嘅Range Rover代步，據知有米過好多大台當家花旦。
該報道表示吳若希嘅猛料貴人原來係....成龍呀，有傳吳若希得前經理人「爹哋」戴榮添（Simon）搭路，令成龍收咗佢做契女，原來疑有後台支持，難怪出道被指整容、報細年齡自稱22歲及床照，吳若希照樣人氣急升。
引述報道指，吳若希出道4年一直做三線女歌手，年頭吳若希所屬嘅公司星煥改組，多得有星煥打骰嘅何哲圖射住，過到大台就當然有余詠珊特別照顧，唔愁冇機會，唱盡大台劇集主題曲。
雜誌又形容吳若希喺微博叫Simon做「老竇」，聽聞係吳若希剛入行嘅經理人，其後將吳若希嘅合約賣斷咗畀星煥，吳若希被傳係「世界女」叫前經理人係「老竇」，叫現任星煥老闆何哲圖係「爸B」。
據知吳若希討好兩邊，現時喺大台有星煥關照，去內地又有戴榮添扯線帶佢去內地發展，似乎工作無憂，仲有傳認咗成龍做契爺，聽聞成龍年初60歲大壽，出席多係英皇藝人或圈中多年好友，唯獨吳若希都有份去。
報道指曾問過「老竇」Simon，指係介紹音樂人同電影人俾吳若希識，Simon回應係吳若希識成龍，冇經過佢介紹，又話吳若希架車壞咗，係佢朋友借俾吳若希揸成3個月，Simon仲講吳若希住嘅係何文田豪宅一個細單位，冇成千呎咁多。不過該報道查證，指細單位建築面積都有成1011呎。
吳若希與前經理人「嗲哋」Simon合照。(微博圖片)
著古裝錄歌有feel啲(微博圖片)
唔知係男友定fans送。(微博圖片)
|
鍾意就快D Share啦！
|
|
|