掃呢頁CODE去手機

2014年10月2日 星期四

[FACE 384] 好事近 女友等嫁 周柏豪:佢 ready就 OK 柏豪,周柏豪,MF,




準備出場前,柏豪做足準備,搵嚟好友前 EO2成員 Otto(係,幫人拉筋好過!)幫手拉筋,話晒台上有後空翻的高難度動作,都係做足安全功夫好啲!

真面目

好事近 女友等嫁 周柏豪:佢 ready就 OK

上週,周柏豪舉行一連兩場嘅處男紅館個唱,以往的緋聞女友何超蓮、 G.E.M.鄧紫棋、連詩雅都現身支持,而柏豪正印女友 Stephanie當然撐足 2晚添!尾場柏豪講笑仲話要娶美心妹妹 Celine,之後問他現實中的結婚打算,柏豪笑晒咁講:「佢 ready就 ok!」應該好快就有好消息

出道 7年,柏豪終於踩入紅館開騷,表現落力,唱到瞓地兼爆軚。全晚最高潮,是柏豪與兩位身穿三點式的女舞蹈員火辣纏綿,其中一女舞蹈員更從後伸手「偷桃」,又將頭貼近「小柏豪」,三人互摸意識大膽。

柏豪半裸金 look原來要花 1個鐘時間準備,化妝師黐緊金箔期間,柏豪都不忘 chok爆擺 pose,嘩!個胸肌真係幾大喎!

柏豪女友 Stephanie連續 2晚撐場,今次仲大大方方任影,睇嚟唔只半公開,就快有好消息都唔奇。

男女鬥偷桃

柏豪有城城做壓軸嘉賓,望住城城又跳又唱,柏豪都忍唔住要露兩手,雖然唔夠舞王嚟,不過 fans依然嗌破喉嚨。

柏豪台上除咗騷肌,又同女 dancer跳辣身舞,仲畀女 dancer上下其手,連「小柏豪」都唔放過,佢仲話:「鍾意俾城城摸多啲,俾男人咁摸都係第一次,能夠獻畀城城係我榮幸。」咁識講嘢,叻仔!

城城臨尾一招「猴子偷桃」,令到全場 fans high爆!

黐金箔唔敢郁

柏豪用咗 1年時間去學打太鼓、後空翻同操肌,不過訓練過程中搞到自己周身傷,先係練習後空翻時扭襯左腳、打太鼓時又搞到雙手損晒。

一年前已經開始練大隻,開騷前仲喺後台狂操。一開場,柏豪以一身金色半裸 look從天而降,大晒一排朱古力腹肌。呢一身金色造型原來要花成 1個鐘時間準備,由化妝師將金箔逐塊逐塊黐上身,柏豪說︰「初初都唔敢咁大動作,驚甩晒啲金箔,不過上到台就咩都唔理,甩咗就算估唔到出嚟效果好靚。」除咗操肌外,今次柏豪更耍後空翻,搞到扭傷左腳添!

娶 Celine定 Stephanie?

去到個唱尾場,柏豪請嚟天王天后郭富城、楊千嬅擔任嘉賓,加埋有女友 Stephanie愛心撐場,柏豪全晚表現勁投入,尤其是同城城合唱時,上晒電跟城城鬥 chok。全晚高潮位,就係美心妹妹 Celine上台,柏豪講笑話要迎娶 Celine。柏豪完場後就話:「其實我都係搞氣氛啫!(諗住結婚?)我係一個傳統嘅男人,睇吓對方幾時得佢 ready就 ok!」有得結,唔結?

台上跳完一次後空翻都未夠喉,喺後台接受訪問時再跳多一次,力證真功夫。

雖然柏豪一直都冇公開過女友 Stephanie嘅身份,不過兩個𠵱家住埋一齊,去年底更被拍得與女友 Stephanie加埋家中兩老,一行四人到中環食飯做冬,連家長都見埋,結婚遲早嘅事。



鍾意就快D Share啦!