因為肯剝，蔣家旻有機會在電影孭重飛做女一，不過大膽程度嚇親珍姐，更因此入雪櫃半年。
探熱針
拍剝衫戲 蔣家旻守行為半年 特赦「回家」
大台長命電視劇《愛•回家》早前肅清瘀血，將唔聽話工作態度差的朱慧敏、湯洛雯以及蔣家旻踢走。犯眾憎朱慧敏被終極放棄，湯洛雯亦的起心肝跟老豆返內地搵食；至於瞞住公司拍剝衫戲的蔣家旻就有一線生機，守行為半年冇再行差踏錯，終於得高層曾勵珍特赦，獲准回歸馬家做乖乖女。
私鐘妹出事
《愛•回家》宣布由六百集加碼到七百集後，無綫安排寵將高海寧入組，頂替朱慧敏做黎諾懿女朋友。多事三女被叮走，不過曾經是高登女神的蔣家旻，近日就被安排「回家」。
「蔣家旻舊年接咗套電影做私鐘妹，戲入面差唔多全裸，佢同公司講話接咗部愛情片做女主角，但就冇講到要剝衫，直至套戲年初上畫，公司先知佢咁大膽。珍姐當時好嬲，因為佢擺明講大話呃公司，加上開工又成日遊魂唔專心，所以即時踢走佢。過去半年見佢冇乜嘢，亦冇啲古靈精怪新聞，所以俾佢入返組，但都要睇吓之後表現點，先決定加唔加重戲份。」知情者說。
收視下跌
月底再埋位開工，劇情安排蔣家旻由英國讀完法律返港，戲份集中在馬家，暫時劇情依然集中在高海寧跟黎諾懿的愛情線。
「高 Ling孭好重戲，不過自從同發哥拍咗部大片之後，佢同人講覺得自己唔適合拍電視劇，仲話想以後只係集中火力拍電影，只係公司叫佢拍，佢冇得 say no。」
拍極唔完，加碼再加碼的《愛•回家》高峰已過，收視跌到新低二十一點，據了解，若繼續有跌無升，分分鐘要賠錢給贊助商。
「套劇同贊助商簽咗協議，保證收視會喺二十點以上，近排收視差唔多去到邊緣，上個月平均得廿一點，高層都諗緊方法救亡，亦會搵多啲人入組，唔使啲古仔來來去去都係圍繞喺幾個人身上。」知情者說。
|
鍾意就快D Share啦！
|
|
|
