【短片】【慌張西望】千萬不要同港女睇星際啟示錄
2014-11-12 00:53:00
終於，我由外太空返回地球。在戲院的168分鐘裏，我親身體會到愛因斯坦的相對論，腦袋被那天旋地轉的畫面和艱深莫名的科學詞彙車輪式轟炸，有如渡過了一整日，疲憊不堪。
我拖着Yvonne BB離開了漆黑的時光隧道，重返光明一刻，我看到一張張迷惘的神情，感覺很窩心。
I AM NOT ALONE。
奇怪的是，沒有人在討論劇情。沒有人在品評MMC演技。亦沒有人投訴安妮夏菲維不夠性感。觀眾如喪屍一樣不發一言，一枴一枴的離開影院。這種沉默就如置身外太空一樣，英文叫做void（好似係）。
是Yvonne BB劃破了沉默。
「點解男主角唔識老嘅？」
「點解個細路女無啦啦變咗做大人呀？」
「乜解黑洞會影響重力㗎？」
「乜嘢係第五元素呀？（第五次元）」
「蟲洞又係咩嚟㗎？都冇蟲嘅。」
作為文科仔的我，考完中三大考之後，已經唔使再答呢啲理科問題。至於甚麼黑洞、蟲洞，其實我比較關注更有意義的洞，譬如明洞、蘋果動，又或者洞房（淫笑）。
「人哋講故就唔好駁故啦，佢鍾意點就點，陣間去邊樹dinner啫BB？」我故意扯開話題，因為糾纏在科學問題上，情況如同黃絲跟藍絲說理，隨時換來UNFRIEND危機。
「乜你咁0架。人哋MoMo睇完，佢男友解釋晒畀佢聽！我唔理，你唔講，以後都唔使旨意我陪你睇戲！」
書到用時方恨少呢句話，終於應用喺我身上。我打算運用曾Sir教落的說話九九八十一式亂吹一通，學李慧琼話齋，信，就係證據。但我有顧慮到附近有高登毒男在左近，需知高登仔是萬能的，理論被拆穿事小，成為高登十一月之星事大。
正當我躊躇如何應對之際，一名身穿實驗袍的男子從後殺出。明眼人一睇就知他是「科學怪人」，halloween都過了半個月，還夠膽死cosplay去睇戲的（仲要係一支公），不是天才，就是毒男。
「呢位靚女係咪想知乜嘢係黑洞？」怪人搭訕，BB將頭靠過去。
「我知，Kobe咪黑洞囉，交親波畀佢都冇回頭，有入冇出呀！」九九八十一式大派用場。
怪人無視我的爛gag，轉身向Yvonne解說：「黑洞，其實唔係一個洞嚟。簡單啲講，係一個質量相當大嘅恆星爆炸後形成。由於重力相當大，連最快嘅光都有入冇出，所以叫黑洞。」
「咁點解主角佢哋去到Miller星，話星球時間比地球慢咁神奇嘅？」Yvonne問。
「咁就要講解愛因斯坦相對論。由於Miller星接近巨大旋轉型黑洞，時間被重力影響而嚴重扭曲，變得非常慢。主角佢哋喺Miller星停留一個鐘，相對等於地球嘅7年。所以主角個女熟晒，正呀。」怪人口水快流出來。兩人左一句右一句，已完全漠視我的存在，真正扭曲的，其實是我的臉容。
「咁蟲洞又係乜東東嚟㗎？」Yvonne的求知慾似乎不下於購物慾。
「蟲洞對你哋嚟講，只係一個假設。你可以幻想成有兩個宇宙，中間可能相隔幾億萬光年，但兩者中間可能存在一條狹窄隧道可以穿過，而理論上可以做瞬間轉移甚至時間旅行……我唔怕同你哋講，我其實係未來人，叫宋文。」
Yvonne聽得一頭霧水，比安妮BB更茫然。她轉回我身邊並低聲說：「BB，不如我哋返屋企睇肥導演套《唐伯虎衝上雲霄》咯？」
港女，還是適合睇冇腦的電影。
撰文：杜秋棠＠抽水站
https://www.fb.com/freakingwestlook
|
鍾意就快D Share啦！
|
|
|