全知言
瞓着都識唱 洗腦歌無限 loop
不停 loop、不停 loop，洗腦歌之所以叫洗腦歌，就係你聽一、兩次就會喺腦海無限 loop，好似病毒入侵大腦一樣。
就算廿幾三十年前嘅舊歌都可以重新洗腦，好似〈相逢何必曾相識〉、〈獅子山下〉咁。
呀！唔好再講喇！我又不停 loop喇！
無謂令你令你令你令你……
何超儀 順便自 sell
最洗腦歌梗係我自己 plug緊嘅歌叫〈好女孩〉啦，因為我日又聽夜又聽準備要演出。呢幾年我做嘅歌全部都鍾意，有新鮮感嘛！呢隻歌係講做好女孩，「嗲哋叫我唔好做怪，媽咪要我學會煮菜，好女孩不能亂來，乖乖乖！」歌詞係范曉萱填嘅，啱我㗎！
黃美棋 支持大台
暫時對我嚟講最深刻嘅洗腦歌係〈越難越愛〉，因為套劇沈震軒一見到陳敏之嘅時候，呢首音樂一定會播，同埋啲情節好浪漫，所以最近一見到佢哋一定諗起呢首歌。喺屋企有時都會哼吓，因為個 melody成日都會播，起碼我𠵱家都仲記得首歌。
扮咕咕雞
要強烈推薦王蓉嘅〈小雞小雞〉，佢有咩特別之處呢？成首歌得幾句歌詞啫，就係「公雞、母雞、小雞同埋咕咕 day」，我覺得點解啲歌詞咁得意呢？咩叫「咕咕 day」就唔係咁清楚，首歌嘅旋律異常洗腦，個 MV又拍得幾靚！因為我睇 MV都鍾意留意吓啲時裝嘅！我起碼睇咗 3次。
泰臣 香港精神
係〈獅子山下〉。因為呢隻歌細細個就聽，呢排又聽好多喎！又好鍾意啲歌詞，又有貼身關係係香港人嘅歌啦，唱嘅亦係我好欣賞嘅羅文！間唔中自己都會哼起。又因為我由屋企返工都會經過獅子山，雖然 miss咗有條 banner嗰個 moment，不過對我嚟講係一個好有印象嘅地標嚟嘅！
民選最 loop 〈話你戇×〉好抵死
成日喺 facebook聽到，幾得意吖，啲歌詞又有粗口，好抵死！唱到又要咁認真。
電視播得多嘛！啲朋友喺 facebook又係咁洗版，聽咗好多次，出街都成日諗住，廿幾年前都有聽過，都識唱㗎，周星馳《家有囍事》都唱過
深入民心同埋好聽，啲歌詞幾好，呢排經常喺旺角佔領區聽到，我有拎過物資去，喺旺角都唱過吓㗎！
|
鍾意就快D Share啦！
|
|
|
