掃呢頁CODE去手機

2014年11月19日 星期三

[FACE - 391] 林愷鈴 又靚又叻  14歲美少女 最叻朗誦 龔慈恩:個囡冇時間拍拖 林愷鈴,龔慈恩,龔慈恩個囡,MF,




林愷鈴媽媽係龔慈恩,爸爸係台灣藝人林煒,但龔慈恩就話個女冇講過想入行,她說:「佢好鍾意畫畫,佢話想做建築師多啲,但佢啲數麻麻。」

真面目

又靚又叻  14歲美少女 最叻朗誦 龔慈恩:個囡冇時間拍拖

星二代排住隊入行,連翁靜晶大女劉萬儀都出嚟行騷,就知星二代吃香,但數到最令人期待嘅一定係龔慈恩 14歲女林愷鈴 Ashley。

 唔只有媽咪靚樣,仲好有才華。除咗朗誦由細玩到大,成日攞獎外,龔慈恩仲話個女鋼琴 6級、亦玩聲樂,名副其實才女。日日唔係練聲就練琴,時間密麻麻,唔擔心個女會拍拖。龔慈恩話:「佢真係冇時間,同埋太細喇,佢自己都明白。」咁靚女大個唔驚冇人追啦。







唔少星二代今年入行,翁靜晶大女劉萬儀做樂基兒師妹,關禮傑女兒關楓馨亦出騷,但數到最 pure嘅一定係龔慈恩 14歲女林愷鈴 Ashley。未正式入行的 Ashley,最近跟媽咪出席活動,五呎五高,其清秀氣質有別其他星二代,原來獨有氣場係浸番嚟。

「佢面皮好薄」

台灣演員老公林煒多在大陸、台灣兩邊走,教仔全部交畀龔慈恩話晒事。《蘋果日報》圖片

51歲龔慈恩對大女林愷鈴 Ashley悉心教導,由幼稚園開始,已培養佢對朗誦的興趣。龔慈恩說:「想佢學朗誦唔係為攞獎,係想佢學好 EQ同咬字。」林愷鈴小五時,曾為聖保羅學校贏得第 62屆香港學校朗誦節粵語詩詞獨誦優異獎,除咗朗誦外亦係音樂高手,本身 6級鋼琴亦學緊聲樂。對於網友讚佢 pure,媽咪龔慈恩話佢未必知,她說:「佢好少接觸娛樂新聞,佢偶像係 Adele!(佢有冇上高登?)我諗佢冇囉。」

林愷鈴有樣有才華,應該唔少人想簽,不過龔慈恩唔心急做星媽,「佢𠵱家係讀書階段,唔影響佢學業情況下可以感受一吓,但一定要完成大學先。(咁靚女有冇男仔追?)其實佢冇時間,同埋佢太細喇,佢自己都明白,加上佢面皮好薄,少少 teasing下佢都唔得㗎!」真係純情。

林愷鈴最近跟媽咪龔慈恩出騷,以為佢好快入行,原來只係畀佢試下啫,龔慈恩說:「佢會以學業為重,入唔入行等佢讀完大學先。」《蘋果日報》圖片

雖然林愷鈴未入行,但同媽咪一齊接受訪問都冇怯場,表現淡定。《蘋果日報》圖片

林愷鈴特別的朗誦技巧,由幼稚園開始已培養,小五時仲代表聖保羅學校參賽,攞埋粵語詩詞獨誦優異獎, YouTube仲有片睇㗎。電視畫面

林愷鈴絕對有潛質做星,不過龔慈恩最想女兒讀好大學先。她說:「我哋𠵱家成日都傾緊喺香港定係外國讀大學好。」網上圖片

左起:林卓毅 11歲、林愷鈴 14歲

龔慈恩經常同兩子女一齊,微博經常放兒女合照。她說:「佢哋開始大喇,唔可以管得太緊,要畀空間佢哋。」網上圖片

龔慈恩覺得朗誦學到 EQ同埋認識到中國文化,兒子及女兒都有玩朗誦。她說:「個仔似足老豆,鍾意運動多啲。」網上圖片

二代想入行!

今年特別多星二代蒲頭,龔慈恩個女唔知幾時入行,不過關禮傑個女關楓馨,就已經出埋騷賺錢,而翁靜晶大女劉萬儀本週一( 17日)亦首次接 job。有兩個律師牌嘅佢,竟然律師都唔做,仲簽埋畀 Calcarries做樂基兒師妹。

劉萬儀 27歲

關楓馨 19歲



鍾意就快D Share啦!