掃呢頁CODE去手機

2014年12月4日 星期四

[壹週刊 - 1291] 巨星排場 大陸拍劇  Janice Man擺老細款 Janice Man,文詠珊,M1,




近日身處橫店開工的 JM,被工作人員指國語差兼戲屎。

探熱針

巨星排場 大陸拍劇  Janice Man擺老細款

投靠黎明掌控 A Music五年, Janice Man(文詠珊)被同期的 Angelababy遠遠拋離,事業大落後,滿約即閃,今年五月以三千萬身價轉投 Paco揸弗的太陽娛樂,並自組 lable「 JM Workshop」做老細。轉會第一炮,接拍大陸劇《畢業歌》,現正身處橫店開工的她,排場十足,出入有三名工作人員傍實,住五星酒店,對住助手全程黑口黑面,老闆娘,好架勢!

戲服改完又改

第一次接拍大陸劇, JM與內地女星李小冉及台灣演員王耀慶做對手,要在橫店埋位三個月, JM要求巨星級待遇,三名工作人員全天候服侍外,又指定入住當地五星級酒店。待遇星級,要求同樣升級。

「佢都幾難服侍,可能因為做過模特兒,所以對啲戲服特別要求高,改完又改先啱心水。但劇組就有人笑 JM啲戲咁屎,普通話又差,啲衫著得幾靚都冇用!」

上週 JM在車敦片場開完工,與劇組人員到附近的日本餐廳醫肚後,便直接返回位於松江區的假日酒店。

收工時,大班工作人員傍實 JM離開,排場勁過國際巨星。

開工期間 JM全程燶口燶面,生人勿近。

JM要綁鞋帶,叫女肋手幫手拎住杯咖啡,對方反應慢半拍, JM即面露不悅。



嫌助手反應慢

翌日冇通告,零妝面青青的 JM與女助手離開酒店到 Starbucks買咖啡,行行吓甩鞋帶, JM示意女助手接過她手上杯咖啡,但對方反應遲鈍, JM即時嘴藐藐,露出不滿神色。

兩人會合另外兩名男工作人員後,一同到附近行街,對住女助手面燶燶冇厘交流的 JM,跟兩名男伴有講有笑,重男輕女。

其後一行人走入一間餐廳食米線, JM公主病發,一邊食一邊嗌熱,只見她不斷皺住眉,極不耐煩;之後索性做「低頭族」,不停㩒電話、發短訊,三名工作人員見老闆娘心情唔多靚,全程不發一言。

食完,由 JM埋單,老闆娘,做全套!

食食吓米線, JM發爛渣嗌熱。

榮升老闆娘的 JM,食完嘢識做找數。

對住異性工作人員, JM頓時開懷,跟對方有講有笑。

有劇組工作人員指 JM對戲服要求多多,一改再改。

今年五月, JM以千萬天價轉會,加盟 Paco旗下的太陽娛樂。



鍾意就快D Share啦!