[FACE - 393] 婦唱夫隨 老公陪節食 露髀關心妍：好好服侍佢！ 關心妍,BKD_S,MF,

休養 1年的關心妍（ Jade）全力造人未成功，今年決定重投歌唱事業，上週五（ 28日）舉行一連兩場《關心妍《說》演唱會 2014》， Jade化身 C-12同男 dancer大跳辣身舞，瞓身演出。

真面目

婦唱夫隨　老公陪節食　露髀關心妍：好好服侍佢！

早前化身「 C-12」唱盡時弊嘅關心妍（ Jade），上週五（ 28日）一連兩晚喺九展開個唱。

事隔 2年再開個唱， Jade今鋪都可謂「豁出去」， fit爆身形襯性感服裝，又加插熱舞、 dancers火辣互摸環節，勁有睇頭！

雖然騷前 Jade抱恙在身，不過有個「廿四孝」老公楊長智喺後台打點一切，上至服裝，下至提神用嘅香薰座都全程跟足，難怪 Jade事後冧爆咁話：「我之後會好好服侍番佢！」

為挑戰個唱準備嘅性感歌衫， Jade騷前喪操三個月，每日只可食枝豆、麥包或香蕉，最終減去 12磅兼練出六嚿腹肌同人魚線，開騷前一刻更加冇放鬆過，一樣以白烚菜同肉片來送飯，難得連老公都肯陪節食！合拍到咁呀！

Jade開騷，老公楊長智變身成功女人背後的男人，一直在後台支持老婆，好幸福。

兩場個唱， Jade的八個造型明顯落足心機設計，其中好友設計師 Kenneth Chan更度身訂造開場的水晶長裙同粉紅 deep V短裙，令到身形超性感嘅 Jade可以盡騷本錢！身形同服裝靚爆， Jade跳舞亦冇欺場，同 dancers又攬又摸，全場熱血沸騰。

後台 check歌衫

上週六（ 29日）尾場， Jade邀得 15年前已封為偶像的古巨基做嘉賓， 2人在台上合唱時， Jade即表現到好似 fans妹咁，好怕醜。

Jade台上贏盡掌聲，至於富老公楊長智就在後台幫老婆打點一切，包括所穿嘅八套性感歌衫，老公都係檢查完又檢查，確保所有衣服冇任何甩漏先鬆一口氣。

另外，細心嘅楊長智發現 Jade在後台預備的香薰座已經用完，佢即刻第一時間幫佢更換。有個「廿四孝」老公傍住， Jade事後接受本刊訪問說：「老公陪我一齊節食，佢都瘦咗 10磅，所以我之後都會好好服侍番佢！」

夾胸打跟斗

個唱中， Jade除夾出 3吋長事業線大騷性感外，仲表演高難度打跟斗動作。 Jade自爆練習時曾拉傷筋，搞到去廁所都痛。

透視珠片

穿上由好友設計師 Kenneth Chan設計的透視長裙， Jade纖幼身型表露無遺。

露埋背

為演唱會狂操 3個月， Jade把握機會，將白滑玉背展露人前，超索。

總動員出動

雖然開騷期間， Jade有啲病病哋，好彩有阿媽同阿哥到場打氣，而老公楊長智無論台前及幕後都跟到足，今次開騷成功，真係要慰勞一下老公咯！

Jade同家人一向感情要好，除阿媽外，阿哥更帶埋囝囝由加拿大飛返香港，走入後台為 Jade打氣。

開騷前老公楊長智，不停在後台為 Jade打點出場服裝，連香薰油甚至香薰座都跟到足，真係廿四孝老公。

擔任嘉賓的許廷鏗，親自走入後台同關家姐打氣，更大讚 Jade係一個好有義氣的家姐。

出場前， Jade只可以食麥包及去油豬肉飯充飢，盡量 keep住最佳狀態。

鍾意就快D Share啦！

下一篇 》