掃呢頁CODE去手機

2014年12月10日 星期三

[FACE - 394] 鋒菲合體 蒲頭贈興 栢芝放下:衷心祝福佢哋 鋒菲,王菲,栢芝,謝霆鋒,MF,




首開腔

上週五( 5日)栢芝現身多人又多狗仔隊的時代廣場,容光煥發首度對舊愛戀情開腔:「衷心的祝福!」

封面

鋒菲合體 蒲頭贈興 栢芝放下:衷心祝福佢哋

呢個世界有樣嘢叫寃家路窄,本來一個喺北京落戶深閨簡出,一個移民去新加坡湊仔為樂,王菲同栢芝,你有你嘅生活,我繼續我嘅忙碌。

又會咁啱,一個孖住霆鋒返港為閨蜜嘉玲賀生日,遇着另一個難得留港消費選購聖誕禮物。上週五( 5日),「鋒菲」在港合體同一時間,栢芝就帶埋經理人助手一行四人行老銅。被本刊撞到正,被問到會否祝福「鋒菲」復合時,栢芝不知心情幾好,連講 3聲會,「會會會,衷心的祝福!」








有仔陪嘅王菲夠風騷,得經理人助手圍的栢芝亦不弱,比三個月前更圓潤更精神。

栢芝向記者坦承,專程回港為職員選購聖誕禮物,老闆娘送禮物,隻隻都係過萬名表。

離港前最後一晚,王菲單拖赴宴賀嘉玲 49歲生日,雖然企定定合作任影,不過王菲就繼續沉默不答問題。

上週五( 5日),世紀復合三個月的王菲同霆鋒,終於拍拖拍到返香港,而同日,霆鋒前妻栢芝亦都帶埋經理人、助手出現銅鑼灣,齊齊響應 689呼籲回港「鳩嗚」。王菲「鳩」到去中環,一袋二袋由男朋友仔霆鋒出動保姆車接返寶雲道「鋒巢」,全港傳媒為之癲狂,全程直擊「鋒菲」和將滿 18歲的靖童一家三口再次合體。而另一邊廂的栢芝,除了被本刊撞破行蹤,隨行經理人、助手亦都在微博全程直播「鳩嗚之行」,疑似存心同鋒菲打對台搶收視。

送 3萬 6名表

當天下午約五點,栢芝與一男一女兩個助手加上經理人 Emily在銅鑼灣時代廣場出現。鋒菲復合時曾經在內地真人騷病到入廠我見猶憐,這次在香港蒲頭,栢芝明顯圓潤咗又豐滿咗,容光煥發神態輕鬆。一到埗就一行人一支箭走進表鋪,指指點點談笑風生。

一見大客光臨,表鋪即派出至少三位職員專人服侍,而栢芝亦都不負眾望,短短十數分鐘就拍板買走男女裝手表各一隻;幾乎同一時間,經理人 Emily上微博晒聖誕禮物,原來栢芝拉隊揀聖誕禮物, Emily手上隻卡地亞 Ballon Bleu De Cartier盛惠港幣 3萬 6,對上一次強國騷就閒閒哋袋五百萬人仔的栢芝來講,濕濕碎!

鋒菲合體回港,但分體飲宴,霆鋒去賀蘇永康婚宴,王菲則獨自應約出席嘉玲派對。網上圖片

王菲在嘉玲生日派對上心情靚靚,任集郵唔嬲!網上圖片

週六( 6日),快滿 18歲的童童淡定陪着阿菲拍拖見霆鋒,甚有其母風範。

鋒菲 1.4億買 陳家瑛淺水灣屋

00年姐弟戀首次結緣、 03年翻撻再次無疾而終,鋒菲戀歷經 14年離合後今年 9月世紀復合,今次兩人明顯愛得更無負擔,更疑似有下一步行動。據地產界人士透露,王菲、 Eason經理人陳家瑛於 11年以 1.17億購入的淺水灣道 56號特色戶近日有望以 1.4億轉手。賺得 2千 3百萬就肯賣,原來係俾鋒菲睇中做愛巢,經理人呢次係薄利讓愛!

除咗回港賀好友婚宴、生日宴,據悉鋒菲此行最大目是睇中陳家瑛淺水灣豪宅,約埋睇樓。《蘋果日報》圖片

陳家瑛入手三年淺水灣道 56號豪宅屬特色屋,有平台有泳池,難怪鋒菲一眼睇中。《蘋果日報》圖片

祝福鋒菲戀

唔只買嘢爽手,連面對記者問題,栢芝亦答得爽快。被問到表鋪行有咩戰利品,栢芝笑笑口回應:「特登返嚟帶啲員工買禮物,佢鍾意表呀!」邊講邊伸手指向經理人 Emily:「心意呀!心意(出手好闊綽?)佢哋都好錫住我!」

問到有冇送表俾男朋友,估唔到栢芝口快快答:「有!一個 Winnie the Pooh,一個 Ben 10! Lucas鍾意 Ben 10!」明明扮聽唔清楚,但一聽記者講「鋒菲」,栢芝就醒晒,「聽緊嘢呀!你睇我唔到,我又聽你唔到!」再問會唔會祝福,先正正經經肯答,「會會會,衷心的祝福!」祝福完即走夾唔唞入𨋢再同傳媒 say goodbye。

前後腳返京

向經理人公司攞咗長假,霆鋒少有做跟得男友,陪完王菲去大理、再陪返港,週一( 8日)再前後腳出現機場,齊齊回京。

栢芝 ig鋪經文

雖然冇仔陪,栢芝有信仰有一對寶貝仔,在其私人 Instagram便可見其實活得相當充實自在。網上圖片

網上圖片

栢芝更上載一段聖經經文,話到明放手需要堅強,得到更好的需要智慧。網上圖片

「鋒菲」返港睇樓

網上圖片

話說栢芝返港買聖誕禮物,「鋒菲」返港就唔只為嘉玲賀壽咁簡單。相隔 11年再翻撻,「鋒菲」今次唔只戀得難捨難離日見夜見,更是有計劃有部署,專登向英皇請長假的霆鋒,絕非只係要陪王菲煮飯仔。

據地產界人士透露,今次兩人專程回港睇樓長住,二人更鎖定王菲經理人陳家瑛於位淺水灣 56號的豪宅,傾掂數用 1.4億請陳家瑛割愛,今次誓要修成正果!

預告再婚

鋒菲返港拍拖,栢芝呢期亦高調回流,唔只買聖誕禮物氹員工,仲接受劉美娟電台節目《 1+寶貝》深情訪問,大談單親媽媽辛酸,仲話一定要再婚添!

講 Lucas入院

當時 Lucas還問我,「媽咪我是不是會死」,我一個人在醫院喊,覺得好無助,安撫不到他的恐懼,自己都有喊。

講再婚

會,我一定會再婚,但唔係為咗兩個仔,係為咗自己,因為我一直冇放棄過愛情!

講未來老公

老公,多謝你!多謝你咁愛我!

講父母

佢哋離婚時家姐和細佬都喊晒,但我沒有,反而拍手笑住叫支持,我覺得他們一起不開心,他們永遠是我們的爸媽,就算分開都依然愛我們。

戀愛遊戲最終篇

由謝霆鋒、張栢芝、王菲、陳冠希四人領銜主演的跨世紀史詩式 N部曲戀愛鉅製上畫大大話話都 14年,兜亂再兜亂、翻炒再翻炒,四位男女主角睇怕都仲未玩夠,唔知各位花生友點睇,但《 FACE》真係見有小小悶建議見好就收,嗱嗱聲拍埋個大結局!

王菲

《蘋果日報》圖片

建議情節:生完童童要京港兩地走、生完李嫣又搞離婚要搬屋,今次阿菲真係嫁得成霆鋒,就有望唔使兩頭騰,新屋入伙後全心全意諗下間 BB房點裝修。

花生友激評:童童兩歲就識霆鋒哥哥,希望阿菲第三胎唔會幾歲人仔又見識媽咪識另外一位新哥哥。

謝霆鋒

《忽然 1周》圖片

建議情節:若果阿菲真係再生過,霆鋒又多個機會拍多輯《 12道奶味》,既可上阿爾卑斯山攞雪水沖奶奶重建慈父形象,亦可掠多筆人仔。

花生友激評:唔好淨係學碧咸係咁生,唔該學咸爺湊下 B、真係過下自己手好!

張栢芝

圖片

建議情節:相信戀愛,繼續開紅酒、識新仔,隨時準備閃婚。上一代嘅恩怨喇喎,第時等 Lucas同 Quntins去報都唔遲。

花生友激評: let it go罷啦,其實強求真係冇幸福。

陳冠希

網上圖片

建議情節:第 N次墮入愛河、第 N次搵到結婚對象、第 N次出軌速食整容𡃁模。

花生友激評: Edison前世應該係皇帝,做得佢女人應該[容�,要同N個第三者共同擁有,不過呢啲女應該坐火箭都搵唔到。



鍾意就快D Share啦!