掃呢頁CODE去手機

2015年1月9日 星期五

[忽然1周 - 1015] 救救亞視 特惠超值套餐 亞視,MW,




靚抽王

救救亞視 特惠超值套餐

近日亞視推出 3萬蚊廣告套餐,正所謂靚歌靚衫靚早餐,計埋每個 30秒廣告都只係收你 375蚊,平過離婚!一日未死一日都有笑話嘅亞視,呢期唔掂就係人都知,出俾員工嘅去年十一月份糧到截稿為止都係得半份,而且嗰個智慧唔太高兼錢太多嘅白武士至今都未出現,認真慘豬。有見及此,我哋 S橋王決定幫幫佢,幫佢諗啲絕橋,翻身呢就唔敢講,吊多幾個月命聽多幾個笑話都好!

設立新節目

嗱,搞電視台呢家嘢呢,淨係靠 loop來 loop去嘅陳年節目,係唔夠㗎!我哋要有新元素,以下節目係我哋幫你度嘅,睇嘢

1.《人樂無窮》——亞視曾經有一個別開生面嘅節目,叫做《魚樂無窮》,顧名思義,就係影住魚缸啲魚游來游去,娛樂性十分豐富。據說當時推出係為咗取代休台時段嘅測色板,以增加收視。好!我哋就 set個 cam喺亞視大門口,整個《人樂無窮》,睇住啲迎難而上嘅亞視員工喺門口行來行去,一定高收視過《魚樂無窮》啦。人定勝魚嘛!你話係唔係?

2.《低智森盡訴心中情》——亞姐出身嘅羅霖,二話不說就俾錢贊助亞視,叫做盡番一啲心意。相反某啲硬撐亞視嘅人,就得把口……好似低智森咁,嘴巴說支持,荷包卻很誠實。既然係咁,都俾個機會佢哋!唔講金,講心,出嚟做個節目,乜都唔准講,淨係准講佢哋對亞視幾有感情,一係你免費幫亞視拍個《我和低 B有個約會》囉,講到咁偉大!

3.《孖兄弟獻唱》——亞視執行董事葉家寶到今時今日都仲死守亞視,都算係個值得尊敬嘅好漢。不過你哋呢,覺唔覺得呢,佢有啲熟口熟面?個人認為,佢有啲似上年唱〈從不喜歡孤單一個〉嘅朱主席呀!既然係咁,不如整個孖兄弟獻唱啦,再唔係搵埋王征同王晶一齊跳舞耍螳螂拳囉!收視一定好過晒啲重播節目

推出平民廣告套餐

嗱,今時今日淨係靠廣告商係唔夠㗎!既然廣告價已經咁低,不如玩大佢,等所有市民可以一齊玩啦,以下係我哋幫亞視度嘅平民廣告套餐,睇嘢啦:

設立亞視博物館

據說,亞視個服裝間啲衫,因為長期冇洗,所以服裝間係臭的。加上成棟樓多年來都冇乜點裝修過,正所謂風塵僕僕,雖未至於搖搖欲墜,但係都不失為一棟古老建築。一於咁當佢係博物館咁展示文物,吸引人俾錢入場。嗱,呢件衫呢就萬二蚊着過嘅,呢隻牙呢就係阿殭屍尹天照同陳啟泰都戴過嘅……點解佢哋都戴過?係有段古㗎,話說當時公司淨係夠錢買一副殭屍牙,咁惟有幾個演員些牙嚟用囉……

溝埋一齊做 HKATV吖笨

係囉,正所謂溝埋一齊做瀨尿牛丸吖笨!不如直接播 HKTV啲節目啦,一個冇牌但係想做,一個有牌但係唔做,兩者一定一拍即合,就溝埋一齊,叫 HKATV

S橋王

每期 S橋王幫娛圈偽人偽事度橋脫身。你知啦,呢行好複雜,有乜事俾人捉到正,好大鑊㗎嘛!不過唔緊要,我哋會為你出謀獻策嘅! Super~~



鍾意就快D Share啦!