網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2015年1月9日 星期五

[忽然1周 - 1015] 獨家 鬥贏胡老太唔夠一年 胡漢清江希文驚爆分手 江希文,胡漢清,MW,




憔悴拒回應

本周三( 7日),江希文獨自外出到香港仔逛超市,對於分手等提問,她不斷耍手拒回應。現場所見,不施脂粉的她,面容頗憔悴。

打頭陣

獨家 鬥贏胡老太唔夠一年 胡漢清江希文驚爆分手

去年 5月,江希文帶着與資深大律師兼基本法研究中心主席胡漢清所生的囡囡,係威係勢從英國返港,入住奶奶胡老太莊永楚住過的沙宣道大宅。胡漢清亦愛屋及烏,對江希文一家照顧有加。胡老太則已避走加國,孤獨過活。

以為江希文從此印印腳過着少奶奶生活,本刊卻收到可靠消息,近月胡江二人忽然感情破裂,更火速到「冇得掹」地步。

周二( 6日)記者向胡生求證,他直認不諱:「我哋兩個月前已經和平分手。」真係唔到最後一分鐘都唔知邊個係贏家。








前年有傳江希文與胡漢清在英國奉女成婚,之後胡老太公開力數胡江二人,為家產而母子決裂,鬧至滿城風雨,至去年事件總算得以和解。雖然胡大狀已 63歲,本身與第二任前妻余慧敏亦育有一子一女,但對老來再得女仍感到驕傲,視與江希文的愛情結晶如寶貝般。

坦認分房瞓

本周二( 6日),胡漢清坦白向本刊承認與江希文已分手兩個月,更表示現時兩人同住大宅但分房瞓。

相差 18載

胡漢清和江希文年紀相差 18年,但一撻即着。有指 2012年兩人在英訂婚,但胡老太拒絕出席訂婚儀式,但其實兩人最終都未有正式註冊結婚。

從未註冊結婚

本刊收到消息,一心以為標到尾會的江希文,雖然返港後一直居住在胡家大宅,光明正大成為大宅女主人。但其實她本身冇任何業權,更甚者,其實江希文與胡漢清根本沒有正式註冊結婚。近月她亦因為相處問題,與胡漢清吵大鑊。在兩個月前,兩人更弄至分手收場,雖住同一屋簷下,但早已分房瞓。

向友人傾心事

12月 30日,江希文帶住歲半女外出食飯,雖然沒有胡漢清在身邊,但有女友人陪伴傾心事,總算不愁寂寞。女兒亦相當乖巧,全程未有扭計,其樣子亦似足媽咪。

為女兒辦證

當日江希文去過入境事務處,相信是為女兒領取證件。

鳩嗚解愁

12月 29日,江希文與同一女友人到銅鑼灣行化妝品店,不過她睇電話時間仲多過睇化妝品。

承認分房瞓

胡漢清與江希文拍拖後,與江家上下關係不俗。 13年他與江父母、江欣燕及當時仍是江欣燕老公的吳積遜晚膳,兩老更有禮物收。

周二( 6日)下午,本刊在中環發現正回律師樓的胡漢清,他向本刊獨家親證與江希文已分手。

記:近排你係咪同江希文感情亮紅燈?

胡:係,我哋兩個月前已經和平分手。

記:但見佢仲喺大宅出現喎!

胡:我哋仲係住同一間屋,但分開住。

記:即係分房瞓?

胡:係呀!

記:咁江希文同小朋友會唔會返英國?

胡:佢決定唔返英國……覺得香港適合佢多啲……依家嘅問題係處理細路哥嘅安排,最緊要細路哥嘅利益。

說罷便以「趕住開會」為由急步離開。約一小時後胡漢清步出公司,記者再追問如何安排女兒生活等問題,他笑着表示:「我唔會再答㗎喇, thank you!」便匆匆步入交易廣場。事後他再經中間人代為回覆,承認與江希文沒有註冊結婚。

不肯返英成導火線

其實去年 6月,本刊拍得胡江二人與當時 1歲的囡囡、江希文父母及江欣燕在數碼港嘆茶聚天倫,關係仍十分親密,但估不到事隔半年二人原來已分手。據知兩人分手的導火線源於女方言而無信,不肯離開香港。

知情人透露:「其實 Alan(胡漢清)最初冇諗過同 Liz(江希文)生小朋友,因為佢結過兩次婚,一仔一女都讀中學,再生小朋友即係搵自己笨。但 Liz好叻女又好口才,𠱁下𠱁下又俾佢有咗,咁既然有咗咪生囉。 Alan都好鍾意囡囡。但當時佢哋協議係 Liz會同個女喺英國定居,加上嗰陣胡老太又開記招,鬧 Alan趕佢出大宅同爭家產,搞到咁大件事, Alan梗係叫 Liz唔好返香港不過舊年 Liz又𠱁又𠼮話好掛住香港嘅屋企人,阿女都成歲啦,想帶佢返嚟見吓公公、婆婆,順道搞吓啲證件,仲實牙實齒只返嚟兩個月就會乖乖返英國,但到依家都唔肯走。其實佢覺得同 Alan咁耐都冇樓揸手,有啲唔甘心!」

沒收座駕

江希文自去年 5月強勢返港,就獲御准駕駛胡漢清的藍灰色 Audi房車。不過近日只見她每次外出都駕駛其 08年落地,市值十多萬元的 mini cooper。

揸番自己車

周三( 7日)胡漢清如常上班,駕駛該 Audi房車,明顯生活已各有各。

每月索家用

不過江希文勢估唔到竟然會因此人財兩失,知情人續說:「自從 Liz死都唔肯帶阿女返英國, Alan已經好唔滿意,因而嘈過幾次。之後再因為 Liz好似貪得無厭咁,個個月都話個女要買乜學乜,問 Alan攞萬萬聲家用,仲試過攞 6位數字,搞到 Alan好煩,覺得佢只係識講錢。 Alan雖然讀番書,但始終中國人思想傳統,覺得女人專心湊仔。呢方面 Liz唔及格啦,成日躝街,幾乎日日都要出吓街先安樂,感情唔轉淡先奇。呢兩個月佢哋喺埋同一間屋都冇偈傾。」

本刊連日發現,江希文的確唔黐家。上月 29日下午,她獨自駕其 mini cooper座駕到銅鑼灣,原來約了女性友人濕平。不過過了短期豪門少奶生活的江希文,這天比較樸實,沒有逛名店,反而駐足平民化妝連鎖店「莎莎」。友人在揀護膚品時,她又顧住篤電話且心不在焉。之後二人再到平價食店茶木排隊等吃飯,完全不似闊太。

去年一家親

老來得女的胡漢清,對女兒愛護有加。去年 6月,本刊拍下他跟江希文一家在數碼港午膳,其間胡一直左手抱愛女,右手夾食物。

去年 8月,胡江二人感情要好時,江希文曾在微博上載合照,並留言「最愛家人」,惟不出四個月便此情不再。

有家姐支持

江希文多年來感情坎坷,而家姐江欣燕亦月前跟吳積遜離婚,相信兩姊妹互相扶持。記者亦致電過江欣燕,但她一直未有接電話。

公開𢱑撈

江希文出道逾廿年,惟半紅不黑,身材惹火的她,試過走性感路線。

翌日早上,她獨力孭住女兒往灣仔入境事務處,疑為女兒補領證件,而昨天陪她的女友人再度同行協力湊女。她領完證,再到超級市場陪友人掃日用品,至晚上才返家。

本周三( 7日),記者趁江希文再次外出,駕車到香港仔超市買餸時,就與胡漢清分手和女兒安排問題訪問她。一臉憔悴的她未肯正面回應,只不斷說:「你唔好問我咁多」

息影多年,現已 45歲的江希文,頓失經濟靠山,心中徬徨可想而知。難怪日前她現身美食展活動時開晒口𢱑撈說:「我依家冇戲癮,但有歌癮,如果有適合嘅工作都會考慮。」似乎自鋪後路搵銀。

白姐姐一早唔睇好

在胡漢清與母親莊永楚的金錢糾紛事件上,胡老太契女白韻琹一直是聯絡人兼發言人。周三( 7日)本刊致電白姐姐,對於胡江二人分手,雖然她並不知情,但反應平和,似乎一早預計會發生。白姐姐更坦言:「佢(胡漢清)唔會同一個女人咁耐!」

白:乜佢哋分咗手咩?我唔知喎!同佢哋冇聯絡。

記:咁胡老太知唔知?

白:佢一早當冇咗呢個仔。

記:有冇聽過佢哋根本未註冊結婚?

白:我知佢哋係冇註冊,姓胡嘅好多物業資產,唔會咁戇居。

記:你有冇諗過佢哋咁快分手?

白:佢唔會同一個女人咁耐!而且佢同呢個女人(指江希文)一齊都降咗價(自降身價)!」

白姐姐還表示現時胡老太身在加拿大,而且身體健康,更說可聯絡胡老太回覆記者,惟截稿前仍未有消息。

2013年,白韻琹傍住胡老太跟記者做訪問,力數胡漢清不是。

《蘋果日報》圖片

江希文冇樓揸手

表面上,江希文入住胡家沙宣道大宅,但實質業權則只屬胡漢清一人。一直有投資物業的胡漢清, 96年以 1,340萬購入大宅,至今已升值至逾 1億。

胡家大宅樓面面積逾 4千呎,門外有空地可泊至少三架車。

爭鬥大龍鳳

一直以來,胡漢清和江希文都是站在同一陣線夾攻胡老太莊永楚,有女在手的江希文即使對着奶奶亦絕冇退讓。經過一輪惡鬥之後,胡老太去年已搬到加國,奈何最終胡漢清和江希文這一對亦分手收場,果然人生如戲。

《蘋果日報》圖片

開記招怒斥兒子

13年 3月,當時已 84歲的胡老太由白韻琹和謝偉俊陪同開記招。她哭訴兒子胡漢清侵佔其 2,000萬家產,指控他不孝,又禁她返回沙宣道大宅,要求歸還上海大宅和 1,150萬元賣樓收益。胡老太直指兒子與江希文一起之後,整個人都變了,更沒有供養母親,自己要變賣首飾過活,又遭江希文拒於屋外。

江發微博呼寃

當時正在英國待產的江希文,突然連發十三條微博為自己和胡申寃,透露胡漢清一早希望母親可搬回港或上海同住,只是對方決定在加拿大買新屋長居。指胡老太向傳媒說是胡漢清趕她離開,是偽造事實來傷害他們。

胡老太加國獨居

同年 4月,兩母子共同發聲明,指經調解員的積極調解後,已達成和解。兩人簽下和解協議,完成大宅業權交收手續後,胡老太便避走加國獨自生活。

江希文坐正

14年 5月,本刊發現在英國為胡漢清誕下女兒的江希文返港定居,以勝利者姿態正式進駐夫家沙宣道的億元巨宅。

用肚箍佬 慘變棄婦

不少圈中女星都以嫁入豪門為目標,更自以為用個肚可以箍實身邊有錢男,甚至嫁入豪門。但時代已經變了,即使誕下龍種一樣可以變棄婦。

張栢芝

張栢芝自 08年爆出慾照事件後,一度有傳謝霆鋒會與她離婚。但離奇的是, 09年尾栢芝再懷孕,外界有感她和霆鋒關係和好如初,惟最終仍離婚收場。

梁洛施

梁洛施為小小超李澤楷兩年抱三,誕下 3個金叵羅兒子後,當外界都以為她勢必嫁入首富豪門之際,李卻在 11年 4月戲劇性地宣布他和梁洛施分手。

吳佩慈

吳佩慈以為為身家百億的富商男友紀曉波誕下女兒,就可以得到名份,更三番四次自爆快將與男友結婚。怎料紀曉波一而再傳出有小三,只肯出錢照顧吳佩慈兩母女,吳最終豪門夢碎。



鍾意就快D Share啦!