掃呢頁CODE去手機

2015年1月30日 星期五

[忽然1周 - 1018] 亞視有轉機 張慧儀得罪大台貼錢撐 亞視,張慧儀,MW,




當日張慧儀向記者表示:「亞視有好多舊同事,當探吓舊朋友」

娛樂喧

亞視有轉機 張慧儀得罪大台貼錢撐

上周五( 23日),亞視搞《萬眾同心撐亞視》救亡騷,節目由少數藝人及屋邨大媽義演,平均收視 1點,總算是「零的突破」。

不少圈中人對亞視有情有義。好似曾為亞視拍《影城大亨》的張慧儀,便不惜得罪大台,上周三( 21日)自行出錢梳頭、化妝、置裝,貼錢為亞視錄影節目。張慧儀仲話︰「我真心嚟支持,同行應該支持!」

本周一亞視的「截標期」前,終於有多於四間公司有意入標亞視。有白武士,又有明星撐,亞視終露一線曙光。

上周五( 23日),亞視總動員演出「救亡騷」,碌盡人情卡請來唔少藝人義演,卡士麻麻總好過冇。代表 now TV的梁思浩亦罕有撐場,即場上演《娛樂審死官》寸亞視老闆王征︰「依家水深火熱,唔好掛住唱 K。」節目最高收視總算有 1.5點,平均收視 1點,算是零的突破。

其實有不少明星亦低調支持亞視。好似張慧儀,去年拍曾志偉監製的《女人俱樂部》,叫好叫座,本來埋到大台堆,但為了撐亞視,她寧冒險得罪大台。上周三( 21日)她到港台為節目錄音後,趕入亞視為《 ATV這一家》免費做嘉賓,一拍就是半小時。當日所見,張慧儀入亞視前,自費化妝、 set頭,至於接她入廠的積架房車,司機亦是亞視員工捱義氣幫手。

執靚錄影

上周三( 21日),張慧儀到港台錄音,再入大埔為亞視錄影《 ATV這一家》。之前一日,本刊拍到她先去做 facial扮靚。

義工接載

上周三,一架「積架」由港台接張慧儀入亞視。其實這架車是臨時安排,司機更是亞視員工捱義氣做「柴可夫」。

當係探老朋友

張慧儀表示,今次是為亞視救亡節目《 ATV這一家》做錄影嘉賓︰「我嚟支持吓,希望盡我少少力俾啲正能量佢哋。(上節目冇錢收仲要倒貼?)哎吔……我哋唔講呢啲我真心嚟支持佢哋,唔好講倒貼,純粹當係探吓舊朋友。(你怕唔怕大台嬲呀?)唔怕,我依家自由身。同行應該支持,依家佢哋咁嘅情況,我都唔係做啲乜嘢吖!」

知情者說︰「亞視依家呢個環境,莫講話嘉賓冇梳頭、化妝同服裝費,連車馬費同接載車都冇,所以要搵嘉賓上節目好難。劉錫賢同慧儀拍《影城大亨》時認識,兩人識咗十五年。劉錫賢係《 ATV這一家》主持之一,佢開口叫到,慧儀即刻應承,好念舊!」

星光暗淡

亞視上周五的救亡騷,出場者多屬大媽及奀星。大家熟悉的亞視人,只有劉錫賢、魏秋樺、朱慧珊。至於立法會議員梁美芬都有捧場,更指當日是「傳媒史光輝一頁」,貫徹整個節目的騎呢風格。

思浩玩嘢

梁思浩即場上演《娛樂審死官》,佢當場叫袁潔儀同劉錫賢向演藝人協會求助,又話:「打俾成龍佢大把錢!」句句夭心夭肺。

救亡騷除了由一班亞視藝員演出,仲有顏福偉及屋邨大媽表演歌舞。

四買家揼二百萬

柳暗花明,亞視於周一( 26日)的招標期限,據悉有多於 4間公司入標,有意購買亞視大股東黃炳均手持的 10.75%股份,經理人德勤需一至兩周時間審閱及考慮標書。有消息指,嘉華集團主席呂志和、英皇集團主席楊受成、遠東發展主席邱達昌、麗新發展主席林建岳可能是潛在買家,當中更有四名準買家各墊支 50萬予亞視。

新股東要睇定啲至大開水喉,但下周一( 2日)勞資審裁處會就 88名前亞視員工的索償欠薪個案作出聆訊,之後這批員工能啟動清盤及申請破欠基金的程序,取得欠薪。亞視前途,仍未樂觀。

張慧儀曾為亞視演出《我和殭屍有個約會 II》及《影城大亨》。在《影》中,陶大宇扮演邵逸夫,而張慧儀則飾演邵逸夫第一任太太。

張慧儀和劉錫賢在《影城大亨》分別飾演陶大宇妻子及兄長,兩人有不少同場戲份,因而熟落。

大台派片唔派人

大台雖然都有俾旗下藝人撐亞視,不過就只限拍片俾亞視播,真人就唔俾過亞視,而且全部短片,冇真人上陣。方丈果然係好小器。

笑容搭夠

「大家繼續努力,明天會更好!」雖然都係行貨,不過蔡少芬笑容搭夠,都好過郭晉安嘅。

詩意祖藍

「 ATV嘅員工,真係令我好感動。幫你加加油,希望有啲用。」祖藍連打油詩都出埋,算係有諗頭。

Hea爆視帝

「加油加油,大家加油!」講咗八個字,仲要講咗三次「加油」,郭晉安呢個視帝,都真係幾 hea。

鍾意就快D Share啦!