掃呢頁CODE去手機

2015年1月15日 星期四

[壹週刊 - 1297] 世紀港女 轉性 杜如風女人街同師奶搶平衫 杜如風,BKD_S,M1,




探熱針

世紀港女 轉性 杜如風女人街同師奶搶平衫

在大台節目《流行首爾》中自爆屋企有過千對高踭鞋,加上大晒珍藏名牌,令主持杜如風被封為「世界級港女」。劣評如潮,不過杜如風話之你,繼續鳩嗚:「收視高咗添,啲人又要鬧又要睇。」

天生購物狂,日前本刊更發現杜如風現身旺角女人街,到平價二手衫店美芝入貨,名牌 cheap貨乜都啱,當日杜如風專攻 50蚊平貨,仲同外傭、師奶鬥逼,果然以買衫為終身事業!

同外傭爭位

平日一身名牌的杜如風,日前素顏、戴眼鏡街坊 look現身旺角女人街,單拖到平價二手衫店鳩嗚。當日店內逼滿外傭和師奶,杜如風專攻五十蚊平價冷衫,再掃多兩件各值一百二十蚊的冷斗篷,滿載而歸,埋單五百蚊有找,抵!

杜如風直認十幾歲已經在美芝買衫:「買到有九折卡,最平試過十八蚊買咗件冷背心。我鍾意 mix and match,捐窿捐罅尋寶。同徐濠縈去外國,都會去跳蚤市場。」

對於被指物質主義,她理直氣壯:「買衫係興趣,我又唔飲酒又唔賭馬,都俾我買吓衫吖!其實我乜嘢都儲,一個垃圾婆,除咗衫,仲儲鞋、頭飾、太陽眼鏡。唔識講有幾多衫,唔通逐件數咩。我從來唔丟衫,因為潮流係一個循環,譬如突然興番八十年代,我有真係來自八十年代嘅衫,咁咪仲威。但我媽成日丟我啲衫,佢話冇地方擺,其實我啲衫一間房都擺得晒。多謝個鐘點工人,幫我收藏得好整齊,想搵乜即刻打俾佢,冇咗佢唔掂!」

杜如風尋到大堆「寶物」,包括兩件斗篷和幾件衫,埋單五百有找,但老闆娘已當她是豪客。

杜如風是二手衫店熟客,雖然店內地方好逼,但一點都難不倒她。

日前素顏、戴眼鏡的杜如風,單拖到女人街二手衫店同師奶、外傭一齊搶平衫。

冇使男人錢

至於被指是世界級港女,杜如風反駁:「其實點為之港女?我一路以為係指好攻心計,好識勾住男人,使男人錢。其實我同男友去旅行都係 AA制,手袋都係自己賺錢買。」

瘋狂購物,搞到杜如風經常碌爆信用咭,要電影人父親杜惠東幫手找數,但自從父親退休,杜如風只能自給自足,靠出書、寫專欄、做旅遊節目維生。「而家養番 Daddy,但佢唔會使我啲錢。我冇儲錢習慣,有收入就得啦,最緊要夠錢交租同買嘢。」

週日( 11日),杜如風帶埋愛犬出席慈善活動。對於之後幫無綫拍什麼旅遊節目,她說:「未傾定,睇埋反應先,俾人插到咁,大家都有啲驚。」

其實杜如風一向癲喪,之前同葉佩雯開派對,她更扮《食神》中的莫文蔚。

杜如風是嘉禾前宣傳大員杜惠東的獨生女,自小在圈中長大,見慣巨星如鄧麗君。

杜如風小時候很可愛,柏安妮忍不住抱着她拍照。

在節目中著紅色絲襪都被插攞膽同甲組腳,杜如風笑謂:「去到人生攻擊,都唔關個節目事,我一笑置之。我一向都係咁,點解而家先鬧。」

公開招親

曾跟黃又南、廣告導演 Jacky相戀的杜如風,自爆已經三年冇拍拖,她說:「我就嚟等做師姑,自從梁朝偉結婚,我個心都好淡。自細睇《 430穿梭機》,已經想嫁俾佢。而家見到佢真人,我會震晒同肚痛。」

有指杜如風就快 40歲,就算要做剩女,對擇偶條件仍然挑剔,「最希望係梁朝偉,不過已經石沉大海,都希望有內涵又靚仔,可惜有內涵又靚仔通常已經結婚,或者係同性戀,所以我都係冇希望,幫我呼籲吓招親」

杜如風常戲言是梁朝偉老婆,更表示會愛他一生一世。

杜如風之前曾跟廣告導演 Jacky拍拖。



鍾意就快D Share啦!