金田井老闆 Chris坦言零食店一直在打減價戰，他為應付競爭曾月燒三十萬元。（關永浩攝）
財經脈搏
撼零食霸權 小商戶劈價劈出血
自 759阿信屋成功彈起，百佳「唔抵得」開設「滋味佳」迎戰。近來加入戰團的，還有商鋪炒家林子峰的「優品 360°」、生產 EDO餅乾的僑豐行「阿美橫丁」，上市公司森信紙業（ 731）旗下的「 FOODWISE」及米蘭站老闆搞的「松坂庫」。
零食毛利甚低，賣一百元只賺兩元﹗但仍有不少「死士」不問價搶靚位開鋪，以 759為首的零食大佬，猶如零食霸權，輸家就是一眾獨立經營的小商戶。
阿信屋老闆林偉駿透露，今年會再有兩間日式零食店誕生，「我收到風，嚟緊會有兩個同我一樣出身嘅廠佬開零食店。明明冇錢賺，唔知點解要叉隻腳入嚟！」一眾商家為了搶佔市場份額，不惜用貴租搶鋪，例如商鋪炒家林子峰的「優品 360°」，搶佔彌敦道開鋪。據知米蘭站老闆姚君偉於銅鑼灣開的「松坂庫」，二千呎鋪月租高達三十六萬八千元，未計入貨及人工等成本，每日要賣一百二十包蝦條，才夠交租！
小商戶燒錢$30萬
大商家不惜資本搶靚鋪，在慈雲山及馬鞍山屋邨商場、經營超過三年的「金田井」，老闆 Chris就大呻生意難做，「舊年百佳帶頭掀起減價戰，到而家都無停過，好似家庭裝百力滋，以前賣二十二到二十六蚊一包，舊年年中個個減到十六蚊。我哋小商戶要贏，只可以減到十四個半。但其實成本已十三蚊，賺埋都唔夠交租，搞到唔少行家執笠！」本刊向商鋪及生意轉讓經紀查詢，他指去年有很多小型零食店求頂手出售，「啲鋪都係開咗一年，估唔到咁快就執笠。」根據出售資料，每間店鋪營業額約二十二萬至三十六萬，但盈利卻只得一萬至二萬五千元，收入與一個文員薪金無異。
Chris指過去不但無錢賺，曾有一個月因鬥減價燒錢三十萬，「大家鬥燒錢，睇吓邊個死先。」他至今雖然「死唔去」，但最多只賺到份人工。「啲上市公司大把錢，賺錢係其次，開零食店只係想個品牌多元化，燒錢都係燒小股東嘅錢啫，唔係自己錢。」他們沒本錢像阿信屋一樣，到日本直接取貨減輕入貨成本，而靠本港供應商入貨，無議價條件。為了「鑽」出生存空間，只能減少賣大路貨品，他說：「而家阿信屋都唔同百佳佢哋鬥啦，將啲大路貨品賣少啲，咁就唔使減咁多價。」開鋪亦要避開競爭對手、盡量揀商場鋪，「商場為咗組合會留位俾零食鋪。如果開喺地鋪，租金貴商場鋪五成，根本做唔住。」他表示剛在馬鞍山屋邨商場開了第四間分店，做街坊生意，希望「密食當三番」。似乎零食都只有一條路，就是靠「量」，故必須狂開分店，追求薄利多銷，直至負荷不來爆煲。
不少商家如 759般賣零食，但只賺蠅頭小利，但當他們「響朵」、省靚招牌後，日後以同名品牌再做茶餐廳，美容甚至電器，才是真正的「錢途」。小商戶卻只能繼續賣零食，不過由於入場門檻低，仍有不少人冒險。
網購零食 鬥埋服務
家人在深水埗經營雜貨鋪多年的彭啟明（ John），去年亦加入零食戰團。小本唔夠人鬥，他索性做零食都鬥服務。去年他創辦「零食大王」，主打辦公室 OL。買滿一百元即可送上工商地區，三百元送上住宅，他說：「我冇可能同阿信屋嗰啲鋪頭鬥，因為本身零食個利潤已經好小，仲要鬥平咁不如唔好做。」
零食大王目前生意八成來自公司客，兩成為散客，「我主要對象係上班族，平時返工冇時間、又或懶得落街買零食嘅，都係我嘅客！」除了賣零食，更以禮品方式銷售，「例如開 party要用五百蚊嚟買零食，咁我會幫個客揀好值五百元嘅嘢食，仲有會賣埋禮盒，等客人當小禮物送俾人。」他指坊間零食鋪走日韓路線，他賣小部分日本零食外，更主打賣懷舊零食，「好似沙爹串燒、汽水糖等等，小時候鍾意食嘅嘢。另外，仲會同好多本地廠商合作，例如京都念慈菴，好多本地品牌其實都想搞網購，但佢哋產品唔多，成本會好大，但放產品喺我度賣，就慳好多。」零食大王開業一年，目前營業額接近二十萬。但七除八扣後，毛利只有二、三成以下，只可說是掙扎求存。
759寸爆米蘭站
米蘭站老闆姚君偉與蔡偉國，年中投資千五萬元，在銅鑼灣開設「松坂庫」，聲稱為「微百貨」，但售賣貨品卻與阿信屋相似，都是主打日韓零食。姚君偉認為本地零食市場仍有增長空間，「我哥哥（姚君達）啲仔女，同佢身邊啲同學，每個月可以使成五百元買零食。」兩人指由於「松坂庫」不收上架費，能夠吸引不能打入本地超市的海外品牌，目前三成貨品是直接由日本當地取貨。
不過，阿信屋老闆林偉駿卻不相信他們由日本直接取貨，「得我哋能夠直接喺日本攞貨，我估佢哋係搵 trading公司拆貨，比本地供應商平少少。」他透露，「松坂庫」開店時曾挖角阿信屋員工，並分薄了阿信屋該區的生意，但認為對方好難做得住，「我喺軒尼詩道嘅鋪租十零萬，佢三十幾萬，點做得住？一間鋪每日做一至兩萬生意，你計吓條數佢哋賺唔賺到錢」他認為愈多人開鋪對市民是好事，能夠搶走百佳惠康的生意，但目前很多踩入零食市場的投資者，未必每人都真心想賣零食，「好多人係想搞大盤生意，再喺資本市場運作（賣盤或上市）。」
|
鍾意就快D Share啦！
|
|
|