【短片】【谷底翻身】被爆戀「翻版超雲」 陳山聰帶女友見家長？
2015-01-06 18:22:00
現年38歲嘅「四失聰」陳山聰，前年因為同賭王三房千金何超雲高調晒愛，被封為「振山漢子」，指陳山聰以為做硬「何家女婿」，有傳態度唔好，搞到喺圈中眾叛親離，更戀愛大過天，放棄事業，陪女友環遊世界晒恩愛，由於同舊愛超雲成日豪玩、豪食，導致陳山聰肥咗幾個碼位，據知佢當時體重達195磅，點知佢同超雲兩年情最後都係玩完。
冇晒形象嘅陳山聰，當時依靠親大佬陳山海照顧兼療情傷，被狠飛後嘅佢惟有「馬死落地行」，落足嘴頭成功冧掂回巢拍劇，立即狂做運動操fit自己，仲劇接劇冇停手。
今日有周刊指，陳山聰能夠重新嚟過，係多得大哥幫佢，兄長打本俾山聰同郭政鴻成立「獅兄弟醒獅團同學會」，又傳陳山海準備5百萬首期俾山聰喺香港買樓，據悉，哥哥陳山海係澳門「世運行」運輸公司行政總裁，大嫂李碧君就係同周焯華老婆陳慧玲嘅合作夥伴兼老友，大嫂仲做埋澳門免費雜誌嘅業務發展總監，原來山聰財政有阿哥撐住。
該周刊又指，「媾女有一手」嘅陳山聰又疑成功冧到貌似超雲嘅索女，據悉山聰仲將啲相擺咗上社交網，po咗啲帶女友去見家長嘅相，又晒送護膚品俾「女友」，該報道指陳山聰喺半年前，一個朋友飯聚識咗現時「翻版超雲」，報道又傳佢哋感情都好穩定，二人不時同陳山海食飯。
報道又指撞過陳山聰去九龍城「Patisserie Tony Wong」餅店，買玫瑰花蛋糕o氹女，唔通愛情事業又再兩得意，用咗年幾時間，就可以谷底翻身，果然係「振山漢子」，不過睇過山聰嘅公開instagram同微博都唔見呢個「女友」嘅蹤影，相信山聰同女友蜜照，難道只喺私人帳戶同友人分享新戀情？
(資料圖片)(蘋果日報)
陳山聰同超雲舊相…(資料圖片)
山聰同超雲以前常晒恩愛!(資料圖片)
陳山聰不時喺微博貼上同好兄弟跑步照。（微博圖片）
|
鍾意就快D Share啦！
|
|
|
