林峯被問到有冇睇過吳千語的作品時，一臉尷尬話未睇過，呢個樣拍得住馬明個天然呆喎！
真面目
中毒太低 吳千語票房劇毒 2片谷底 林峯：一套都冇睇
21歲吳千語同 35歲林峯愈愛愈高調，經常連體遊街鳩嗚，又孖住出 trip旅行，峯嫂地位坐定笠六。
愛情得意，不過吳千語事業就認真麻麻。出道 4年拍落唔少電影，點知唔係做大茄就係唔收得，上年終於有得坐正做女一拍《青春鬥》，票房竟然只有 20萬！
年紀輕輕就成為票房劇毒，又唔怪得好愛好愛好愛千語 BB的林峯，都認自己「一套都冇睇！」
《青春鬥》僅收 20萬
吳千語參與的 9套作品當中，票房收過千萬的都係賀歲片，分別係《八星抱喜》、《百星酒店》同《六福喜事》，其中《六福》更收 1,816萬，打入 2014最高票房港產片第 7位，可惜吳千語只係超級大茄，戲份少到去個廁所都 miss咗喇！
至於真正擔正， 14年上畫的《青春鬥》，同周麗淇男友徐正曦做情侶，新鮮感十足但票房低到嚇死人，竟然只有 20萬，分分鐘係林峯登一個台的價錢；而前年尾同林峯情侶檔的恐怖片《詭嬰》，則好少少，有近 70萬。
《青春鬥》
上映日期： 14年 12月 04至 16日
累計票房：$203,986
《詭嬰》
上映日期： 13年 10月 31至 11月 13日
累計票房：$699,416
林峯護 BB︰多多練習
女友拍落大堆爛片，早前離開大台正式簽約英皇的林峯，直認冇睇過千語 BB的大作，上週二(6日)，林峯出席國內劇宣傳活動表示︰「《青春鬥》未睇呀！都想睇下佢啲動作，因為佢有吊威吔；同埋嗰套《王家欣》我都想睇，我接觸過個新導演(劉偉恆)，佢自己寫劇本，個劇本又拎獎，應該要支持一下本地製作！(一套都未睇？)真的未睇未睇！」
講到女友慘變票房毒藥，林峯就極力維護 BB，「我覺得演員可以負責嗰部份，就係演好自己，作為男朋友，我係睇佢工作上面、演繹上面點樣。我覺得要多多留意、多多練習，演員最重要係自己演技有進步同提升。」係囉，咁林峯真係要多啲指導下女友
|
鍾意就快D Share啦！
|
|
|