上周六（ 31日），朱慧敏和 Eddie在舖頭外接受訪問時，一聽記者問有關大肚和年尾結婚時，朱即掩着肚笑說：「吓！唔知點答你喎！其實呢排都好多人問我！」而身旁 Eddie亦加把口：「係……有好事。」
滾熱辣
上月睇婦科 朱慧敏光頭 Eddie年尾結婚
朱慧敏三年前撻着 EO2成員 Eddie（彭懷安），但二人一直不認戀情。隨着近月女方入股男友西環餐廳，戀人身份正式浮面。
雖然 Eddie先後被指背女友偷食，朱慧敏依然百分百撐男友：「佢係好人嚟！」風雨過後有彩虹，本刊收到消息，上月 Eddie曾陪朱慧敏到中環睇婦產科。朱慧敏近兩次出席活動，記者亦發現她腹部明顯隆起。據知二人鐵定年尾在港擺酒結婚。對於有望雙喜臨門，朱慧敏坦言：「最近好多人問過我。」 33歲的她，經歷多次感情跌宕，終於上岸。
朱慧敏早年事業運一般，難得遇上《愛•回家》正派律師角色，日日開工，月月爆騷。可惜半年前劇集換血，朱最終冇得留低。與大台還有兩年多合約的她，要為自己諗出路，索性跟男友學做生意。
新舖入股 30萬
適逢 Eddie在三年前已轉型飲食業投資華星冰室做老闆，撈得唔錯，朱慧敏眼見飲食業有可為，便放下身段，開始落男友旺角分店幫手，做到上晒癮。三個月前 Eddie擴充第五間分店，在西環開高檔版茶餐廳「華星客棧」，今次他更讓女友入股 30萬做股東，實行夫妻檔拍住上。
知情人透露：「其實 Eddie一直都唔定性，直至做咗老闆個人有咗目標。 Queenie（朱慧敏）諗嘢較成熟，一凹一凸互補不足。」
兩年前，有指 Eddie背着朱慧敏拖長髮索女（左圖），至日前， Eddie再被網友拍到在夜店與韓妹把酒談心，但朱對男友卻投以信任一票：「 Eddie嗰晚出去我都知，好明顯 Eddie係介紹緊舖頭菜式。」
求教老友生仔經
據知， Eddie早於去年平安夜當晚向朱慧敏求婚成功，二人已有共識在今年年尾拉埋天窗，不過最驚喜的是有望「雙喜臨門」。知情人說：「早排我哋見 Queenie心不在焉，問佢咩事？佢話月事仲未嚟！我哋話唔緊要啦，開心事，反正佢同 Eddie都打算結婚，我咪介紹咗個中環婦產科佢睇。上個月佢上去睇醫生， Eddie都有陪佢。早排我哋去阿 Mo（陳豪）屋企聚會， Queenie係咁捉住 Aimee（陳茵媺）問佢佗第二胎有乜感覺，又問佢生兩個驚唔驚修唔到身，其實大家都估到，只係冇出聲。」朱慧敏一心一意下嫁 Eddie，難怪上月中 Eddie被網友踢爆夜店密會韓妹，朱慧敏亦挺身撐男友。
肚凸現形
其實朱慧敏有孕絕對有跡可尋，一直瘦底的她，上周一（ 26日）出席美容活動時，穿一條兩件頭白色 A字裙，腹部明顯隆起。另外記者在網上發現兩張她在華星客棧門外與鄺美雲、快為人母的陳君宜等名人賓客的合照。照片中只見她肚凸凸又刻意以手遮肚，孕味甚濃。
上周五（ 30日），朱慧敏偕 Eddie陪男友約 3歲的外甥仔到又一城剪頭髮，三人在商場手拖手，似足一家三口，場面十分溫馨。其間朱慧敏一聲「肚餓」， Eddie就做跑腿買 pizza俾準老婆吃，都算體貼。之後三人到 Polo童裝店幫外甥仔置裝。朱慧敏亦媽咪上身，不時主動替小朋友度身及揀款式。她又自動波狂睇 BB衫，種種跡象顯示，她大有機會將為人母。
《回家》 friend開心
三個月前，朱慧敏被消失處境劇《愛•回家》，雖然當時有傳她因為麻煩被飛，但她昔日劇中拍檔得悉她雙喜臨門，卻表現興奮雀躍。
劉丹：請我飲實到！
嘩！真係㗎？咁真係恭喜晒，如果佢請我飲一定到。
婚後住老婆物業
翌日，記者到茶餐廳向二人求證有孕一事，朱慧敏頗避忌：「唉吔！我唔知點答你哋喎，其實呢排好多人問我！」之後她化身小女人留俾男友代答， Eddie則說「係……有好事。」記者問他女友是否有咗，不公開是否怕胎兒「小器」？他即對朱慧敏說：「都叫咗你遮吓個肚」此時，朱慧敏作狀揼男友，兩人打情罵俏，十分寃氣。記者再追問二人婚期， Eddie即猶豫片刻兼大耍太極：「有計劃嘅，五年」雖然二人沒有承認，但當事人笑到含晒春咁款，擺明好事近。
11月行禮
據知二人已着手籌備年尾 11月嘅婚禮，預計擺數十圍。本刊收到消息，二人已秘密向北角海逸酒店及紅磡都會海逸酒店問過價，亦等待 Eddie媽咪替二人擇日。由於 Eddie相識滿天下，故已開始擬定賓客名單，以免掛一漏萬。而基於 Eddie所有「身家」已放晒落舖頭，據知本身與母親同住青衣的他，婚後會進駐朱慧敏前年以 490萬買入的清水灣半島物業。老婆講心唔講金， Eddie安樂晒！
孖住看檔
自從入股投資茶餐廳，朱慧敏幾乎日日到西環新舖打躉。當日她更孖實男友在門外賣包，又做生招牌與粉絲食客影相，忙到癲。
新舖走中檔
「華星冰室」大股東簡文滌早年曾任華星唱片高層，五年前開張的灣仔克街總店是他與圈外友人合資，但有傳陳奕迅低調入股任小股東。而 11年開始，華星先後再在筲箕灣、旺角及澳門開分店， Eddie應老友兼前經理人文滌邀入股數十萬。近月再下一城，位於西環的新店「華星客棧」走中檔路線，日間繼續做茶餐廳，晚市則改做小菜，更高薪挖名人食府農圃飯店前師傅 Eric掌廚。名菜如鴛鴦糯米釀雞翼，售$58隻、醋香豬扒$108、杏汁白肺湯$58（上圖）等，人均消費逾$200。
|
鍾意就快D Share啦！
|
|
|
