探熱針
搞人老公 黃心穎姣溝王浩信
王浩信與陳自瑤一一年先有後婚，女兒靖喬就快三歲，但兩夫妻關係原來不時鬧交冷戰，關係麻麻！做咗老豆仲未定性的王浩信，早前在無錫拍大台新劇，遇着姣爆對手黃心穎即出事。一個未玩夠，一個電力夠，心穎 BB懶理對方有妻有女，以「姣 Wing」姿態喪電王浩信，姣婆遇着脂粉客，正印陳自瑤，地位岌岌可危。
老公失蹤
大台新劇《東坡家事》在無錫及上海拍外景一個月，王浩信全程有心穎 BB陪玩陪食不愁寂寞，相反獨自留守香港的 YoYo，因為無工開，大部分時間留在家中湊女。
老公如甩繩馬騮，有老爺幫手湊囡囡返學的 YoYo，趁住有個多小時空檔，獨自到香港仔的名店 outlet，揀鞋揀衫，之後趕回家與老爺到街市分頭買餸。
據了解，先有後婚，只得三十一歲的王浩信依然未定性，對家庭生活沒有歸屬感。
「 Vincent（王浩信）根本未玩夠，佢話如果唔係搞出意外有 BB，都唔會咁早結婚。頭一年同老婆關係仲 OK，之後 Vincent劇接劇，又多女埋身，放咗工佢又鍾意出去飲嘢玩吓，兩公婆成日為呢啲事嘈；早排試過凌晨五點都唔見王浩信埋位，監製打俾 YoYo，點知 YoYo話老公成晚冇返屋企乜都唔知，大家心照聽講 YoYo好唔開心，情緒有問題連個女都湊唔到，要老爺奶奶幫手睇住個孫。」知情者說。
高壓發電廠
歐陽震華、萬綺雯、王浩信、黃心穎合作的新劇《東坡家事》，最近由無錫轉到上海勝強影視基地進行拍攝。港姐出身的心穎 BB，除了冧掂監製加戲，對住同劇所有男性工作人員，同樣嗲聲嗲氣。「佢喺外國大，當自己鬼妹，同人講嘢成日挨身挨勢，任抽水冇所謂，對眼又識放電，本來佢唔係咁多戲，不過冧得掂監製，搞搞吓，而家戲份同陳煒差唔多。」一名劇組人員說。
繼《再戰明天》，今次在劇中再同王浩信飾演情侶，心穎 BB攞正牌撒嬌，經常不避嫌大庭廣眾打情罵俏。
「大家都知心穎 BB鍾意黐男人玩，有老婆嘅王浩信同歐陽震華都係佢目標，但 Bobby係人精，乜都見過，王浩信過到電，一班人影相食飯，兩個一定孖公仔。有女自動送上門，佢 welcome啦。」
獨愛已婚男
主動熱情，加上電力十足， 12年參選港姐期間，黃心穎已被爆愛黐富二代及爛蒲爛煙，當選港姐亞軍，有機會拍劇、主持雙線發展的她，更將「姣 Wing」發揚光大。搞掂王浩信外，早前拍《再戰明天》，與對手吳啟華亦過從甚密，適逢對方與內地妻石洋子鬧離婚，令二人緋聞甚囂塵上。
玩到入房
唔單只電力無限，心穎 BB精力同樣旺盛。在無錫拍外景期間，經常黐住王浩信的她為引對方注意，表現主動；就算對戲，都會 high到跳舞，心穎 BB亦會利用電眼，望住對方眼都唔眨，王浩信被心穎 BB熱情徹底溶化，一時扮郭富城跳舞，一時玩鬥雞眼對望，心甘情願扮低能仔。
「心穎 BB真係好 open，成班工作人員都知佢姣，有時通告冇王浩信，佢都會同蝦頭坐埋一齊，不過唔會玩，只係食吓零食，同對住王浩信好唔同。夜晚收工，就算公司有提供晚餐，但心穎 BB一定黐住班人出街食，食完飯就返酒店房，劈酒玩到癲，少啲精力第日都開唔到工。」工作人員說。
老婆黑面
在上海拍攝騎馬戲時不慎墮馬，王浩信要提早離開，二月二日晚返港就醫。翌日中午十二時，王浩信由老婆陳自瑤陪住，到北角睇跌打，記者上前問他有關被心穎 BB姣電撻着一事，王浩信說：「成個劇組都知我哋成班玩得好埋！（佢對你好主動，你亦好受落喎）因為我哋做情侶，我又唔覺。」
在旁的 YoYo聽到老公回應，先笑一笑，然後板起臉，轉身走人，情緒落差，又急又明顯。
偷食有前科
歌手出身的王浩信，初出道時緋聞不多，直至加入無綫拍劇，身處花叢中，開始愈玩愈心野的他，曾跟陳法拉傳緋聞， 11年與陳自瑤奉子成婚前，仍被發現連環偷食。
|
鍾意就快D Share啦！
|
|
|
