網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2015年2月12日 星期四

[壹週刊 - 1301] 失踪 52日 六個月肚泰國現身 洗米華錫晒 Mandy Lieu 洗米華,Mandy Lieu,Mandy,劉碧麗,M1,




失踪五十二日,周焯華終於拖住大肚 Mandy Lieu現身曼谷。

娛頭

失踪 52日 六個月肚泰國現身 洗米華錫晒 Mandy Lieu

去年 12月爆出 Mandy Lieu跟華嫂雙雙懷有「華種」後,當事人一直未有現過真身,只透過經理人暗示:「呢件事,大家遲吓就會知。」 Mandy有餡疑幻疑真,華嫂未有鬆懈,不斷發功,挾老公一家五口聖誕遊泰國,再於 fb大晒老公送開篷跑車,舉晒 V擺出勝利姿態。

以為大婆成功擊退小三,原來只是假象。上星期, Mandy陪周焯華(洗米華)去金邊傾完生意,再轉飛曼谷,提早慶祝情人節。周焯華對佗住六個月肚的 Mandy,全程呵護備至,比起之前泰國度假,對大婆漠不關心,兩種態度。 Mandy佔盡上風,得寵到呢!

提早過情人節

澳門賭業猛人周焯華旗下的太陽城集團,去年已部署好,準備今年將賭業版圖拓展到柬埔寨;上週三(二月四日),周焯華飛金邊開會,潛水兩個月,匿埋新加坡專心養胎的 Mandy Lieu,亦有同行。處理完公事,周焯華就孖住寵妃 Mandy,雙雙飛往曼谷,提早共度一個㷫烚烚的情人節。

上週五(六日)中午,大住肚都陪男友周圍飛的 Mandy現身曼谷機場,挺住六個月肚,著鬆身衞衣、平底波鞋的她,面部已開始出現浮腫,孕味甚濃。由於機場人來人往,周焯華格外小心,免得 Mandy被人撞親。

步出機場後,煙癮起的周焯華叫 Mandy先行去等車,自己就特登墮後扯煙,免得大肚婆吸二手煙,如此周到,與兩個月前舉家到泰國過聖誕時,當住一樣有咗的大婆陳慧玲面前,吞雲吐霧,周焯華十分大細超。

之後二人十指緊扣,非常煙韌。

行行吓, Mandy Lieu主動攬實周焯華,挨落對方膊頭,冧爆!

見無乜人, Mandy Lieu捉住周焯華玩 fing手。

周焯華同 Mandy Lieu入住的酒店,跟去年同老婆入住的是同一間,一樣住總統套房,平起平坐。

模特兒出身的 Mandy Lieu,原本身形纖瘦,佗 B後手腳及面部都明顯出現水腫。

早前大婆同啱啱失戀的鄺美雲,齊齊拜佛誦經。

煙韌玩手

曼谷的頂級酒店多的是,但周焯華照舊入住上次同大婆一家五口住過的 Siam Kempinski總統套房,可見極度得寵的 Mandy,地位超然。

在酒店休息過後,傍晚六時,二人孖住到附近食肆撐枱腳,其間 Mandy情不自禁,主動攬實男友,黐實行。人在外地,又沒有保鏢跟身,周焯華細心照顧 Mandy外,又不時左望右望,留意身邊有冇港人。

食到大約十點幾,二人行多一陣便折返酒店,只見換過背心短裙著人字拖的 Mandy巨肚現形,手腳亦出現產前水腫。

返到酒店,見沿途無人,平日表現 cool爆的周焯華,對住自己心愛的女人,恍如變成另一人;只見他想伸手繑實女友,但 Mandy卻調皮地閃開,二人在長廊拉拉扯扯,又煙韌玩手,甜到漏!同大婆分車坐,零交流,同 Mandy,就糖黐豆。

著住鬆身衞衣的 Mandy Lieu,從側面睇明顯發脹不少。

同車與分車

去年同大婆一家大細遊曼谷時,兩公婆全程冇乜交流兼分車坐,但同 Mandy Lieu就坐同一架車,黐到實!

準時交人

據了解,周旋於兩女之間的周焯華,為安安落落享齊人福,一邊努力收埋 Mandy,另一邊就做足本分,安撫正印。

「平日過時過節,家庭大小聚會,華哥都必定交人,俾足面華嫂;但其餘時間,大部分都係 Mandy優先,更加唔係一般女朋友咁看待,華哥講到明,唔會放棄佢。上年去紐約公幹又好,今次去柬埔寨傾生意又好,華哥都帶埋 Mandy喺身邊; Mandy亦好知情識趣,知男友好錫自己,所以就算大住個肚,都陪住華哥周圍飛。」知情者說。

10/2週二下午五時, Mandy Lieu單拖返港,刻意拉低 cap帽,用手推車遮肚,急步離開入境大堂,上車離開。

食煙

等車期間,周焯華唔想 Mandy Lieu吸二手煙,專登擰轉面先食,但對住大婆就當面照扯。

大肚不宜飛

人在異地,無保鏢跟身的周焯華格外小心,不時左右望,全程傍實 Mandy。

最近有報導指,孕婦坐飛機,會有出現深層靜脈栓塞(簡稱 DVT)的風險。根據航空公司指引,孕婦於登機前要先詢問醫生意見,若懷孕滿 28週,須有醫生證明書才可登機。

據專業醫生指,孕婦坐飛機存在一定風險,由於飛機會受氣流影響,胎水震動或子宮收縮都會直接影響胎兒,令胎兒受傷甚至死亡。

如長時間在機艙屈曲雙腳,容易令腳部靜脈血液凝成血塊,一旦入肺,會引起栓塞,導致呼吸困難,嚴重的更會窒息。因此,建議孕婦盡量避免搭長途機,在機艙內要多走動,並穿著鬆身衫褲,促進血液循環。

觸動大婆神經

去年聖誕,華嫂陳慧玲打親情牌,挾老公一家五口出埠,之後又在 fb post相,晒老公獎勵她的二百八十萬限量版 Maserati跑車、名牌手袋等戰利品,絕不錯過任何一個晒幸福機會。

以為自己佔盡上風的華嫂,當收到風老公將與 Mandy出埠後,大婆神經被觸動,於 fb上載署名「太陽城周焯華」發表「澳門貴賓廳神話夢破滅」的文章,高調以周太身份撐老公,可惜周焯華的身心都已經飛向 Mandy。

大婆連番出擊挫 Mandy銳氣,不時在 fb上載近照晒肚。

上載一篇由老公寫的千字文,並晒命表示「我老公吩咐我分享吓嘛」。

以勝利姿態舉晒 V字手勢,大晒老公送的限量版跑車。

高調洩權

傳出 Mandy Lieu同大婆一樣懷有「華種」後,當事人一直潛水,以為小三「笠水」的正印陳慧玲,抓緊時機,透過不同渠道宣示主權,力證自己奪得階段勝利!

拖老公見人

以往低調的陳慧玲,為宣示正印身份,不時高調出席大小公開場合,證實再懷「華種」後,去年十二月中陪周焯華出席李連杰創立的「壹基金」慈善拍賣晚會時,全程有老公攙扶。

風騷撐場

兩日後,華嫂以老闆娘身份,現身太陽國際拍賣行的聖誕拍賣會,被記者問到擊退小三時,她雖然沒有正面回應,但「嘻嘻」笑了出聲,難掩喜悅。

暗示情比金堅

聖誕前夕,在 fb貼聖誕裝飾,留言:「經歷,令彼此更愛、更加珍惜對方,一家人更團結。衷心祝福愛錫(惜)我們的家人、朋友……」暗示兩夫妻之間已跨過「經歷」,自己始終是老公最愛。

全家遊泰日日 po

有仔女同老爺做棋,成功挾周焯華交人到泰國過聖誕,日日定時定候上載自拍照,又公告天下在當地為老爺做壽,力證正印地位穩如泰山,實質兩人在當地各有各,似團友多過兩公婆,其後周焯華更提早離開,飛新加坡陪 Mandy。

Show off老公送車

周焯華豪擲超過二百八十萬,買了架彩藍色限量版 Maserati開篷跑車送正印,等足半年,上月初終於到手,老公有賞,陳慧玲坐在司機位,舉勝利手勢嘟嘴影相,耀武揚威。

晒老公潮文

本月初,上載一篇過千字、署名「太陽城周焯華」發表「澳門貴賓廳神話夢破滅」為題的文章,以正印身份,分享老公希望搞好澳門賭業的決心,曲線證明夫妻關係如一。

新加坡養胎

至於 Mandy,去年十二月十六日到養和睇急症室,並傳出佗住華種後,一直潛水隱身。

「 Mandy連公司(周焯華打本開的 model公司)都冇返過,亦停晒推晒所有 job,疊埋心水養胎;加上 Mandy間新屋兩次俾人虛報爆門,華哥為防同類事件再發生,有段時間安排 Mandy住喺新加坡 Raffles嘅總統套房,廿四小時有保鏢貼身保護,甚至專登喺啲朋友前,話 Mandy唔係有咗,等佢唔好俾人騷擾。」知情

者說。

對華嫂,周焯華交人;但對 Mandy Lieu,周焯華交埋心。鬥牌面,小三早已拋離大婆,兩女同期佗 B,下一回合,鬥快生!

當時已經懷孕三個月的 Mandy,唔錫身扮人肉坐墊冧周焯華。

無論去邊,周焯華都會帶埋 Mandy喺身邊,去年九月, Mandy就做跟得女友陪周焯華到紐約出 trip。

去年十二月,掩肚兼作嘔的 Mandy單拖現身養和;其後傳出同大婆一樣佗 B四個月。(《蘋果日報》圖片)

去年八月 Mandy開設 model公司,但自傳出懷有「華種」後,對公司所有事都不聞不問。

錢多女多家事多

花心係男人特權,特別有錢男人,身邊紅顏豈能得一個?名人富豪,一夫多妻既平常又公開,幾頭家,爭風呷醋,和平共處,各不相干,要乜有乜!

譚詠麟

64歲的阿倫,一夫兩妻是公開秘密,同元配楊潔薇(莎莉)結婚超過 30年,多年來全面掌控財權,單單物業,已逾四億。至於紅顏知己朱詠婷( Wendy),為阿倫誕下兒子譚曉風,一家三口,經常出埠旅遊,兩房人,各不相干。

何鴻燊

有四房妻兒的賭王何鴻燊,每逢大時大節都要去勻咁多頭家, 11年,何家爆發爭產事件,二房拉攏三房硬撼四太梁安琪,事件更鬧上法庭,擾攘個多月,最終簽訂家族和解協議。

鄭家純

鄭裕彤長子鄭家純,作風低調,但感情生活卻多姿多采,跟元配葉美卿結婚後,誕下三子一女, 01年又跟大律師王穎妤撻着,至今育有兩名兒子,兩房人多年來和平共處。

劉鑾雄

與寶詠琴離婚後,劉鑾雄近年身邊有呂麗君同甘比兩位紅顏知己,初時呂麗君的地位較甘比吃香,但女兒劉秀樺出世後,形勢開始逆轉,尤其呂麗君以「劉太」身份登聲明,質疑女兒是否大劉經手,此舉令大劉更為震怒,雖然兩女先後再為他添「慈姑椗」,但有指大劉長住甘比家,每星期只去呂麗君家一次,探望一對子女。

鍾意就快D Share啦!