掃呢頁CODE去手機

2015年2月26日 星期四

[壹週刊 - 1303] 尖沙咀開分店 譚小環㓤出希望 譚小環,M1,




開業一年便有錢分,小環表示完全是預計之外,令她明白更加要做好食物質素。

探熱針

尖沙咀開分店 譚小環㓤出希望

譚小環去年唔撈無綫,轉行在銅鑼灣開檔賣魚蛋,堂堂港姐冠軍,塞在一百呎蒸籠般熱的鋪位開工,捱近一年,終於㓤出希望。

年初二,小環與一班股東及員工食開年飯,分發過百萬花紅及獎金外,近日小環更與老公密密在尖沙咀一帶搵鋪,希望趕在三月開到分店。

素顏戴住粗框眼鏡賣魚蛋,最初食客也認不出這位是港姐冠軍譚小環。

魚蛋檔開業初期,由於員工不多,小環要落場搬埋貨。

一周年開分店

去年轉行賣魚蛋的譚小環,一直有計劃將「渣哥」魚蛋檔擴展到九龍區。

「其實小環好多年前已經想創業,因為佢自己鍾意食香港地道小食,所以同朋友夾咗百幾萬出嚟開魚蛋檔,都係諗住搏一搏,萬一唔掂,蝕晒筆錢就算,真係無諗過咁快可以歸本,圓咗自己一個夢想,亦捱出一個希望;銅鑼灣個鋪係舊年三月開,佢同老公都想趕喺一周年開到分店。」小環身邊人說。

日前,記者便發現小環孖住老公蔡強榮及媽咪,於尖沙咀堪富利士道與一名地產經紀,在街口三角位一個鋪頭外,傾到雞啄唔斷,之後又走入鋪頭內睇一輪,在現場逗留了十五分鐘才離開。

之後,一行人轉到金馬倫道繼續睇鋪,三百多呎地鋪還有樓梯直通閣樓,小環和老公用手機拍低現場環境後,再轉去樂道睇另一間,一次過睇了四個鋪。

見到鋪內間隔四正,小環兩母女忍唔住即時比劃爐具點擺位,任職保險的小環老公電話亦講個不停。

食開年飯當晚,小環老公即場簽支票分紅給其他股東。

在渣甸坊長大的「渣哥」 Jordan,亦是股東之一。

員工亦有現金利是作為年終獎金。

由於魚蛋檔每日做足十六小時,每個股東都要輪住落場幫手。

○六年,與蒙嘉慧拍攝《樓住有情人》,當時小環所佔戲份已經不多。

女神變魚蛋妹

94年港姐冠軍出身的譚小環,簽約無綫後套套擔正,其後簽約 BMG唱片,與鄭伊健合唱的《如果天空要下雨》紅極一時,令她成為「信和天后」。到近年,小環常被安排出任三四線角色,主持婦女節目《都市閒情》,在無綫捱足十八年,每月亦只得萬八元人工。

決定轉行搞生意後,去年譚小環於銅鑼灣開魚蛋檔,又親自落鋪做生招牌,開張一個月已有錢賺,最高峰期試過日賣一萬粒魚蛋、燒賣,被內地粉絲封為「魚丸西施」。

卅萬租頂唔住

魚蛋檔開業快一年,上週五(二月二十日)大年初二,小環與一班股東及員工,在銅鑼灣金羅寶食開年飯。有關開分店一事,她坦言籌備得如火如荼。

「係有呢個打算,呢排都係睇緊鋪,我哋想喺尖沙咀開,但啲鋪租真係好貴,有啲要成幾十萬甚至一百萬租,根本負擔唔到。依家睇中咗個月租二十八萬嘅,都係勉強頂得住,仲計緊數。」小環老公說。

小環表示,現時店鋪租金已經貴到不合理,令很多想創業的人都卻步。

「我哋真係好好彩,真係無諗過咁快可以歸本,依家啲租咁貴,普通小市民未必夠膽攞咁多錢去做小生意,真係好慘㗎!」

同老公、媽咪一齊睇鋪,有商有量。

預計開設的分店,地方比總店大,方便賣更多種類的地道小食。

其間,經紀攞出鋪頭圖則給小環研究。

小環用手機拍低鋪頭的環境相。

小環對位於堪富利士道街口的鋪位最有興趣,比銅鑼灣鋪大三倍,月租要二十八萬。

俾員工入股

當晚「渣哥」一眾股東及員工,超過二十人一齊開年,身為大股東的小環和老公現場簽署支票,向各股東發放分紅,又有現金利是,給一班員工做年終獎金;小環老公蔡強榮現場興奮宣布,發放過百萬分紅,「今日將所有錢分晒去,聽日開工再嚟過!」收到獎金,員工都喜出望外。

「一班員工係我哋嘅資產,希望俾到歸屬感佢哋;有兩個因為表現得好好,我哋仲俾佢哋入咗少少股,大家一齊努力。」譚小環說。

去年四月,小環因賣魚蛋走紅,工作量比在無綫時還要多,不時擔任化妝品活動嘉賓。

記者在微博發現,永安太子爺前妻 Constance,體重因腸塞跌至五十八磅,但都愛吃小環鋪頭的燒賣。

從無到有

94年當選港姐冠軍,曾得無綫力捧。

魚蛋檔位於銅鑼灣渣甸坊,問到小環「佔中」有否影響生意,兩夫婦表現「熱血」。

「其實係兩件事,但如果因為『佔中』,令到我哋無生意,咁咪無生意囉!令到我哋執笠,咁咪執笠囉,反正一年前我哋都係無嘅!我印象最深,只係有幾個戴住黃絲帶嘅小朋友嚟到,好有禮貌同我哋打招呼,其中一個更加一連幾日嚟鋪頭放低一百蚊俾我哋,最初都唔知點解,原來佢哋怕『佔中』影響到我哋生意,所以專登放低錢俾我哋,起碼佢哋心哋好好,怕影響到人。

「唔係一百蚊或者幾多錢,係香港人守望相助嘅情懷,以前香港就係咁!你話我哋驚唔驚冇生意?如果啲租唔係咁貴,無生意我哋都唔使擔心,咁如果示威完可以令到政府控制一下啲租金,令租金正常番,咁我哋就算無生意,都係值得!」

港姐冠軍變魚蛋妹後,小環承認反而更多 job。

「都有內地劇搵過我,但要留喺大陸拍個幾兩個月,就算酬勞係多過以前好多,但依家我想做好魚蛋檔先,分心去拍劇,點都會有影響。」譚小環說。

錢搵錢

譚小環與老公蔡強榮連同六個朋友,去年三月集資過百萬,花個半月籌備,成功在銅鑼灣渣甸坊開到第一間魚蛋檔「渣哥」,開業近一年,成功歸本兼賺到錢,小環與其他股東決定錢搵錢,在尖沙咀開分店。

鍾意就快D Share啦!