掃呢頁CODE去手機

2015年2月1日 星期日

「準人妻」Ella傳有喜:咁大個人唔會有意外 Ella,官恩娜,




「準人妻」Ella傳有喜:咁大個人唔會有意外

2015-02-01 16:00:00



第10屆勁歌王金曲金榜年度音樂盛典噚晚喺廣州體育館舉行,就快舉行婚禮嘅官恩娜就對詳情繼續封口,不過早前有傳佢有喜,就連周柏豪喺現場見佢腳踏4吋高踭鞋都上前問候,佢話:「寫得太迫真喇,連我去騎馬都有女士問我咁運動會唔會太激烈。其實咁大個人唔會有意外,我係循序漸進嘅人,鍾意一步步嚟。婚禮就到時先同大家分享啦,因為我哋兩邊家人都比較低調,以前一個人就可以獨行獨斷,大家都想我老爺奶奶錫我o架。」

而問到得三獎嘅周柏豪係咪好擔心Ella時,佢笑言:「講笑之嘛,我話長途車chok叫佢小心」。問到可有追問對方婚期,佢話:「真係冇講喎,幫人保守秘密好辛苦。我自己就有排啦。」佢又提到日前為楊千嬅個唱任嘉賓:「我都有睇新聞,見到有人話我奀,所以不容有失,好開心千嬅比咗咁大個機會我,佢係我嘅Big Hero」。

薛凱琪以一身類似白色婚紗晚裝出現,一直狂咳嘅佢因病要延遲國語唱片錄音,佢話:「食咗一星期藥都唔得,而家睇埋中醫、針灸同拔罐。因為四月到九月要拍三部戲,所以有啲擔心。Paco成日都問我開唔開心同辛唔辛苦,我發現佢好留意我Facebook,所以就嚟要block咗佢,因為佢似乎留意得密過以前啲男朋友,希望佢唔使咁擔心我」。

人妻謝安琪一身毛毛外套下身穿性應透視背心,雖然熱到滿頭大汗卻不肯除低,奪得歌后獎嘅佢出道十周年,今年將舉行世界巡迴演唱會。而許志安早前於泰國被拍得身穿黑色泳褲,老友梁漢文建議佢下次可以以螢光碎花圖案示人,佢就即刻笑言:「叫佢著先啦,雖然佢腳毛多,不過都ok嘅」。

佢又提到快將推出新歌《你的男人》,又請來女神劉心悠聲演劇場版,問點解唔請太太鄭秀文演出時,佢話:「公司提議架,如果問我就會ban ban哋,因為怪怪哋咁,心悠都好sweet吖,一見到就覺得sweet,又會諗起佢跑步」。

記者提到跑步亦會諗起佢同Sammi時,佢話:「講自己嘢咁個人好怪嘅(搵Sammi講仲sweet啦)唔好喇,太個人唔係咁好」。



鍾舒祺與鍾舒漫



Ella BB



周柏豪呢期成日攞獎



Fiona



Kay今日就濃妝現身



佢熱到出晒汗都唔肯除低件褸



許志安



鍾意就快D Share啦!