網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2015年3月12日 星期四

土豪之最 侯志強 [壹週刊 - 1305]



身為上水河上鄉村長的侯志強,被指要為自己發展的村屋起路,在村內同姓兄弟的農地上傾倒泥頭,強行霸地。侯志強這天踏入涉事農地,稱一直以來所做的,都是為村民好,「你估真係惡,就有人選你做村長咩!講德行㗎嘛!」

壹號頭條

土豪之最 侯志強

上水鄉事委員會主席侯志強,在「地頭」河上鄉做足十六年村長,儼如土皇帝。

近年,政府積極開發新界東北,土皇帝近水樓台,掃入多幅土地,大口氣稱︰「羅湖到蕉徑再到上水圍,我有幾十個『冧巴』(地皮)!」侯志強不諱言大把錢,多到夠孫用。

新界佬的特點,侯志強發揮得淋漓盡致。財大氣粗,就算祠堂也可以拆可以賣。

但土皇帝的言行,已經挑起民憤。他被指要為自己發展的村屋起路,在村民的農地上傾倒泥頭,強行霸地。受害人報警,兒子卻遭人離奇斬傷。

受害人控告侯志強,追討百萬賠償,案件近日開審。本刊取得獨家片段,清楚攝得剷泥車擅闖農地,傾倒一車車泥頭。辛苦耕作五十年的農地,一朝變成廢土。

侯志強出庭自辯,不但否認所有指控,更連珠炮發稱一直仆心仆命為村民服務。在庭上一樣有佢講,無你講。

侯志強完美示範,新界佬的生存之道。

劉愛嬌的農地慘遭惡意倒泥,其兒子侯太樂曾報警,舉報侯志強,但其後遭人斬斷手筋。侯太樂稱侯志強為「癲狗」,不願受訪,直言怕遭到報復。

上水河上鄉女村民劉愛嬌,指控上水鄉委會主席侯志強,以及地產代理萬振成,兩人於○九年出價數萬元,要求把她的農地,改成他們所興建村屋的車路,劉拒絕後,其農地遭惡意傾倒泥頭。劉於是興訟向二人索償共逾百萬元,案件本月初在高等法院開審。

被指為幕後主腦的侯志強,上週三出庭作供。雖然身為被告,但侯志強沒有半點慌亂,眼也不眨把罪責推得一乾二淨,直言農地附近的村屋地皮,已並非他持有,「人哋業主起路關我咩事?如果我阻止人哋,我先至係村霸!」

不過,原告律師播放片段,顯示農地被傾倒泥頭後,侯志強用水喉灑水淋花,修葺農地,相當有嫌疑。他便撻出村長身份,反說當時在履行職責,「政府叫我美化,我去淋植物,得閒就去淋吓。你睇吓我份人責任心幾重,應承咗人哋嘅嘢,我就赴湯蹈火做好佢!」

他強調做了多年村長,「入到嚟嗌吓我個名,就搵到我!」他稱只想一心做好村長,不欲理會類似本案的是是非非,「我唔會理,成日針對人,鬼選你咩,下一屆我仲要做(村長)㗎嘛!」

說着說着,他又收不到掣,繼續發表偉論︰「(我)大把地,使乜霸人呀?」並發揮土豪本色,「啲人話,如果收地我就發達嘞。咁我係發達,無辦法,各有前因莫羡人!」

原告律師想插嘴,但多次遭侯志強搶窒,「你唔使問晒問題㗎喇,我知你問咩!」法官好心提他留心,他連法官都不給面子,「如果我留心聽書,我都做咗法官」原告律師只好打趣說︰「你係宇宙最強!」

○九年七月,剷泥車突然闖入劉愛嬌種滿蔬果的田地,倒入數以噸計的泥頭。

之後農地被破壞,侯志強曾坐寶馬到場監督,更親自拿起水喉淋花。

劉愛嬌一家到場拍攝,被侯志強弟弟侯志剛(左二)驅趕,最後報警處理。

持大量地皮起屋

走出法庭,他忍不住對記者狂爆,「個律師根本無厘頭亂問嘢,掘個窿等我踩!大佬咩事呀,強姦呀?打劫呀?民事起訴咋嘛!我想問法官可唔可以×佢,我想指住佢,×你個老×,我想打×死佢!」狂爆一輪粗口後,他突然收掣,擺出一副紳士模樣︰「當然,响法庭我要守規矩」

膽敢在太歲頭上動土的,是八十八歲的劉愛嬌。她先夫侯威是河上鄉原居民,十多年前過身。

六二年起,劉愛嬌與丈夫在河上鄉第九十五地段耕種。農地大約一千方尺,原本由姓張人士持有,但早年出城謀生,無人收租,兩夫婦於是當成自己農地打理。兩人種植荔枝、杧果、苦瓜、通菜、香芋、辣椒等,每日推到上水市場售賣,所得用作養育八子一女,「我靠種田,日日都買到肉返屋企,又幫到仔女起咁多屋,人人都有屋住!」子女長大後已各自搬出祖屋,但劉仍然每日務農。

侯志強九九年上任村長後,便開始在河上鄉囤地。根據土地註冊處資料,侯志強個人及公司名下,在上水河上鄉共持有九塊地皮,其中八塊於○五年以五百一十萬元買入,正正毗鄰涉案農地。雖然侯志強在○五至一○年,先後把八塊地皮賣出,但均售予姓侯人士,每次只是「賺少少」,八塊地皮只賺了五十萬元。

侯志強在上水河上鄉曾持有八幅地皮,建成豪華村屋「金鼎湖畔」。而劉愛嬌的農田,正正位於村屋的出入口,現在已被改建為車路、鯉魚池,亦劃出部分田地,供村屋居民一嘗農耕之樂。

二千元買地被拒

今次原告一家,在河上鄉侯氏屬於「大房」,一翻族譜就找到。相反「細房」出身的侯志強,左翻右揭也未找到自己名字,「唔係唔係,唔係呢個,可能我俾人踢咗出族呀!」五分鐘後才找到。

表面上,侯志強並非業主,但劉愛嬌稱,○九年二月起,與侯志強相熟的地產經紀萬振成多次出價,欲買入劉愛嬌的農地改建車路,由二千元開到八萬元,但被劉拒絕。萬最後拋低一句︰「你好走喇!你哋霸咗好耐,我有辦法令你走!」

五個月後的一個早上,劉的第七子侯太樂,發現侯志強指揮泥頭車進入農地,不斷倒入泥頭。

本刊取得的片段亦顯示,侯志強曾把寶馬坐駕停泊在農地旁,在農地上指揮弟弟侯志剛及其他工人修葺土地,又手持水喉淋花。後來地產經紀萬振成來到,侯風騷大叫︰「喂!萬仔,靚唔靚, good唔 good呀? Very good!你出聲」

侯氏家族內訌

五十八歲的侯志強,早年曾在英國闖蕩,自稱相貌「同周潤發都唔差幾遠」。他說時侍應搭嘴擦鞋,「你靚仔過發哥!」令侯少有尷尬苦笑︰「依家唔得,依家老」

侯志強轉手的土地,已建成豪華村屋「金鼎湖畔」,一幢三層賣近千萬,其中三幢已售予外姓人士,賺近二千五百萬元。而劉愛嬌的農地,正好位處「金鼎湖畔」出入口,被改建成為屋苑的休憩用地,除了有車路,路旁有一個魚池,養着一群錦鯉。

這天下午,五十八歲的侯志強穿着西裝皮鞋,帶着一大袋麵包皮到魚池餵魚,望着記者說︰「我做人頂天立地,我最睇唔過眼啲蝦蝦霸霸嘅事!」他說的不是自己,竟是說原告劉愛嬌和兒子侯太樂一家。

幾十年前,侯氏家族定居上水河上鄉,侯太樂和侯志強出自同一祖宗,侯太樂屬於人多勢眾的「大房」,同一房內有數百人;侯志強則屬於「細房」,只有數十人。他與侯太樂都是兩房的第三十一代後人。

侯志強與侯太樂由細玩到大,「我細細個已經識佢,由細打到大,爭粒糖都可以打交。佢有八兄弟,梗係特別惡,我睇唔過眼,咪得罪佢囉!」他說:「你去侯太樂間屋睇吓,成個貨櫃擺响屋企門口,佢咪一樣霸人啲地!」翻查資料,侯太樂曾被投訴在門前官地放置貨櫃,堆放雜物,至今未有處理;記者向侯太樂一家詢問,侯太樂卻不願回應,只稱等官司後才回覆。

侯志強更稱,今次官司源於侯氏家族內訌。多年來河上鄉一直由大房人馬出任村長,直至九九年,侯志強擊敗來自大房、已經連任十二年村長的北區區議會副主席侯金林後,「細房」出身的他一直擔任村長至今。

「十六年前侯金林同我爭輸咗之後,十二年前,侯金林叫侯太保(侯太樂四哥)嚟幫佢選……到四年前,侯太樂又嚟幫佢選,又選輸咗!咁咪有啲唔舒服,咁啱有單咁嘅嘢,咪順手入埋我數囉!」

圍村變康樂園

說得理直氣壯,但侯志強無疑是得益者。侯志強上任後,河上鄉狂建豪宅,吸引非原居民置業。有村民稱︰「姓侯嘅愈來愈少數,依家呢度得三分一人姓侯。」

侯志強一直反其道而行,大部分新界圍村都不開放予外姓人居住,他卻無任歡迎,「你有無睇到河上鄉有啲牌寫住『本村範圍內不准擅進』?我上任之後,將呢啲牌全部掉晒,放火燒鬼晒佢!」

村民歡迎嗎?侯一於少理,堅持這是德政,「河上鄉最開放,我歡迎任何人、入嚟玩、入嚟住、入嚟郊遊,有乜所謂?幾繁榮呀依家,個個安居樂業!」

現在祠堂外搭着高棚,正為圍村盛事洪聖誕作準備,一樣歡迎外人,「四月一日開始洪聖誕,盆菜宴以前限自己人食,得十幾廿圍。依家就來者不拒,每一年都搞免費大戲、免費盆菜,連續五日,食晒為止,使兩百幾萬。」

「(河上鄉)係空前繁榮,我個宗旨係成條村搞靚佢,新界圍村變成康樂園,唔得咩?唔係淨係康樂園半山先係高尚住宅。」

他一直覺得,他在位期間,不單只搞旺河上鄉,整個上水更加是「一片昇平」。這天走過臨時市場,他得意地說︰「呢個街市本來政府 cancel,後期經過我爭取,開放番俾啲農民……個個都高呼萬歲我範圍啲路,有邊條係凹凹凸凸先得㗎?」

這天元宵佳節,河上鄉舉辦盆菜宴,村民紛紛上前與侯志強祝酒、拍照。侯飲大兩杯,跟記者盡吐心中情:「我講啲嘢出面啲人可能唔啱聽,但係新界人個個都 buy我喎!其實我又唔使要你嗰一票,我使乜要你啱聽啫?」

侯志強被指為上位,搜集「師傅」簡炳墀賄選證據,一手送他入獄。侯志強說,仍然尊敬簡,「我上個月見到佢,對佢『大佬前大佬後』,點知佢同我講︰『喂,唔好食咁多嘢呀!食得肥得滯唔好㗎後生仔,有錢無用㗎!』」(江永健攝)

河上鄉之恥

八十八歲的劉愛嬌,直言不欲挑起紛爭,但實在看不過侯志強蝦蝦霸霸。侯志強反指劉惡人先告狀,「塊地本來就唔係佢,佢走去霸人嘅!」

不過,並非人人都歡迎這種轉變。侯志強諷刺劉愛嬌「唔死已經大半世,耕乜鬼田」,但劉愛嬌眼中,連祠堂都可以賣的侯志強是河上鄉之恥。

「你問佢醜唔醜!(祠堂)係咪你嘅先!你有咩權賣我祠堂,你話賣啫,我俾你賣咩?」住在祠堂旁祖屋的她,激動對記者說,如果有人出價成億收購她的破舊祖屋,她也不會賣,「我唔曉賣祖屋,圍村人唔賣!」

這塊農地,有劉愛嬌和丈夫的辛酸回憶,「唔係呢塊田,邊養得大啲仔女呀?我先生走咗十幾年,以前日日同佢擔住菜去街市賣,嗰時好好價錢,四蚊一斤菜!」為了守護這片回憶,她稱明知侯志強是「惡霸」,都要入稟告他,還暗示兒子侯太樂報警一個月後,遭兩名持刀及鐵鎚兇徒斬斷手筋,實是有心人所為。

「百年前原是一家」的侯氏宗族,就因為這片農地,要在法庭相見。問侯志強是否覺得值得這樣對待「同姓兄弟」?平日霸氣的他,終於稍稍收斂,「唉!為咗利益,親兄弟都打都唔講道義其實賣咗祠堂,阿婆都有份分!要得大家同意先可以賣,賣祠堂唔係淨係我一個人㗎嘛!啱唔啱呀!」

鍾意就快D Share啦!