掃呢頁CODE去手機

2015年3月18日 星期三

世界難撈 挑戰變種禽流感  J.M錫雀搵命搏 [FACE - 408] MF,



Janice Man為咗氹鸚鵡講嘢,哄到埋一埋同佢培養感情。萬一隻雀有病毒, JM真係分分鐘中招㗎!

真面目

世界難撈 挑戰變種禽流感  J.M錫雀搵命搏

香港有近 400人因為流感死亡,而且人數不斷增加,病毒又愈變愈勁,真係唔講得笑!

不過剛剛簽約新公司,在橫店拍劇的 Janice Man文詠珊就驚都冇用。其中一場要求 JM同一隻鸚鵡做對手戲,即使明知有禽流感風險, Roll機前勁驚嘅 JM依然對住隻雀又摸又錫,仲哄個嘴埋去吹氣!係就係好 pro,不過為賺人仔要搵命搏,唔係好值喎!

自從飛甩黎明,轉投 Paco的太陽娛樂後, Janice Man多了機會北上接 job,更連拍兩套大陸劇,全力賺人仔。

香港鸚鵡協會主席 Paul表示,用嚟拍戲嘅鸚鵡有機會身染病毒:「如果當係道具,隻鸚鵡有機會拍完後被遺棄喺一邊冇人理,咁就好易會病同受感染!」

導演向 JM講解劇本,但 JM似乎有啲意見,望住對方個眼神仲幾凶狠下!

出口氹雀

正在橫店拍《蜀山戰紀之劍俠傳奇》的 JM,似乎非常適應內地生活,在片場同工作人員有講有笑,等埋位時又有兩個助手遞小食遞羽絨遞劇本,排場仲勁過女一國內演員趙麗穎。

其中一場講 JM需要同一隻鸚鵡傾偈,唔知鸚鵡唔識聽廣東話定聽唔明 JM的普通話,竟然點都唔肯講,搞到 JM要出招氹佢。不過 JM唔夠衞生意識,撚雀期間用手摸不特止,又哄埋去咀咀,雖然最終氹到鸚鵡飛上佢隻手臂,但咁近距離接觸雀鳥,好危險喎!

喊驚

鸚鵡突然飛起, JM嚇到 O嘴尖叫!

揞眼

導演安撫 JM,叫佢唔使怕,但佢依然唔敢正面望隻鸚鵡。

掩嘴

驚魂未定, JM繼續傻笑,睇嚟真係嚇親喎!

「拍戲唔理得咁多」

《蜀山》演員熟口熟面,有 JM(後左一)、吳奇隆(後左二)、 JJ(後右二)同樊少皇(後右一)等。

衞生防護中心都有寫明,人類係透過近距離接觸染病禽鳥而感染禽流感, JM仲要喺內地又摸又錫活家禽,真係分分鐘中招!不過 JM就話驚都冇用,她說︰「我同佢交流咗好耐,我教佢講嘢,佢唔肯講,淨係肯講『你好』同『早上好』,好搞笑!佢成日奸笑,一咬人就會奸笑。(驚唔驚禽流感?)拍戲需要隻雀同我交流,唔理有冇流感都要做戲」

為兩餐乜都要做,不過 JM竟然學前老闆黎明大講金句,「咩雀呀?係唔係綠色嗰隻?佢唔係雀,係鸚鵡嚟㗎!」借問聲,鸚鵡唔係雀,咁係咩呢?

爆紅威廉有女黐

由吳奇隆投資兼做埋男一的《蜀山戰紀之劍俠傳奇》,除了 JM同陳偉霆,亦有賈曉晨同樊少皇等港星參與。雖然多自己人同場,不過同 JM昔日好姊妹 Angelababy拍過拖的陳偉霆,竟然甚少跟 JM交流,反而與國內小生、在《步步驚心》飾演十爺的葉祖新好啱傾。而劇中女一、 27歲當紅花旦趙麗穎,亦愛黐住威廉,兩人仲將合照放上微博(小圖)。咁親密,唔驚阿 Sa嬲咩?

玩完鸚鵡, JM又撩對手葉祖新傾偈,又出手搞人條辮,好主動!

趙麗穎捉住威廉條辮影相,怕唔怕阿 Sa呷醋㗎?

戲份甚重嘅威廉,短短兩個鐘內要換兩套戲服拍唔同場口,都幾辛苦。

鍾意就快D Share啦!