掃呢頁CODE去手機

2015年3月20日 星期五

Keep fit唔靠 Sammi 安仔個唱加場買 160萬新車 [忽然1周 - 1025] Sammi,許志安,安仔,許冠傑,Sam,鄭秀文,MW,



生猛踢波

安仔落到場鬼咁生猛,追到個波實一實。 47歲,睇唔出呀呵!

媽咪姐

Keep fit唔靠 Sammi 安仔個唱加場買 160萬新車

近排天氣潮濕,翳翳焗焗咁,搞到平日唔願郁嘅媽咪姐,更加唔想做運動。不過唔係個個好似我咁諸多藉口嘅,早幾日就撞到許志安喺九龍灣,同明星足球隊一齊練波。佢先同華哥吹水,再慢跑 warm up,一啲都唔 hea㗎。

係人都知,安仔有個「運動精」老婆,婦唱夫隨就梗㗎啦。不過媽咪姐知道,安仔近排密密加操,原來係為咗 5月嘅「 Come On許志安演唱會」。安仔近年多數夾住 Big Four開騷,難得今次搞個人演唱會,梗係加多兩錢肉緊!尤其前排農曆新年,佢自爆食咗四底蘿蔔糕肥咗好多,家下唔勤啲操又點得呀!

據講老婆 Sammi專登醒咗條獨門減肥餐單俾安仔,唔係烚雞肉就係烚蛋,齋聽都覺得口寡寡。嗰日安仔講起都大呻辛苦:「平日做運動、健身、踢足球……想死㗎,做運動好寂寞㗎!」咦,乜 Sammi冇陪你咩?原來呢位體貼人夫知道嬌妻腳患在身,所以暫時冇叫佢一齊跑步。 Keep fit呢個重任,惟有靠自己先啦。其實安仔都不愁寂寞嘅,事關媽咪姐當日𥄫到佢揸新車。 Benz靚車、 S400新款,車價仲要成 160萬!啱嘅,操得咁辛苦;安仔仲率先話俾媽咪姐聽,演唱會會加場㖭,梗係要買架車賀賀佢!

演唱會前操肌是常識吧! 2011年嘅個人演唱會上,安仔大晒靚肌。據講今次佢想超越自己,再操得犀利啲。大家拭目以待呀!

自爆食咗四底蘿蔔糕嘅安仔早前大晒巨型朱古力,加上平日老婆又咁鍾意下廚,鬼唔肥咩!

同華哥吹水

未正式同明星足球隊練波之前,安仔同黃日華吹下水,交流下波經。

慢跑熱身

踢波前梗係做足準備工夫,熱下身先。

練波後做 gym

安仔之後上樓做咗兩個鐘頭 gym,務求喺演唱會以最佳狀態示人。

開心晒「新歡」

翌日,出發去新蒲崗錄音。安仔之前揸開嘅 Benz C63都幾靚仔㗎,不過企喺新車 S400隔籬,個樣甜絲絲,對呢位「新歡」似乎好滿意咁噃。

Sammi精神支持

12月舉行完演唱會嘅 Sammi本可陪老公跑步,但受腳患影響而唔做得劇烈運動住。不過身為人妻嘅佢都有監督老公飲食,自己則 po美食相,實行以另類手法,精神支持安仔。

Sammi早前傷腳,所以唔可以好似昔日咁,同老公跑步。

向來鍾意美食嘅 Sammi,呢期少咗 8公里相,但 po多咗美食相。早兩日同杜 sir食飯,仲大讚子薑雞好味,你話老公安仔睇完有咩感受?

鍾意就快D Share啦!