掃呢頁CODE去手機

2015年4月23日 星期四

撤離大角咀板間房 姜文杰西貢築愛巢 [壹週刊 - 1311] 姜文杰,姜文,M1,



週一( 20日)姜文杰和𡃁模女友阿 Rain在沙田十指緊扣掃家品,一起佈置愛巢。

探熱針

撤離大角咀板間房 姜文杰西貢築愛巢

港視發牌無期,接近一年冇 job斷糧,交租都要問老豆秦沛借錢的姜文杰,最近終於憑《導火新聞線》恢復人氣,更有機會接拍內地電影、做主持,終於可以搬離住了多年的大角咀板間房,孖住長腿𡃁模女友李泳淇( Rain Lee)在西貢築愛巢。

硬頸靠自己

和二十四歲的李泳淇( Rain Lee)拍拖一年,女友陪住姜文杰捱過最艱難的日子。男友事業現轉機,終有能力搬離板間房,租住西貢村屋展開同居生活。

本週一(四月二十日)二人拍拖到沙田為愛巢添置家品。由梳化、床單,睇到兒童傢俬甚至研究 BB床,全面到以為李泳淇已經有咗!買完嘢,揸車返西貢,姜文杰俾錢女友去買埋外賣才返新居。

「 Paul哥(秦沛)一直唔贊成 Benji(姜文杰)住板間房,成日叫佢搬返屋企,再唔係就幫佢租個單位,但 Benji硬頸要靠自己。難得係佢自己都唔介意俾人知,同阿 Rain拍拖冇耐已帶女友返去,俾對方知道佢唔係乜都攤大手板問老豆攞嘅星二代,個板間房有套廁,但好殘,全屋都漏水,不過阿 Rain又唔介意。」姜文杰身邊人說。



阿 Rain在店中箍實姜文杰,十分

痴纏。

揀床單時有商有量,梗係啦,一齊用㗎嘛!



熱戀中的姜文杰和阿 Rain,選家品都玩得一餐。

嘈到瞓唔到

女友願意同甘共苦,姜文杰讚不絕口。

壹:壹週刊 姜:姜文杰

壹:而家同女友一齊住

西貢?

姜:唔係,買外賣一齊食,之後有送佢返屋企。

壹:拍咗拖都好一段時間?

姜:一年左右,之前拍網上短片識嘅,又幾啱傾。

壹:有結婚計劃?

姜:未諗咁深入,我哋事業為重,希望放多啲時間返大陸搵錢,咁先可以有錢返香港生活。之前我住板間房已經識阿 Rain,佢知我唔係有錢,都支持我。而家搬咗新屋好好,起碼瞓得着。

壹:舊居環境好差?

姜:附近比較多印巴人住,佢哋習慣廿四小時播住音樂,有時半夜四、五點都開門大聲鬧交,嘈到瞓唔到覺。我住嗰間屋係六十年鹹水樓,隔音差。再之前係住九龍城,個單位有二百幾呎,但業主逼遷,所以先搬去大角咀,初時諗住暫時住一年,點知港視攞唔到牌,所以要繼續住。而家搬咗去村屋,舒服好多。

壹:女友肯同你捱,好難得!

姜:係呀,喺我入行十幾年以來最失敗嘅日子識佢,佢絕對唔係港女,人好好,係個好簡單嘅女仔。

住唐樓

姜文杰之前住大角咀唐樓的板間房,一住便四年。

板間房有套廁,但牆身油漆剝落,非常殘舊。

房間細小,而且牆身滲水,下雨天床褥不能貼牆擺放。

一齊返歸

在西貢買外賣後,姜文杰與阿 Rain返回新居慢慢歎。

姜文杰泊好車後,拎住戰利品回家。

阿 Rain先落車返愛巢,非常熟悉周圍環境。

唔想問朋友借

壹:而家主要返內地做嘢?

姜:我都好想留喺香港,但港視發牌無了期,呢段時間,我一直用緊自己啲積蓄,舊年盡地一煲返大陸參加《我不是明星》,叫做開咗內地市場,咁先有機會唔使話放棄唔做呢行。

壹:之前有問爸爸借錢

交租?

姜:我一向唔鍾意問佢攞錢,但當你租都冇得交,又唔想問朋友借,就會問阿爸借住先,佢唔會睇住我餓死。

秦沛很支持一對子女在娛圈工作,更提出經濟上支持兒子姜文杰。

身高 165cm的阿 Rain有一雙長腿,外形不俗。

廿四歲的阿 Rain除模特兒工作外,曾拍電影《掃毒》及《 Delete愛人》,去年更贏得鄺美雲舉辦的珠寶小姐選舉冠軍。

曾跟馬國明一起拍廣告,阿 Rain有不少工作機會。

姜文杰在剛播完的《導火新聞線》中飾演王子,跟同劇演員成為好朋友,王宗堯更送他音響作入伙禮物。

劏房星竇

香港樓價高,唔好話買樓,連租樓住一樣唔易,尋常人為住屋問題叫苦連天,不少好睇唔好食的藝人,也是劏房客。

王宗堯

未被封為「男神」前,王宗堯在銅鑼灣以九千幾蚊租住 200呎劏房,一住四年,直到憑港視劇《選戰》彈出,搵多咗錢,才搬到月租過萬,位於灣仔區的 300幾呎單位。

袁嘉敏

在《鴨王》中一脫而人氣急升的袁嘉敏,未入行前曾為陳可辛導演公司的電影擔任發行,當時她在九龍城租住 200多呎板間房。

連詩雅

本身家境富裕的連詩雅,讀中學時父親生意失敗破產後拋妻棄女,兩母女要由半山區幾千呎豪宅,搬到銅鑼灣 200多呎劏房。

何佩瑜

2010年入行的何佩瑜( Jeana),初出道收入少,當時刮到盡頂多可應付約五千蚊租金,結果租極都唔啱,最後租住唐樓 130呎劏房連套廁,但因保安問題,住了 3、 4個月便搬走。

鍾意就快D Share啦!