掃呢頁CODE去手機

2015年4月23日 星期四

張震遠妻出山做 agent 專攻豪宅 [壹週刊 - 1311] 張震,M1,



張震遠早前被法庭頒令破產,全家生計要靠妻子駱晶瑩任職物業代理負擔。

八卦陣

張震遠妻出山做 agent 專攻豪宅

前商交所主席張震遠拖欠員工薪金案本週四判刑,辯方本週一向法庭披露,張家四口已從淺水灣道大宅搬到跑馬地,租金由任職地產代理嘅太太駱晶瑩負擔。本刊追查發現,早年喺美國任職物業代理嘅 Josephine,近兩年重操故業,喺「經緯物業」專攻豪宅租售,服務範圍包括半山、山頂、跑馬地同九龍塘。有地產業界人士話,以張震遠嘅人脈關係,佢太太應該唔難搵到生意。

經緯物業網頁以「新力軍」形容駱晶瑩;張太嘅座右銘係「 Expect the best」(追求卓越),有老公嘅一貫氣魄。

記者週一致電駱晶瑩,但可能丈夫仍未宣判,佢拒絕回應:「我唔方便講任何資料,(你出番嚟做地產代理幾耐?)我唔方便講呢啲資料,唔好意思,我真係唔方便講、唔想講。」之後匆匆掛線。

記者翻查資料發現,駱晶瑩多年前曾任職美國最大地產經紀公司 Coldwell Banker,入職翌年獲頒最優秀房產代理金獎,但回港定居廿多年來,不彈此調久矣,只係丈夫財困,必須重返職場保生計。

根據經緯物業網頁嘅代理簡介, Josephine多年來只係家庭主婦,但因曾租住八個居所,認為她充分理解物色合適居所嘅難度和有豐富經驗解決問題。事實上,單係成功說服淺水灣道大宅業主湯君明減租續約,以及之後無條件退租,可見張太係一個有料嘅 agent。

覃家棄《成報》搞電影

香港電影金像獎頒獎禮上,《黃金時代》成為大贏家,囊括五個大獎,包括最佳電影同最佳導演許鞍華。出品人覃宏上台攞獎,雖然旗下嘅星美出產唔少中港合拍電影例如《如果•愛》、《中國合伙人》等,但他對香港人嚟講較為陌生。但講到佢阿哥覃輝,就早已同香港傳媒有淵源,因為佢曾經係《成報》大股東。

覃輝○四年初入主《成報》,但兩年後發生欠薪事件,搞到被勞工處票控。當時覃輝被指捲入建設銀行前行長張恩照賄賂案。覃輝沉寂咗一段時間,呢幾年重出江湖,除咗進軍大陸戲院、拍電影,舊年同香港英皇集團主席楊受成宣布合作,之前又收購黃宜弘太太梁鳳儀嘅「勤+緣」,睇中黃太寫嘅中港商界背景小說同電視劇。

○九年底楊家誠幫覃輝接咗《成報》火棒,入主無幾耐被控洗黑錢,舊年被判監六年。《成報》輾轉落入大陸富豪手上,今次係喺大陸搞礦業嘅鼎和礦業控股老細谷卓恆,上週《成報》又被申請清盤,似乎接親手嘅都有啲運滯。

以《黃金時代》出品人身份上台攞獎嘅覃宏,為其兄覃輝嘅星美集團打造娛樂王國。

(《蘋果日報》圖片)

《黃金時代》曾擊敗《香港仔》、《竊聽風雲 3》,代表香港提名奥斯卡電影,又獲得金馬獎最佳導演,可惜票房一般,叫好不叫座。

蘇慶和現身 反對派甩底

林偉能(中)露出四萬笑容,望住愁眉不展嘅蘇慶和,明顯地市建局高層內訌仍未止息。(鄒潔珊攝)

市建局上月底爆出嚴重人事衝突後,被指向管理層施壓嘅主席蘇慶和( Victor)上週五終於露面,出席荔枝角道/桂林街及醫局街重建項目竣工儀式。儀式最初安排行政總監譚小瑩出席,及後 Iris(譚英文名)劈炮,自然唔肯亮相。局內第三把交椅嘅執行董事鄭啟華,原本答應出席,唔知係唔係因為喺董事會會議炮轟過 Victor,儀式舉行前佢忽然話唔得閒 no show,結果只得兩名總監林偉能和黃偉權撐場。

身處「撐蘇」陣營嘅林偉能,當日十分風騷,不單露出四萬笑容,頻頻望向心事重重嘅 Victor;當他接過本刊記者遞上卡片時更笑說:「啊,,我睇過你哋篇報導,好精彩,好引人入勝。」既然咁誇獎,咁市建局就要繼續鬥落去,我哋爆得仲精彩!

民記工聯印書 進貢中聯辦

本刊早前踢爆中聯辦透過大陸神秘空殼公司,迂迴持有聯合出版集團,即係話你行入三聯書店、中華書局同埋商務印書館 shopping,等同間接進貢中聯辦。講到進貢,點少得建制派政黨?

翻查資料,民建聯研究部一○年、一一年分別出版兩本政經研究論集;為咗慶祝創黨二十年,一一年、一二年亦出版文集同黨史。無獨有偶,四本書都係由中華書局做出版商。工聯會一一年同一三年亦幫襯中華,出版政策研究論集同史冊。正所謂肥水不流別人田,維穩費左手嚟右手去,左手再接番,可唔可以當係「促進」香港經濟發展呢?

民建聯研究部喺一○年同一一年分別出版兩本書,皆由中華書局出版,擺明肥水不流別人田。

鍾意就快D Share啦!