2015年4月16日星期四

宇宙最強女神！全智賢登《ELLE》六個地方封面全智賢,

【韓流】宇宙最強女神！全智賢登《ELLE》六個地方封面

2015-04-16 08:00:00

韓國女神全智賢真係好鬼犀利，根據時尚雜誌《ELLE》方面透露，全智賢之前為雜誌拍封面，原來佢一口氣拍咗好多輯新相，當中4月韓國版已經率先推出，而佢除咗拍咗韓國版外，5月刊亦會有中國版、香港版、台灣版、馬來西亞版、越南版同埋新加坡版，即係差唔多時間合共有成6個唔同版本嘅全智賢出現，即係話全智賢每個地方都具有相當人氣，唔係個個都有咁嘅機會。

而全智賢拍完《來自星星的你》後就接拍咗部電影《暗殺》，呢部電影預計暑假推出，而根據有份剪輯嘅車振宇喺微博透露，佢已經完成咗電影嘅初剪，佢仲上載張電影嘅英文版海報，睇嚟好快電影就同大家見面。

另外，全智賢成為韓都衣舍嘅代言人有一段日子，佢之前都有飛到去內地為佢哋宣傳，而近日全智賢已經同韓都衣舍再度續約，廣告商仲喺微博問粉絲到底想全智賢繼續成為代言人幾多年，仲叫粉絲估，估中仲有大獎畀佢哋呢。