掃呢頁CODE去手機

2015年4月22日 星期三

杯杯清 隊香檳 俾仔圍 薛凱琪失獎買醉 [FACE - 413] 薛凱琪,MF,



劈到凌晨 3點, Fiona離開時腳步浮浮,要助手拖到實。

真面目

杯杯清 隊香檳 俾仔圍 薛凱琪失獎買醉

繼 11年爭「最佳女主角」輸俾劉嘉玲,薛凱琪今年憑《閨密》角逐「最佳女配角」又衰咗,唔夠連掃兩獎的王菀之撼。

33歲仍未發圍,失獎 Fiona完騷後換過件戰衣,再趕去爾冬陞的入行 40年派對。同場有影帝劉青雲 high爆慶功,戥人高興的 Fiona惟有周圍撩人飲酒吹水,飲到 high high哋,連俾仔圍住集郵都冇所謂,更主動俟埋去影相,明顯貓咗!







影壇新人王菀之四個提名掃兩獎,反而入行 12年的薛凱琪,連電影新人獎都未攞過,明明在《閨密》中係女主角,又離奇地降呢變提名配角,認真黑仔!

Fiona入到場完全唔錫身,拎起杯酒一啖乾晒,玩得好放喎!

兩杯到肚, Fiona同人吹水時愈哄愈埋,幾乎錫到面珠仔㗎!

Fiona成個人俟晒落「新晉導演」李光耀身上,咁識做,唔怪得李導演搵佢做《暴瘋語》女主角

慶功宴上唔少男賓客要求合照, Fiona通通冇托手踭,仲主動俟近對方添!

蒲到 3點

今年又陪跑, Fiona被影到在台下喊晒口聽王菀之講得獎感受,未知係戥對方高興定戥自己唔抵。無緣做最佳女配角, Fiona仍然俾面出席慶功,更換上白色吊帶低胸喱士裙,輸都要輸得好好睇睇。

一到場, Fiona即刻問侍應拎香檳飲,又頻頻同其他賓客乾杯,表現興奮;同場有唔少男士主動埋枱搵 Fiona吹水, Fiona全部來者不拒,仲傾到頭貼頭好親密。冇獎攞的 Fiona竟然玩得夜過影帝劉青雲,蒲到接近凌晨 3點先肯走,離開時同其中一名女友人又攬又錫,非常肉緊,更要助手扶實上車返屋企。

44歲古天樂都未做過影帝, Fiona來日方長,唔使咁愁喎!

Fiona行紅地毯時一個崵身,輕易成為焦點,果然係醒目女!

有份角逐「女配」,即使上台攞獎機會唔大, Fiona喺空檔時間都要補補妝。

王菀之攞「最佳女配角」,台上多謝其他有份提名嘅人, Fiona都聽到流晒眼淚,激動過自己攞獎!

電視畫面

王菀之 慶功夠 Face

連掃兩獎的王菀之威到盡,慶功更加巴閉,除了古天樂俾面出席,連大老闆林建岳都有現身恭喜愛將。不過 Ivana好克制,玩咗 1個鐘就返屋企休息,反而同場的趙薇、黃渤留守到最後,唔通 Ivana趕住返去向身在韓國的男友 Eric So報喜?

連攞兩獎, Ivana激動到喺台上爆喊。

老闆林建岳亦親自去慶功宴恭喜王菀之,錫到爆!

《金雞 SSS》同《親愛的》一齊搞慶功,古仔(左三)都有俾面出嚟玩。

阿 Sa 姊妹淘邊爐

大熱倒灶的阿 Sa,原本通知晒各大傳媒去灣仔慶功,點知爭影后失敗,隨即取消慶功,改同 Mani等人落九龍城打邊爐。好在好姊妹阿嬌其後趕去會合,阿 Sa先有番笑容咋!

失落影后,好在仲有好姊妹阿嬌陪伴,阿 Sa即刻笑番!

賽前話自己機會不大,不過阿 Sa等揭曉一刻緊張到吞晒口水(小圖),完騷後又主動向身邊朋友揮手,示意心情 ok。

鍾意就快D Share啦!