掃呢頁CODE去手機

2015年5月21日 星期四

馬伕王專服侍中環友 [壹週刊 - 1315] M1,



爆壹爆

馬伕王專服侍中環友

睇完電影《華爾街狼人》,就知金融界大把如狼似虎之人,全城最蠱惑最大貪嘅人,幾乎都入咗呢行,包括我爆哥。有人股市搵到錢,對女人自然有特別高要求,呢一年來,出入中環就不時撞到一班打扮好艷麗嘅囡囡穿梭。

讀者有所不知,原來雖然中上環係商業區,唔似九龍區咁多一樓一色情架步,但其實有唔少高鐘馬伕响度搵食,專服侍中環客。呢班馬伕各自旗下都會有一班高質妓女,除北姑外,有啲馬伕仲會有鬼妹或韓妹。而佢哋嘅客人,多數係中上環上班嘅金融界西裝友,趁着午飯和放工時間, call馬伕安排妓女到酒店短聚「偷跳」。至於肉金則要睇國籍,北姑一般二千以上,鬼妹和韓妹則幾千蚊起錶。

有幫襯開嘅金融界滾友爆料,現時該區最響朵嘅,係一名貌似藝人林國斌、名叫 Martin嘅高鐘馬伕,佢旗下有六、七名高質北姑和韓妹,每日都有一班固定西裝客落單。不過,由於 Martin活躍不同酒店,一般人好難捕捉到佢嘅行蹤。今年二月,就有人撞到過 Martin帶班女到上環港澳碼頭附近一間酒店出鐘,當時 Martin嘅黑色坐駕抵達,並帶一名貌似韓妹的長髮女子進入酒店, Martin便走出來煲煙等候,其間仲有名人行出酒店,有人手癢拍埋片,喺中環滾友圈內傳閱添。

各位中環滾友出來玩小心啲哦,依家人人有手機,唔覺意被人影到,就分分鐘要被女友大刑侍候囉,呵呵!

郭炳湘冇探過細佬

爆哥上週約咗政界老友在政總附近食晏吹水,點知多眼望吓,就見到郭炳湘同前新聞處處長丘李賜恩坐七人車離開政總,政界老友即刻自動爆料,話收到風,原來當日阿湘係入去政總同政府官員開會,事關佢有隻慈善基金搞緊捐款俾教育部門。

爆哥聽完嫌唔夠爆,面色一沉,政界老友即刻加多兩錢肉緊,話阿湘仲同人講,對新地同埋兩個弟弟一直係親情未變哦,不過聽聞阿湘至今未去過探炳江監,因佢唔想用咗炳江家人探監名額,所以先至無去哦。另外,早前有報導,當新地準備開售何文田天鑄之際,阿湘首個與長和合作嘅芊薈亦吹風開賣,就有人傳阿湘夥拍長和夾擊新地,對此阿湘曾同其他人呼寃,話自己只係該項目小股東,根本無話事權,兩個樓盤同時間開賣,只是巧合。

西貢土豪壽宴江湖派對

來來來,影張大合照先!

(左三白衫子騰,左四黃才平,右四囝囝,右三打呔陳志強)

西貢大地主黃才平,早排在尖沙咀洲際酒店擺壽宴,爆哥有份出席,嘩!當晚真係星光熠熠,連一向低調嘅元朗勝和囝囝,同埋早排中咗警方臥底嘅勝和坐館子騰都有俾面出席,而另一江湖有錢人爵士陳志強都有嚟。

原來黃向來被人叫西貢有錢佬,因為業務遍及發展及收地好多瓣數,於是同好多社團及江湖人稔熟,聽聞去年十月,有人就喺西貢蠔涌村,搞咗場「封路運動」,由於當中涉及私人地段,政府對呢個西貢土豪一時間都一籌莫展。一三年二月,黃仲宣布喺西貢蠔涌無償捐贈八萬多平方呎土地,供興建香港少林寺,最後政府雖然無領黃呢個大人情,不過佢出手闊綽,好多江湖大哥當正佢係大有錢佬。

爆哥乜料

金融界撈家,穿梭黑白政商界,朋友遍布旺角至中環,每星期都八到唔同料,同《壹》仔讀者過吓癮!

鍾意就快D Share啦!